Romans 5 - Iñupiatun Mumiksat Uqalugiksuat

Nalaunŋasiñiq God-mun

¹ Paŋmapak aŋuyautaiqsugut God-mun qanuq ukpiqtugut Atanipta Jesus Christ nalaunŋasipkaŋagaatigut sivuġaani God.

² Pisigivlugu Jesus, God nagliktuutiqpaqaqsimaaqtuq uvaptiŋnun, aasii quviasuktugut niġiugivlugu iḷaŋiutiniksraqput God-im kamanautaanun.

³ Aasiisuli quviasugmiugut nagliksaaqaptaunnii, iḷisimavluta nagliksaaġunmun qiñuiqsaiññaqtitchumiñaqtilaaptiŋnik,

⁴ aasii qiñuirrutiqaqtuiññaġupta nagliksaaqapta, iḷumun ititkikput ukpiqtuagutilaaqput. Niġiuktugut suli iḷaŋiutiniaqtilaaptiŋnik God-im kamanautaanik.

⁵ Niġiukkurvut asiḷiqqutauŋitchuq. Ilitqusiġiksuam iḷuptiŋniittuam nalupqinaiŋagaa uvaptiŋnun iḷisimapkairuam uvaptiŋnik qanutun God-mun piviuttaġipiaġataqtilaaptiŋnik.

⁶ Uvaptiŋnik ikayuġumiñaipiaqtilluta, piviksraq nalautinman, Christ tuqqutiŋagai piḷuusiqiripayaurat.

⁷ Qanutun iñuk nakuutigigaluaqtillugu nallivsaunnii tuqqutisuŋniaŋitkaa. Iḷaannivsauq iñuum imma tuqqutiyumiñaġugnaġmigaa iñulluataq.

⁸ Naaggauvva piḷuusiqiraugaluaqtilluta, Christ tuqqutiŋagaatigut, aasii taavrumuuna God-im salapqiġaa piviuttaqqutini uvaptiŋnun.

⁹ Tavra nalaunŋasipkaqtaukapta paŋmapak Christ auŋagun, nalupqisuŋipiaqtugut Christ-mun annautiniaqtilaaptiŋnik God-im qinnautaaniñ.

¹⁰ Christ iḷauraaliuŋagaatigut God-mun tuqqutivluta, uumikłiġaluaqtilluta ilaanik. Tavraasii paŋmapak God-im iḷauraaġiliutimmatigut, Christ nalupqinaitchuamik annautiniaġaatigut, qanuq ilaa iñuuruq.

¹¹ Taamnatualuuŋiñmiuq, quviakkiutigikput God Ataniptigun Jesus Christ-kun, iḷauraaliuqtuakun uvaptiŋnik God-mun.

Adam-lu Christ-lu

¹² Una pisigivlugu iñupayaat piḷuksiŋarut aasii tuquvlutiŋ. Adam iñuqqaaq piḷuksiŋaruq aasii aquvatigun tuquŋaruq. Adam kiŋuniġivlugich iñupayaat, iluqaġmiŋ piḷuksiŋarut aasii tuquruksraġuqłutiŋ.

¹³ Iñupayaat iñuuŋaruat Moses aitchuusiaqaŋaiñŋaan God-miñ pitquranik piḷuusiqirauŋarut, aglaan pasirauŋaitchut piḷuunmikkun qanuq piqaŋił̣ł̣utiŋ God-im pitquraŋiñik.

¹⁴ Tavra iñupayaat Adam-miñqaŋa Moses-munaglaan tuquŋarut Adam tuvraqługu kipuqłaktaŋitkaluaŋŋaisa God-im pitquraŋi. Tuqummiut qanuq piḷuusiqirauvlutiktauq. Adam tuqqunmik pipkaimman, Christ-li aquvatigun qairuaq iñuggutiqaqtitchiruq.

¹⁵ God-im nagliktuutigivlugu aitchuutaa akiḷḷiuruq Adam kamaksriŋiññiŋanun. Iñuich tuquŋarut qanuq Adam piḷuksiŋaruq. Taavrumaŋŋa pił̣haaqtuq, iñuich nalaunŋasipkaqtauyumiñaqtut akiiḷaamik Jesus Christ-kun, qanuq God nagliktuutiqpaqaŋaruq iliŋiññun.

¹⁶ Tavra akiiḷaaq aitchuun Christ-kuaqtuaq akiḷḷiuruq Adam piḷuutikun iñiqtaŋanun. Qanuq Adam piḷuutaa pipkaiŋaruq isivġiunmik suksraunġiunmiglu, aglaan akiiḷaaq aitchuun, iñugiaktuat piḷuksianiŋmata, nalaunŋasipkairuq iñuŋnik God-im sivuġaani.

¹⁷ Pisigivlugu Adam piḷuksimman, tuqqun umialiktun atanniqsimanniŋaruq iñupayaanik. Taavrumaŋŋa pił̣haaqtuq, iñuich akuqtuiruat nalaunŋasipkaunmik God-im nagliktuutigivlugu aitchuutaanik, iñuullaniaqtut umialiktun, atanniqsimalugu piḷuun ikayuutaagun Jesus Christ.

¹⁸ Tavra iñuum atautchim piḷuksisaata qaġġisimmagu suksraunġiun iñupayaanun, tainnalivsauq iñuum atautchim kamaksriñiŋata God-mik, qaġġisigaik suliqutigiŋaiqsauniġlu piiguġumiñaqsivḷugich piḷuutit iñuggullu iñupayaanun.

¹⁹ Qanuq iñuum atautchim kamasuŋirrutaagun iñuich piḷuusiqiriġuġmata, tainnaptauq iñuum atautchim kamaksriñiŋagun, iñuich nalaunŋasipkaqtauyumiñaqtut.

²⁰ God-im aitchuutigimmagich pitqurani Moses-kun, iñuich iḷitchuġivsaaŋarut piḷuun kamaksriŋirrutautilaaŋanik God-im pitquraŋiñik. Tavra kamasuŋirrun aglimman, tainnatuttauq God-im nagliktuutiqpaŋa aglił̣haaŋaruq.

²¹ Tavra piḷuun atanniqsimanniŋman iñuŋnik tuqqutauvluni, God-ivli nagliktuutiqpaŋa atanniqsimanniktuq iñuŋnik iñuupkallavlugich isuitchuamun qanuq Atanipta Jesus Christ nalaunŋasipkaŋagai.