Romans 6 - Iñupiatun Mumiksat Uqalugiksuat

Iliñiq Tuquŋaruatun Piḷuunmun Aglaan Iñuuvluni Christ-mi

¹ Taamna tainnainman, piḷuusiqiugaqtuksrauŋitchugut uuktuġniaqsiññaġlugu qanutun God nagliktuutiqpaqaqtilaaŋa.

² Piḷuusiqiruksrauŋipiaġataqtugut. Ukpiliqapta Christ Jesus-mun, iñuutchivut piḷuksisuguuruat tuqummatun piut. Taamna pisigilugu piḷuusiqiugaqtuksrauŋitchugut.

³ Iḷisimarusi iluqata paptaiqsaukapta, Atausiŋŋuqatauŋarugut Christ Jesus-mun. Aasii ilaa tuqumman, uvagut piḷuksisuguuruat iñuutchivut tuqummiut.

⁴ Tavra paptaiqsaukapta, piḷuktuat iñuutchivut iḷuviqataummatun piŋarut ilaa tuqumman. Aasii Christ-tun aŋipkaqtauruatun tuqqunmiñ suaŋŋataagun Aapam, uvaguttauq aitchuusiaqaŋammiugut nutauruamik iñuggunmik, aasii iñuuruksraurugut taavrumuuna nutauruakun iñuutchikun.

⁵ Tavra atausiŋŋuqatigiŋaguptigu tuqqutaani, nalupqinaitchuq atausiŋŋuqatiginiaġmigikput aŋŋisaani.

⁶ Iḷisimarugut ilaa kikiaktuurraumman uvagut piḷuksisuguuruat iñuutchivut kikiaktuurrauqatauŋarut ilaanun, piḷuunmun aŋalanŋaiquvluta, kivgauŋaiquvluta piḷuunmun.

⁷ Iñuk tuqukami, aŋalatinŋaiġuuruq piḷuunmun.

⁸ Piqatauŋaniqapta Christ tuqqutaani, ukpiqtugut piqatauniaqtilaaptiŋnik iñuusianun Christ.

⁹ Qanuq iḷisimarugut Christ aŋipkaqtauganikami tuqqunmiñ, tuqutqikkumiñaipiaqtuq, tuqqutim atanniqsimatqikkumiñaitkaa.

¹⁰ Christ tuqukami, tuquŋaruq atausiaqłuni, akiḷiġukługich piḷuutivut. Paŋmapak iñuuruq, iñuutuiññaqłuni God-mun.

¹¹ Ilivsiḷiasii isummatigiruksraurusi ilivsiññik tuquŋaruatun iḷiḷusi piḷuunmun, aŋalatinŋaiġḷusi piḷuunmun, aasii iñuulusi God-mun, qanuq atausiŋŋuqatigiŋagiksi Christ Jesus.

¹² Piḷuunmun aŋalatinnasi. Kamaginagich pigiitchuat pisuguutisi.

¹³ Atuġnagu sulliñipayauraŋa timivsi piḷuusiqutigisuglugu. Aglaan God-im aŋalallisi qanuq tavraŋŋaaglaan aŋalatinŋaiŋarusi piḷuunmun iñuusarraqsikavsi God-mun. Aŋalatitchiuŋ sulliñipayauraŋa timivsi God-mun, nalaunŋarualiqiyumausi.

¹⁴ Piḷuutim aŋalataġiŋaiġñiaġaasi, qanuq iñuuŋaiŋarusi kamaginiataglugich pitqurat, aglaan iñuurusi God-im nagliktuutiqpaŋagun.

Kivgauniq Nalaunŋarualiqiniġmun

¹⁵ Taamna tainnainniġman, piḷuksiñata pisigilugu iñuuniqput God-im nagliktuutiqpaŋagun, kamaksriñiatagniġmiñ pitquranik qaisauruanik Moses-kun. Piḷuksiruksrauŋipiaġataqtugut.

¹⁶ Iḷisimarusi nalliqsi kivgaliutiniġumi kimulliqaa, kamagiraksraġigaa kivgatun. Tainnatulli ilivsi piḷuunmun aŋalatitkuvsi kivgaummatun piḷuunmun inniaġmiusi, tasammaasii tatavsaqtaulġiñaġlusi isuitchuamun. Aglaan aŋalatitkuvsi kamagisuglugu God, nalaunŋaruaguniaqtusi ilaan sivuġaani.

¹⁷ Tavra God quyyavigirauli, qanuq paŋmapak kamaksripialiqsusi uummativsiññiñ taavrumiŋa iḷisaurrutaanik God-im iḷisausiavsiññik, kivgausuuŋagaluaqtuasii piḷuunmun.

¹⁸ Annaktitauganikłusi piḷuunmiñ, kivgaġuqtusi iłuatun iñuuniaġniġmun sivuġaani God-im.

¹⁹ Uqautisaaqsigivsi uuktuusiġḷuŋa kivgauniġmik, kaŋiqsimmaġiksitquvlusi. Taimani aitchuutigisuuŋagaluakkasi timivsi sulliñipayauraŋich piḷuusiqiniġmun suli kamasuutaiqsaiññaġniġmun, tavrali paŋmapak aitchuutigisigik timivsi sulliñipayaaŋi nalaunŋaruakun iñuuniaġniġmun ilaaguaqtauyumausi God-mun.

²⁰ Kivgausuuŋŋavsi piḷuunmun, aŋalataġipkaŋaitchusi iñuuniaġniġmun nalaunŋaruamun sivuġaani God-im.

²¹ Tainnatchim iñuutchim paŋmapak kanŋugilikkavsi anniqsuŋaitkaasi aglaan tatavsaqtaupkaġumiñaġaasi isuitchuamun.

²² Paŋmapak-aasii atanġiqsitaurusi piḷuunmiñ kivgaliutivlusi God-mun, anniqsuusiaqaġniaqtusi ilaaguaqtauniġmik iñuggunmiglu isuitchuamik iñuutqulusi God-mun.

²³ Kiñaliqaa piḷuusiqirauruaq akiḷiusiaqaġniaqtuq tatavsaqtauluni isuitchuamun, aglaan God-im akiiḷaaq aitchuutigigaa iñuggun isuitchuaq tamatkunuŋa atausiŋŋuqatauruanun Christ Jesus-mun.