Ruth 4 - Iñupiatun Mumiksat Uqalugiksuat

Boaz-gum Tuvaaqasiutigaa Ruth

¹ Boaz katirviannuŋaruq upkuaqpaum pianiittuamun aasii aquviłłuni. Elimelech-gum nanmiñiq iḷaŋa, Boaz-gum uqallausiġiŋaraŋa, tamaunnaaġman, Boaz-gum ququulagaa, “Qaiñ, avilaitqatiiŋ, aquvittin.” Taimma ullakługu aquvittuq.

² Boaz qaitqurivḷuni qulinik nunaaqqim aullarriŋiññik aquvitqummigaich. Aquvinmata,

³ uqallautigaa taamna nanmiñiq iḷani, “Naomi utiġami Moab-miñ tunisukkaa nunaŋa iḷamnuk Elimelech-gum,

⁴ iḷisimaruksrausugnaqtutin. Pigisukkupku tauqsiġuŋ ukua aŋutit takkuanni. Aglaan pigisuŋitkupku, uqallagiñ, qanukkii ilvich sivulliulutin piviqaqtutin tauqsiġukkupku taimaasiiḷi uvamnun tulluni.” Aŋun uqallaktuq, “Tauqsiġñiaġiga.”

⁵ Boaz uqallaktuq, “Kiami, tauqsiġupku nunaŋa Naomi-miñ tavra taputiniaġiñ Ruth, Moab-miuguruaq uiḷgaġniq, taamna nuna taiptuma aŋutim tuquŋaruam nanmiñiq iḷagiraŋiññiñ piiŋitchumauq.”

⁶ Aŋutim kiugaa, “Tainnainniaqpan qaitkiga iliŋnun tauqsiḷḷasiḷugu nuna, qanukkii uvaŋa miqłiqtuġma piññaktaaġiyumiñaiññiaġaat. Ilvich tauqsiġuŋ; uvaŋa pisuŋitkiga.”

⁷ Taimani uvluni, tauqsiqsuaq naagga simmiqsuak sumik suġauttamik nalunaiqsaqługu, pitqusiġiŋagaa tuniriruam mattaqługik aluġutigni qaitchuugaik tauqsiqsuamun. Tainnaġamik Israel-miuguruat nalunaiġaat taamna piraqtik itqanaiqsilaaŋanik.

⁸ Tavraasii aŋutim uqallautigamiuŋ Boaz, “Ilvich tauqsiġuŋ,” mattaŋagaa aluġutini aasii qaił̣ł̣ugu Boaz-mun.

⁹ Tavra Boaz-gum uqallautiŋagai aullarrich allallu tavraniittuat, “Iluqasi qiñiqtusi uvlupak tauqsiqapki Naomi-miñ iluqaisa Elimelech-guvlu iġñiŋiksa Chilion-guvlu Mahlon-guvlu suġauttapayaaŋich.

¹⁰ Aasiisuli Ruth, Moab-miuguruaq, Mahlon-gum nuliakkaluaŋa, tuvaaqatiliutiniaġiga uvaŋa. Tainnaitpan suġauttat taaptuma tuquŋaruam iḷaŋiñiinniaqtut, kiŋuniġiich nauniaqtut suli aimaaġviqaġutik taimuŋa. Ilivsi iḷisimaraurusi taaptumuŋa uvlupak.”

¹¹ Aullarriḷḷu allallu tavraniittuat uqallaktut, “Ii, iḷisimarauniaqtugut. Atanġum savagliuŋ tuvaaqatin piusimisun Rachel-mullu Leah-mullu, iñugiaktuanik miqłiqsiruaktun Jacob-mun. Umiallaksaqtutin kiŋuniiŋiññi Ephrath-gum suli qutchigutin iñuŋiññiñ Bethlehem.

¹² “Miqłiqtut aitchuutiginiaqtaŋich Atanġum taaptumuuna aġnakun iḷisaġaasi aimaaġviqatauruatun Perez-mun, iġñiġuruaq Judah-mullu Tamar-mullu.”

Boaz-lu Kiŋuniiŋiḷḷu

¹³ Tavraasii Boaz-gum aggisiŋagaa Ruth tuvaaqasiutivlugu. Atanġum ikayuŋagaa aasii siŋaiyauŋaruq aasii iġñiqaqłuni.

¹⁴ Aġnat uqallautiŋagaat Naomi, “Nanġaġli Ataniq! Ilaan tutaaluksritkaatin aŋutaiyaamik uvlupak nanmiñiq qaunaksriksraġnik. Taamna aŋutaiyaaq qutchikkumauq Israel-mi!

¹⁵ Paniksrakpich piqpagigaatin, suli piutiłhaaġaatin tallimat malġugniñ iġñiġutigniñ. Uvvasuli tutaaluksriñmigaatiŋ nutaqsaqtiksraŋanik iñuggutikpich suli utuqqaliguvich qaunaksriksraġnik.”

¹⁶ Naomi-m tiguŋagaa miqłiqtuuraq, iqimmalaaqługu, suli ilaan qaunagiŋagaa.

¹⁷ Aġnaŋisa taaptuma inaaqqim atchiŋagaat taamna nukatpiaġruk Obed-mik. Uqallautiŋagaich iñupayaat inna, “Aŋutaiyaaq aniruq Naomi-mun!” Obed aapaġuŋaruq Jesse-mun, aapauruamun David-mun.

^18-22 Uvva aŋayuqaaġiich Perez-miñ David-mun: Perez, Hezron, Ram, Amminadab, Nahshon, Salmon, Boaz, Obed, Jesse, suli David.