Ruth 2 - Iñupiatun Mumiksat Uqalugiksuat

Ruth Savaktuq Nauriaqaġviŋiññi Boaz-gum

¹ Naomi iḷaqaġniqsuq atiqaqtuamik Boaz-mik, umialgumaruq suli iñuich naalaġnisuumagaat, nanmiñiq iḷagimagaa Naomi-m tuvaaqataata Elimelech-gum.

² Uvlut iḷaŋanni Ruth-gum uqallautiniġaa Naomi, “Nauriaqaġvigmuglaŋa pukugiaġluŋa palauvaksranik unisaŋiññik pukuktuat. Iḷisimaruŋa imma iḷaŋata savaktit suginiaŋitchugnaġaat pukukkuma.” Naomi-m kiugaa, “Kiami, paniiŋ.”

³ Tavraasii Ruth nauriaqaġvigmuŋaruq aasii pisuagaqsivḷuni aquatigun savaktuat, pukukłuni palauvaksranik tamauŋa uniñŋaraŋiññik. Tavra nauriaqaġviŋani Boaz-gum pukuksimaruq.

⁴ Aaqagulimman Boaz tikiññiqsuq Bethlehem-miñ aasii paġlavlugi savaktini. “Atanġum itqatigilisi!” uqallaktuq. “Atanġum quviasaaġlisin!” iliŋisa kiugaat.

⁵ Boaz-gum apiġigaa savaktuat qaukłiat, “Kiñaamna taavamna niviaqsiaq?”

⁶ Aŋutim kiugaa, “Allaniñ nunaninŋaqtaq, Moab-miñ qairuaq, Naomi piqatigivlugu.

⁷ Apiġiraani maliġiyumiñaġmagaaġmi aquatigun pukuktuat pukugukhuni palauvaksranik. Uvlaatchauraq isagutiŋaruaq, uvva akkupak nutqaqpaalluktuq piḷaiŋaiqsiaqsaqłuni taġġisimaaġvigmi.”

⁸ Boaz-gum uqallautigaa Ruth, “Ikayuutiksramik uqallautillaglakpiñ. Allani pukugnak palauvaksranik uuma nauriaqaġvium avataagun. Maani aġnat savaqasiqsaġitin;

⁹ qiñiġlugich sumi pukugmagaisa aasii itqasiġḷugich. Piraksriŋagitka savaktitka aŋutit piyuaquŋił̣ł̣utin. Aasiisuli imiġuliġuvich imiġiaqtuqsaqtutin qattaniñ iliŋisa immiŋaraŋiññiñ.”

¹⁰ Ruth puttuq kiiñamiñik aksikł̣ugu nuna, aasii uqallakhuni Boaz-mun, “Summan uvva isumaalugiviŋa? Summan uvva nakuugutiviŋa uvaŋa allamiñ nunaniŋŋaqtauruaŋaa?”

¹¹ Boaz-gum kiugaa, “Tusaaŋagitka iluqaisa piŋaratin aakaruaġnun tuvaaqatin qaŋa tuqumman. Iḷisimaruŋa uniñŋagikkiñ aapallu aakallu nanmiñiġlu anniviiñ nuna aasii tamauŋa nuułłutin avataannun iñuich naluraqpich sivuani.

¹² Atanġumtuq akiḷiusiaksriḷḷisin piŋarakkun. Atanġum God-iŋata Israel naamaruamik akiḷiusiaqaqtillisin, ullaŋagapku ilaa qaunagitquvlutin!”

¹³ Ruth-gum kiugaa, “Aŋalalluatiġiŋma, aŋuun. Tutqiksipkaġiŋma uqautilluataqłuŋa, uvvaluuvvaa nalliummatiŋitkaluaqtilluŋa kivgaġnun.”

¹⁴ Niġiñaqsimman Boaz-gum uqallautigaa Ruth, “Qaiḷutin punniqtuġiñ kiñisaaġutin.” Tavraasii aquptaaqasiŋagaich savaktit aasii Boaz-gum aitchuŋagaa iliktitanik palauvaksranik. Niġiŋaruq siḷvilġataqhuni, aasiisuli iḷakuqaŋammiuq.

^15-16 Aullaanigman pukugiaqhuni palauvaksranik, Boaz-gum piraksriiŋagaich savaktini, “Pukuktitchiuŋ palauvaksranik qiḷiqsruŋaruat unnii inaanniñ, uqallautinasiuŋ sumik nutqaqtitchaġlugu. Aasiisuli nuqitchiḷusi palauvaksranik qiḷiqsruŋaruaniñ pukuaksraŋiññik.”

¹⁷ Tavraasii Ruth pukuŋaruq palauvaksranik unnuksraaġataqtillugu, aasii ivsulaanikkamigi iḷitchuġiruq pukuktilaamiñik uqumaisigiruanik iñuiññaq tallimatun (25).

¹⁸ Aggisiŋagaich pukuani aasii tautuktiłługich aakaruamiñun. Qaił̣ł̣ugiḷḷu niġigami iḷakuni.

¹⁹ Naomi-m apiġigaa, “Sumi pukukpigich ukua palauvaksrat uvlupak? Kia nauriaqaġviani savakpich? God-imtuq ikayuġliuŋ aŋun iliŋnik ikayuiruaq!” Ruth-gum uqallautigaa Naomi savagnivḷuni nauriaqaġviani aŋutim atiqaqtuam Boaz-mik.

²⁰ “Atanġum quviasaaġliuŋ Boaz!” Naomi uqallaktuq nipatuvluni. “Atanġum piiguyuitkai unniqsuqłiiŋakami iñuuruanullu tuquŋaruanullu.” Uqallavsaaqtuq, “Taamna aŋun nanmiñiq iḷagigikpuk, iḷauruq tamatkunuŋa qaunaksriksrautigiraptignun.”

²¹ Ruth uqallaktuq, “Uvva nakuuniqsraŋa, uqallautiraani pukukkumiñaġnivḷuŋa savaktimiñi naatchiḷġataqtillugich pukuamignik.”

²² Naomi-m uqallautigaa Ruth, “Aaŋ, paniiŋ, iluałhaaġniaqtuq pukukkuvich aġnani savaktuani Boaz-gum nauriaqaġviŋiññi. Piyuaqpiaġaatin pukugiaġuvich allam nauriaqaġviŋanun.”

²³ Tavraasii Ruth-gum savaqasiŋagaich pukukhuni palauvagnik naatchiḷġataqtillugi palauvagniglu palauvaksraniglu. Tavra iñuuniaqatigiŋagaasuli aakaruani.