Romans 8 - Iñupiatun Mumiksat Uqalugiksuat

Iñuusiq Aŋalatiłłuni Ilitqusiġiksuamun

¹ Tavra paŋmapak suksraunġiqsauyumiñaitchut tamatkua atausiŋŋuqatauruat Christ Jesus-mun.

² Qanuq atausiŋŋuqatigikaptigu Christ, Ilitqusiġiksuam aitchuŋagaatigut nutauruamik iñuutchimik, atanġiqsiłłuta piḷuunmiñ tatavsaunmiḷḷu isuitchuamun.

³ God-im piŋagaa pitqurat qaisauruat Moses-kun piyumiñaisaŋat. Pitqurat iñuk suuramikunnii nalaunŋasiyumiñaiñŋagaat, qanuq piḷuusiqirauvluni kamagilaitkai pitqurat. Aglaan God-im tiliŋagaa Iġñini timiqaġlugu iñuutquvlugu uvaptiktun, piḷuksiŋaitchuq aglaan. God-im Iġñiŋan akiḷiŋagai piḷuutivut, aasii taamna pikamiuŋ, suaŋŋataiŋagaa piḷuun aŋalatchiyumiñaiqł̣ugu uvaptiŋnik.

⁴ Tavraasii paŋmapak kamagiyumiñaġivut God-im pitquraŋi, sivisutilaaŋatun Ilitqusiġiksuamun aŋalatinnipta, aŋalatinŋaiġḷuta piḷuksisuguuruanun iñuutchivsiŋnun.

⁵ Iñuich aŋalatittuat piḷuksisuguuruanun iñuutchimiŋnun, iñuusuurut iviġagniaqsiññaqłutiŋ inmiŋnun, aglaalli iñuich aŋalatittuat Ilitqusiġiksuamun, iñuusuurut iviġagniaqługu Ilitqusiġiksuaq.

⁶ Iñuich iñuusiqaqtuiññaqamiŋ kamagivlugich piḷuktuat kipiġniuġutitiŋ, tuquruksraurut. Aglaan iñuich kamaksriugaqtuat qanuq Ilitqusiġiksuam pitqutiŋiñik, piqaqtut iñuggunmik tutqiunmiglu.

⁷ Iñuk kamaksriugaqtuaq qanuq piḷuksisuguuruam iñuutchimi kipiġniuġutiŋiñik, uumikłiqsuq God-mik. Taavruma iñuum kamagiŋitkai God-im pitquraŋi. Kamagiyumiñaipiaġai.

⁸ Kialiqaa tainna iñuusiqaqtuam God iviġakkumiñaitkaa.

⁹ Aglaan ilivsi aŋalatinŋitchusi piḷuksisuguuruanun iñuutchivsiññun. Ilitqusiġiksuaŋa God-im iñuupiaqpan iḷuvsiññi, aŋalataġigaasi Ilitqusiġiksuam. Kiñaliqaa piqaŋitchuaq Ilitqusiġiksuaŋanik Christ, Christ-gum pigiŋitkaa.

¹⁰ Tavra Christ iḷuvsiññiitpan, ilitqutchisi iñuuniaqtut qanuq nalaunŋasipkaqtauŋarusi, timisi tuqugaluaqpataunnii pisigilugu piḷuun.

¹¹ Tavra Ilitqusiġiksuaŋa God-im iñuukpan iḷuvsiññi, aŋipkaiŋaruaq Jesus-mik tuqqunmiñ, taavruma aŋipkairuam Christ Jesus-mik tuqqunmiñ, iñuggusiġñiaġmigai tuqullaruat timisi, taavrumuuna suli Ilitqusiġiksuamigun iñuuruakun iḷuvsiññi.

¹² Tavra aniqatiit, iñuuruksrauŋipiaqtugut kamagilugich piḷuksisuguuruat iñuutchivut.

¹³ Iñuuguvsi kamagilugich piḷuksisuguuruat iñuutchisi, tatavsaqtauniaqtusi isuitchuamun. Aglaan Ilitqusiġiksuakun nutqaqtitkuvsigik pigiitchuat piḷġutchisi, iñuuniaqtusi isuitchuamun.

¹⁴ Qanuq iluqaġmiŋ iñuich aŋalatittuat Ilitqusiġiksuamun miqłiqtuurut God-mun.

¹⁵ Ilitqusiġiksuam aitchuusiavsi iḷisimapkaġaasi tiguaqtauvlusi miqłiqtuġitilaavsiññik God-mun, sivuuqqataiqł̣usiḷu tatavsausiaksramun isuitchuamik. Tavraasii tuqłuġumiñaġikput God Aapaaġlugu.

¹⁶ Tavra Ilitqusiġiksuam iḷitchuġipkaġaatigut nalupqinaiqł̣ugu miqłiqtuġitilaaptiŋnik God-mun,

¹⁷ aasii God-im miqłiqtuġiniġmatigut, kiŋuvaannaktaġiniġaatigut. Kiŋuvaannaktaginiġmatigut, kiŋuvaannaqatauyumiñaqsirugut Christ-mun, aasii iḷaŋiutiniaqtugut kamanaunmun piqatigilugu Christ, nagliksaaqtuagugupta ilaa pisigilugu.

Kamanaun Piyumaaqtuaq

¹⁸ Isumalaaġutigikapkich paŋmapak nagliksaaġutivut suuŋitchut nalliġaaġutausaġumiŋ iñuusiḷḷuatamun piginiakkaptiŋnun qiḷaŋmi.

¹⁹ Sut savaaŋi God-im utaqqirut niġiupiaġataqłutiŋ piviksramun God-im salapqiqpagich miqłiqtuni.

²⁰ Qanuq tamatkua sut God-im savaaŋi igliŋitchut ilaan sivunniutiqqaaŋagun. Aasii iliŋich pasiraksrauŋiñmiut tainnainniŋatigun. God-im tainnaiḷipkaŋagai Adam piḷuksimman.

²¹ Tavra tamatkua God-im savaaŋi atanġiqsitauniaġmiut aŋalatchisaaniñ tuqqutim aggutivlu, piqatauyumiñaqsiḷugich quvianaqtuamun atanġiqsirrunmun piqatigilugich miqłiqtuŋi God-im.

²² Iḷisimagivut supayaat God-im savaaŋi nagliksaaqatigiiksut atqunaq aġnatun aulayyautikkaŋatun.

²³ Kisimiŋ sut savaaguruat nagliksaaqpaŋitchut aglaan uvagullu. Piqaġaluaŋŋapta Ilitqusiġiksuamik iḷitchuġipkaiḷḷaruamik quviasugniksraptiŋnik qiḷaŋmi, nagliksaaqpaŋmiugut utaqqivḷugu God-mun miqłiqtuliutiniksraqput qiḷaŋmi, timivut aŋipkaqtaukpata.

²⁴ Taamna niġiugisaŋagikput annaurrauganikapta. Niġiuguurugut sunik taŋŋiŋaitchuanik. Iñuk niġiuyuitchuq sumik taŋŋianiŋaruamik.

²⁵ Tavra niġiuktugut suli quviasuusiaksrautiptiŋnik taŋŋianiŋaitchuamik, aasii qiñuiqł̣uta taŋŋiqsiaġigikput.

²⁶ Tainnatun Ilitqusiġiksuam ikayuġaatigut suaŋaiḷiraġikapta. Qanuq iḷisimaŋitchugut aŋaiyyuniġmik aŋaiyyusiksraptiktun. Ilitqusiġiksuam qiññuaqtuutigaatigut iiqtuaġutiqaqłuni uqautigianignaitchuanik uqalugilugich.

²⁷ Suli God, iḷisimaruaq uummatiŋiññik iñuich, iḷisimaruq qanuq Ilitqusiġiksuam uqaqtilaaŋanik qiññuaqtuutimmigaich ilaaguaqtauruat God-mun, tuvraqługu pisuutaa God-im.

²⁸ Iḷisimarugut supayaat piruat uvaptiŋnun savaqatigiiksilaaŋannik anniqsuqsaqługich tamatkua piviuttaqsriruat God-mik, ququaqtauruat tuvraqługu God-im sivunniutaa.

²⁹ Qanuq ilaan iḷisimaŋagai iñuŋni aullaqisaamiñqaŋa, suli taimani sivunniŋaruq Iġñiġmisun iḷiñiaġnivḷugich, ilaan Iġñini qaukłiḷiutitquvlugu akunġanni iñugiaktuat aniqatigiich.

³⁰ Tavra tamatkua sivunniŋakkani taimani Iġñiġmisun iḷiñiaġnivḷugich, ilaan ququaŋagai, aasii tamatkua ququakkani ilaan nalaunŋasiŋagai, aasii nalaunŋasipkaqtauruat, ilaan suli kamanaqsipkaqługich.

God-im Piviuttaqqutaa Christ Jesus-kun

³¹ Tamatkua tainnainniġmata, uqallautiksraqaqtugut inna. God-im iḷaalliqsimammatigut, akiḷḷiitchugut sivuuġagiraksraptiŋnik.

³² God-im aitchuutigiyumaŋagaa ilaan nanmiñiq Iġñini tuqqutitquvluta. Tavraasii nalupqinaipiaġataqtuamik aitchuiñiaqtuq uvaptiŋnun, iluqaiññik pigiraksraġikkaptiŋnik, aitchuimmatun suli Iġñiġmiñik uvaptiŋnun.

³³ Aasiisuli iñuitchuq uqallakkumiñaqtuamik God-im iñuksraqtaaġikkaŋatigut pasiraksrauniḷuta, qanuq ilaan nalaunŋasiŋagaatigut.

³⁴ Kialiqaa suli suksraunġiqsaupkaġumiñaitkaatigut, qanuq Christ Jesus tuqqutiŋagaatigut, aasiisuli aŋipkaqtauŋaruq tuqqunmiñ, aasii ittuq God-im taliqpiata tuŋaani qiññuaqtuutivluta.

³⁵ Sumik piitchuq piyumiñaqtuamik uvaptiŋnun piiqsitchumiñaġluta Christ piviuttaqqutaaniñ. Iłuiḷḷiuqtitaugaluaġupta piiġumiñaitkaatigut, kiiqsiuġutituġaluaġupta, piaqłuktaqsiġaluaġupta, kaaksiugaluaġupta, naaggaunnii annuġaaqsausiiġaluaġupta, navianniuġaluaġuptaunnii, naagga tuqutaugaluaġupta.

³⁶ Tamatkua nalautitchuurut iñuutchivsiŋni aglausimaruatun Bible-ni inna, “Ilivich pisigivlutin, ataramik anayanniuqtuaqtugut tuqutauniksraptigun. Isumakkusiaqaqtugut imnaisun utaqqiruatun tuqutauniksramiŋnun.”

³⁷ Tamatkunaŋŋa iluqaiññiñ akimapqauraŋitchugut Christ-kun piviuttaqsriruakun uvaptiŋnik.

³⁸ Qanuq nalupqisuŋitchuŋa supayaam piiġumiñaitkaatigut God-im piviuttaqqutaaniñ, tuqugaluaġupta, iñuugaluaġupta, isaġulikkaluatunnii, ilitqusiqł̣ukkaluat unnii, naagga sut paŋmapak piruat uvaptiŋnun, sullu piyumaaqtuat uvaptiŋnun, ataniġnaqutikkaluallu.

³⁹ Sullu qairuat pamaŋŋa, naaggaunnii qairuat samaŋŋa, naagga supayaam God-im savaaŋata piiġumiñaitkaatigut God-im piviuttaqqutaaniñ, qanuq atausiŋŋuqatigiŋagikput Christ Jesus Ataniqput.