Ruth 1 - Iñupiatun Mumiksat Uqalugiksuat

Elimelech-lu Aimaaġviqatiiniḷu Nuuttut Moab-mun

^1-2 Qaŋasaaq, Israel umialgiñŋaan, niqaiḷḷiuŋarut tamaani nunami. Aŋun atiqaqtuaq Elimelech-mik, kiŋuniiqaqtuaq Ephrath-mik iñuuniaqtuamik Bethlehem-mi Judah-miittuami, aullaŋaruq Moab-mun tuvaaqatiniḷu, Naomi, malġuglu iġñigni, Mahlon-lu Chilion-lu. Tavraniitillugich,

³ Elimelech tuquŋaruq, aasii Naomi kisiŋŋuŋagaa igñitiglu malġuk,

⁴ nuliaŋaruak Moab-miugnik aġnagnik, Orpah-miglu Ruth-miglu. Qulit ukiut qaaŋianigmata

⁵ Mahlon-lu Chilion-lu tuquŋammiuk, aasii Naomi kisiŋŋuŋagaat, uiŋatalu iġñiŋiksalu.

Naomi-ḷu Ruth-lu Utiqtuk Bethlehem-mun

⁶ Naomi tusaamaruq Ataniġmun ikayuġnivḷugich iñuni nauriaŋich naupkaqługich; tavraasii itqanaiyaŋaruq aullaġukłuni Moab-miñ ukuagni kaluġlugik

⁷ Aullaŋarut atautchikun utiqsaqłutik Judah-mun, aglaan iglaullaġmik

⁸ uqallautiŋagaik, “Utiġusik aakavsigñiitchaqtuaġitchik. Atanġuptuq nakuugutilisik ilivsik nakuugutimmatun uvaŋalu taipkualu tuquŋaruat.

⁹ Suli Atanġum savaaġiliuŋ allanik katillasiḷusik aimaaġviqallasiḷusik.” Tavra Naomi-m kuniŋagaik aullaqsaġami. Aglaan qianagutiŋaruk

¹⁰ uqallautivlugu inna, “Naumi! Maligniagivsiġiñ ilvich nanmiñiq iḷaŋnukkuvich.”

¹¹ “Utiqtuksraurusik, paniimaaŋ,” Naomi-m kiuŋagaik. “Summan maligukpisiñŋa? Iġñiqavsaaġniaġnasugivisiñŋa katitchumiñaqtavsigñik?

¹² Aisitchik, utuqqauvaitchuŋa uiñitqigñiaŋitchuŋa. Isumagaluaġuma piviqallanasugiluŋasuli aasii katitilluŋa unnuapak aasii iġñiqaġluŋa,

¹³ utaqqiñiaqpisik iñuguġataqtillugik? Tavra taamna uiñitchaiḷutaġiniaqpisiuŋ allamik? Naumi, paniimaanŋ, tainaitchumiñaitchuq. Atanġum tunutkaaŋa, aasii nagligiqpakkivsik.”

¹⁴ Qianagutilgitchuk. Tavra Orpah-m kunikł̣ugu aakaruani aisaŋaruq, aglaan Ruth-gum tigummisiññaŋagaa.

¹⁵ Tavraasii Naomi-m uqallautigaa, “Ruth, nukaunġun utiqtuq iñugmiñullu god-imiñullu. Utiġiḷḷi aiñmun maliglugu.”

¹⁶ Aglaan Ruth-gum kiugaa, “Unitquuŋaiġiñ! Maliglakpiñ. Sumupayaaġuvich, maligniaġikpiñ; sumipayaaq iñuuniaġniaġuvich uvaŋaptauq tavrani iñuuniaġniaġmiuŋa. Iñuich ilvich pigiratin uvaŋaptauq piginiaġmigitka, God-in God-iginiaġmigiga.

¹⁷ Sumipayaaq tuquguvich, tuquniaġmiuŋa, aasii tavrani iḷuviqtauluŋa. Atanġum tatavsautiŋisa suaŋaniqsrauruam tatavsaqsaġaaŋa unitkupkiñ patchisiqaġluŋa allamik avataagun tuquttutim!”

¹⁸ Naomi-m iḷitchuġikamiuŋ Ruth maligupiaġataqtilaamiñik uqallatqiŋitchuq.

¹⁹ Iglauŋaruk tikiḷġataqhutik Bethlehem-mun. Tikiñmagnik nunaaqqim iñuŋich quviasuŋarut, suli aġnat uqaŋarut inna, “Uvvauna tavra Naomi?”

²⁰ “Taiñasiñŋa Naomi-mik,” Naomi-mim kiuŋagaich; “taisiñŋa Marah-mik, qanukkii Suaŋaniqsrauruam God-im iñuusiġa quviasuutaiġaa.

²¹ Maaŋŋa aullaġama, susuksiuŋaiñŋaruŋa, aglaan Atanġum utiqtitkaaŋa suiḷaaqłuŋa. Summan Naomi-mik taiñiaqpisiñŋa Atanġum suksraaġmaŋalu nagliksaaliqsił̣ł̣uŋalu?”

²² Tainna tavra Naomi utiŋaruq Moab-miñ ukuamiñik Ruth-mik Moab-miumik, piqatiqaqłuni. Tikiñŋaruk Bethlehem-mun kivluivik palauvaksranik pukugnaqsimmiullu.