Romans 7 - Iñupiatun Mumiksat Uqalugiksuat

Iḷisaurrusiaq Katitinniġmiñ

¹ Aniqatiit, uqautigivsi iḷisimaruasii God-im pitquraŋiñik qaisaŋiñik Moses-kun, iḷisimarusi pitquranun iñuk aŋalatitchuuruq iñuuniġmiñi kisianik.

² Uvva urriqatiksraŋa taavruma. Pitqurat uqaluqaqtut aġnamun iñuuqatigitquvlugu uiŋa iñuuniqtutilaaŋatun. Aglaan uiŋa tuqukpan, pitquram tuvaaqatigiiksitaŋakta aŋalataġiŋaiġaa.

³ Tavra piqatiqaġumi allamik aŋunmik uiñi iñuuŋŋaan, allatuqtauniaqtuq. Aglaan uiŋa tuqukpan, taavruma pitquram tuvaaqatigiiksitaŋakta aŋalataġiŋaiġaa. Uiñikkumi allamik aŋunmik allatuqtauniaŋitchuq.

⁴ Tainnatuttauq ilivsiññun inmiuq, aniqatiit. Christ tuqumman, tuquqatigiruatun piŋagiksi, aasii paŋmapak aglausimaruat pitqurat aŋalanŋaiġaasi. Paŋmapak tuvaaqasiutirusi allamun, sunauvva Christ-mun aŋipkaŋakkaŋanun God-im tuqqunmiñ. Tavraasii iñuuruksraurusi iviġaumalugu God.

⁵ Iñuusuuŋŋapta kamagivlugu piḷuun, piḷuksisuguuŋarugut, aasii God-im pitquraŋisa iḷitchuġipkaqłuta piḷuusiqitilaaptiŋnik. Taavrumaasii pigiitchuam tatavsaqtaupkaġayaġaatigut isuitchuamun.

⁶ Aglaan paŋmapak pitqurat aŋalanŋaiŋagaatigut. Tuqummatun piŋarugut tamatkunuŋa aŋalatigisuukkaptiŋnun, aŋalataġitquvluta Ilitqusiġiksuamun, iñuulutaasii nutauruamik iñuutchimik, aŋalanŋisaŋannik utuqqauruat aglausimaruat pitqurat.

Pitqurallu Piḷuullu

⁷ Uqallakkumiñaqpisa pitquranun piḷuksipkaġuuniḷuta? Tainna uqallaktuksrauŋipiaqtugut. Pitqurat anniqsuġaatigut iḷitchuġipkaqłuta piḷuutim suutilaaŋanik. Nalunayaqtuŋa kaviuġniq piḷuutautilaaŋanik pitqurat uqallaŋaitpata, “Kaviuġnaq.”

⁸ Iḷitchuġikama pitqurani kaviuġniġmik, piḷuutim kipiġniuqtitkaqsigaaŋa qanusipayaanun pigiitchuanun. Iñuum nalugumigich God-im pitquraŋi, nalummiuq suutilaaŋanik piḷuun.

⁹ Qaŋauvlugu iñuunnamni naluŋagaluaqtuŋa God-im pitquraŋiñik. Taimani piḷuutaiñmatun inŋagaluaqtuq uvamnun. Aasii iḷitchuġikapkich pitqurat iḷitchuġimmiuŋa piḷuksiŋatilaamnik. Tavra tatavsaaksraġuŋaruŋa isuitchuamun.

¹⁰ Taapkua pitqurat iñuuliññiktuksraġaluat uvamnik, iḷitchuġipkaqsiññaŋagaanŋa pasirautilaamnik tatavsaqtauyumiñaqsivḷuŋa isuitchuamun.

¹¹ Qanuq iḷitchuġiŋaruŋa piḷuksiŋatilaamnik iḷitchuġipqauraqapkich God-im pitquraŋi. Niġiukkaluaqtuaŋaa iñuggutinnagniaġasugaluŋa pitquratigun, sagluqirauŋaruŋa, aasii piḷuutikun tatavsaaksraġuqłuŋa isuitchuamun.

¹² Tavra God-im pitquraŋi qaisaŋi Moses-kun piḷuutaitchut nalaunŋarullu nakuurullu.

¹³ God-im pitquraŋisa nakuuruat pasiraksraġuŋavanŋa tatavsaqtauruksraġuqłuŋa isuitchuamun? Naaggapiaġataq. Uvaŋa piḷuunma pasiraupkaŋagaanŋa. Iḷitchuġipqauraqama God-im nakuuruanik pitquraŋiñik, iḷitchuġimmiuŋa qanutun piḷuusiqiriqpaurautilaamnik.

Malġuk Irrutchik Iñuŋmi

¹⁴ Pitqurat nakuurut. Pasiraksrauŋitchut pitqurat, aglaan uvaŋa kamagilaiññiġitka piḷukpaił̣ł̣uŋa.

¹⁵ Kaŋiqsiḷguitchuŋaunnii uvamnik, qanuq uvva pisukkaluaġaqtuŋa sumik nalaunŋaruamik, piḷaitchuŋa. Pianigaġigiga pisuŋitkaluakkaġa naġġugikkaġalu.

¹⁶ Tavraasii pisuuniqama pitqurat pitquŋisaŋiññik, uvaŋalu piyumaŋitkaluakkamnik, piiḷaaġiŋitkiga pitqurat nakuutilaaŋat.

¹⁷ Nutauruam iñuutchima pipkaqtaŋitkai sut naġġugikkatka. Aglaan piḷuksisuguuruam iñuutchima pipkaqtaġaaŋa naġġugikkamnik.

¹⁸ Iḷisimaruŋa piḷuksisuguuruaq iñuusiġikkaġa nakuuŋipiaqtuq. Nakuurualiqisugluqtuŋaunnii suaŋŋataitchuŋa nakuurualiqiyumiñaġluŋa.

¹⁹ Qanuq piḷaitkiga nakuurualiqiaġiyumakkaġa, aglaan pivḷugu pigiitchuaq pisuŋitkaluakkaġa.

²⁰ Tavra pisuuniġupku pisuŋitkaluakkaġa, nutauruam iñuutchima pipkaqtaŋitkaa, aglaan piḷuksisuguuruam iñuutchima.

²¹ Tainnasuŋaiññaq pisuuruq, nakuurualiqisukkaluaqama piḷaitkiga, aglaan pigiitchualiqiruŋa.

²² Nutauruami iñuutchimñi, nakuaġigaluaġitka God-im pitquraŋi,

²³ aglaan iḷisimaruŋa uvamni ittuq alla suaŋŋan aŋuyaktuaq pitchaiḷiraġnikłuni uvamnik nakuurualiqitchaiḷivḷuŋa, kivgaupkaqłuŋa piḷuutimnun.

²⁴ Qanutun uvaŋa quviasuŋisigivik? Kia atanġiqsinniaqpaŋa piḷuksisuguuruamiñ iñuutchimñiñ?

²⁵ Quyyavigigiga God atanġiqsinmaŋa Jesus Christ-kun Ataniptigun. Tavraasii nutauruami iñuutchimñi kamagisukkitka God-im pitquraŋi, aglaan piḷuksisuguuruam iñuutchima piḷuksipkaġuugaaŋa.