Romans 9 - Iñupiatun Mumiksat Uqalugiksuat

God-lu Iñuksraqtaaŋiḷu

¹ Atausiŋŋuqatauŋavluŋa Christ-mun sagluŋitchuŋa, aglaan uqaqtuŋa iḷumun ittuamik. Ilitqusiġiksuavlu nalupqisuktinŋitkaaŋa iḷumun uqaqtilaamnik inna.

² Isumaaġutiqpaqaqtuŋa suli ataramik ipiqtusuutiqaqłuŋa iḷumni pisigivlugich Jew-guqatitka, nanmiñitka.

³ Qanuq piñaġumiñaqpan, qanuġlugich annaurrauyumiñaqpata Jew-guqatitka uvaŋa tammaġnipkun piiqsauluŋa Christ-miñ, tainna pitqurriñayaqtuŋa.

⁴ Iliŋich kiŋuniġigai Israel-gum, suli God-im ququaŋakkaŋi miqłiqtuġisukługich. Tautuŋarut qaumanġanik nayuqłiataata God-im. Aitchuusiaqaŋammiut God-im sivunniuġutiŋiñik pitquraniglu nalaunŋaruakun iñuuniaġutiksranik, qanuġlu aŋaiyyuniksraŋatigun God-mun, unniqsuqłiisiŋiñiglu God-im.

⁵ Maŋŋuqaqtut kamanaqtuanik aapanik, maŋŋuqaqatigimmigaat timikun Christ, atanniqsimanniktuaq supayaanik, God-auruaq nanġagaksrauruq isuitchuamun. Amen.

⁶ God-im uqaluŋi anniqsuutauŋaiŋaitchut pisigigiññaġlugu iḷaŋich Israel-guruat ukpiŋiññiḷugich. Qanuq Israel kiŋuniŋisa iḷaŋich Israel-gupiaġataŋitchut,

⁷ tamatkiġḷugich Abraham kiŋuniŋi miqłiqtuliqsuutinaġumiñaitchut ilaanun, qanuq Bible-ni uqallaun ittuq, “Iġñipkun Isaac-kuaqtuat kisimik taiñaġniaqtut miqłiqtuġnik.”

⁸ Taamna sivuniqaqtuq tamatkiġḷugich Abraham kiŋuniŋi miqłiqtuġiŋitkai God-im, aglaan kisiisa miqłiqtut aniruat Isaac-kun, tuvraqługu God-im unniqsuqłiisaa Abraham-mun.

⁹ Qanuq inna God uqallaŋaruq unniqsuqłiiñmiñi, “Ukiutqigu tainnaiḷikpan, qaiñiaqtuŋa aasii Sarah iġñiqaġniaqtuq.”

¹⁰ Aasiisuli, Isaac maŋŋuqput aŋutiġuġman tuvaaqatinikłuni Rebecca-mik, Rebecca unniqsuqłiisiaqaŋammiuq malġiagni aniŋaiñŋaaŋnik.

¹¹ Aniŋaiñŋaġmik nakuurualiqisaŋaitkaluaqtuk naagga pigiitchualiqilutiŋ. Taimani God unniqsuqłiiŋaruq sivunniuġutini iñuksraqtuġnikun igliquvlugu. Aasii iñuksralaitchuq pisigilugu iñuuniaġniġmi piḷġusiat, aglaan iñuksraqtaaġigai sivuniġmigun.

¹² Tavra Rebecca uqallausiaqaŋaruq, “Aŋayukłium savautiniaġaa nukaqłiq.”

¹³ Aglausimammiuq Bible-ni God uqallaŋnivḷugu inna, “Jacob piviuttaġiŋagiga, aglaan Esau pisuŋiñŋagiga.”

¹⁴ Tainna God piŋaniġman, uqallakkumiñaqpisa God nalaunŋiññiḷugu? Naaggapiaġataq.

¹⁵ Qanuq ilaa uqallaŋaruq Moses-mun, “Nagliktuutiqaġniaqtuŋa kimun pisukkuma, tuvraġlugu uvaŋa pisuutiga.”

¹⁶ Tavra God iñuksraġuuruq pisigisuŋaġnagu piksraqtaagusugniŋat, naaggaunnii pisigisuŋaġnagu piḷḷuataġniŋat, aglaan pisigivlugu ilaan nagliktuutini.

¹⁷ Urriqativsaaq Bible-ni ittuq God-im uqalua Pharaoh-mun, “Uvaŋa umialliutiŋagikpiñ Egypt-mun salapqiġukługu suaŋŋatiga ilipkun, nunam iñuŋi iḷitchuġitquvlugich iḷumun God-autilaamnik.”

¹⁸ Tavraasii God naglikkutiqallaruq kimupayaaq pisukami, suli uqaqsiġiiḷipkallavlugu kiñapayaaq pisukami.

God-im Tatavsautaa Nagliktuutaalu

¹⁹ Uqallagniaġmiusi uvamnun, God-im pisuutaa akiḷḷiḷiqsulgunaiñman, summan God-im pasivagich iñuich piḷġusiŋisigun?

²⁰ Aŋutaunasugirutin uvvai, kiumayumiñaġlugu God? Sum uuma suliaguruam uqallautiyumiñaqpauŋ suġuqtitini inna, Summan uvva inna savakpiŋa?

²¹ Uvva urriqan. Iñuk savaaqaqtuaq qikuyyamik piḷiyumiñaqtuq supayauramik pisukkumi. Akutamiñ atautchimiñ utkutchiyumiñaqtuq qiñiyunaqsiḷugu aasiisuli allamik suaqłukuviksramik.

²² Tavra tainnatun God-im piyumiñaġai iñuich qanuq pisukkumigich. Qiñuiqł̣uni igḷutullagai iñuich nalliummatiliġaluaqtuat suksraunġiqsauruksraġuqłutiŋ, iḷaannigutaaġukkumiuŋ aquvatigun ilaan qinnautini suaŋŋatiniḷu iliŋiññun.

²³ Taamna piyumiñaġaa iḷisimanaqsisukługu uuktuġnaġumiñaitchuaq suaŋŋatini iñuŋnun aitchuusiaqaqtuanun nagliktuunmiñik. Aasii taapkua iñuich piksraqtaaġiŋagai aniŋaiñŋaisaunnii iñuutquvlugich qiḷaŋmi.

²⁴ Taapkuagurugut iñuich uvva uvagut, God-im ququaŋakkaŋi, Jew-niñ kisian piŋaitchut aglaan Jew-guŋitchuaniḷḷu.

²⁵ Taamna iḷumun ittuq aglausimaruatun Hosea-mi, God-im uqallautaa inna, “Tamatkua iñugiŋitkaluaŋaratka taiñiaġitka uvaŋa iñumnik, suli tamatkua piqpagiraiñŋaruat taiñiaġitka uvaŋa piqpagiramnik.

²⁶ Suli taavrumani inimi uqallausiaqaġvigiŋakkaŋanni, Iñugiŋitkivsi, iḷisimanaqsiñiaqtut miqłiqtuġitilaaŋat iñuuruamun God-mun.”

²⁷ Suli Isaiah nipatusivḷuni uqaŋammiuq sivuniġivlugich Israel-guruat, “Iġñiŋi Israel iñugiaktilaaqaġluqtutunnii qaviaŋatun siñaata taġium, iñukisuurat annaurrauniaqtut.”

²⁸ Qanuq Atanġum tatavsaġniaġai nunam iñuŋi suamaruamik kayumiktuamiglu suksraunġiunmik.

²⁹ Isaiah suli uqallavsaaŋaruq, “Atanġata isaġulisalaich iḷakutchiŋisuaqpatigut iñułauranik, kiŋuyumiñaŋagaluaqtugut Sodom-tun Gomorrah-tullu.”

Israel-guruallu Tusaayugaaġiksuaġlu

³⁰ Sumik tamatkua iluqaġmiŋ sivuniqaqpat? Sivuniqaqtut Jew-guŋitchuat nalaunŋasiñiataŋitchuat God-im pitquraŋigun, nalaunŋasipkaqtauŋarut pisigivlugu ukpiġutaat.

³¹ Sivuniqaġmiuq suli Israel-guruat, nalaunŋasiñiataŋarut tuvraqługich God-im pitquraŋi qaisaŋi Moses-mun, aasii nalaunŋasipkaqtauŋaitchut.

³² Nalaunŋasipkaqtauŋaitchut qanuq nalaunŋasiñiatakłutiŋ kamagilugich pitqurat, ukpiġigaluaġnagu Christ. Aasii ukpiŋiññamiŋ putukkiñmatun piŋarut putukkisaunmun uyaġaŋmun.

³³ Taamna aglausimaruq Bible-ni inna, “Uvva Zion-mun iḷigiga uyaġak iñuich puukaqtautiksraŋat, uyaġak puukaqtaqtitchiruksraq iliŋiññik. Aasii iñuk ukpiqtuaq Christ-mun, uyaġaktun ittuamun, nunuuraliġumiñaipiaqtuq.”