Romans 3 - Iñupiatun Mumiksat Uqalugiksuat

¹ Tamatkua tainna itpata, sumik anniqsuusiaqaqpa Jew-guniq? Sumik anniqsuusiaqaqpa piqaġniq God-im nalunaiñŋutchiutaanik?

² Atqunaq anniqsuusiaqaġnaqtuq Jew-guniq. Sivulliġmi, God-im aitchuŋagai Jew-guruat aglausimaruanik pitquranik Moses-kun.

³ Jew-guruat iḷaŋich ukpiġutaitkaluaqpata kamagilaiḷḷugich God-im pitquraŋi, ukpiġutairrutaata God taŋŋiipkaġumiñaitparruŋ unniqsuqłiisiŋiñik tamatkunuŋa ukpiqtuanun?

⁴ Naaggapiaġataq. Iñupayaaq saglusuugaluaġniqpan, God sagluyumiñaitchuq. Bible-ni aglausimaruq God-ikun inna, “Nalaunŋasuurut uqaluktin iñuich unnii uqaġaluaġmata nalaunŋiññivḷutin pisaaŋavlutin.”

⁵ Iñuich iḷaŋich killukun uqaġuurut inna, Uvagurguuq piḷuksigupta, tautuktinniaġivut iñuich God-im nalaunŋataanik, tavraasii uqallakłutiŋ nakuuniḷugu piḷuksiruni. Tavrasuligguuq God killukuaġniqsuq tatavsaqamisigut.

⁶ Tavra tamatkua uqaqtuat tainna killukuaqtut qanuq nalupqinaitchuq iḷisimarugut God-im isivġiġñiaġai nunam iñuŋi piḷuktuat.

⁷ Uvaŋaptauq killukuaġmiuŋa uqaqama inna. Sagluniġma iñuich qiñiqtillakpagich God-im iḷumun irrutaanik aasii nanġaġlugu, pasiyumiñaitkaaŋa piḷuusiqirauniḷuŋa.

⁸ Taamna iḷumun inniqpan, piḷuusiqiugaqta iñuŋnun nanġavsaaqulugu God. Iḷisaurriŋitchuŋa tainnatchiñik saglunik. Aglaan iñuich iḷaŋisa uqautigiŋagaanŋa tainnatchiñik iḷisaurriñivḷuŋa. Taapkua iñuich God-im isivġiġñiaġai nalaunŋaruakun.

Iñuŋmik Nalaunŋaruagitchuq

⁹ Taapkua uqautigianikaptigik uqallakkumiñaqpisa Jew-guruat nalaunŋałhaaġniḷugich allaniñ iñuŋniñ? Naaggapiaġataq. Iḷitchuġipkaaniŋagivsi iñupayaurat Jew-gugaluaġumiŋ Jew-guŋitkaluaġumiŋ, aŋalatiqaqtut piḷuunmik.

¹⁰ Bible-ni aglausimarut uqaluich inna, “Iñuitchuq nalaunŋaruamik, atausiuramikunnii nunam iñupayauraŋi.

¹¹ Iñuŋmik piitchuq atausiuramikunnii kaŋiqsiruamik naagga kaŋiqsisuktuamik God-mun qanuq iñuutqutilaamiñik.

¹² Iñupayaat asivaŋarut nalaunŋaruaniñ apqutiniñ, aasii tammaqłutiŋ piḷuunmi. Iñuitchuq nalaunŋarualiqiruamik atausiuramikunnii.

¹³ Uqaluŋich salumaitchut tivluktigiruġlu tipaatun aŋmaruam iḷuvvivium. Saglutupiaġataqtut. Nimiġiatun tuqunamik qaniġmiutaqaqtuatun, uqaluŋmiŋni tainnatun ittut.

¹⁴ Siḷivinŋarut uqamaqłuutinik qinnaŋaruaniglu uqaluŋnik.

¹⁵ Iñuaqsayarut.

¹⁶ Sumun aullaqamiŋ, maqutchirut iłuiḷḷiuqtitchirullu.

¹⁷ Nalurut aŋuyautaiññiaġniġmik.

¹⁸ Aŋalanŋitkai qiksiksrautim God-mun.”

¹⁹ Paŋmapak iḷitchuġirugut pitquraŋi God-im qaisaŋi Moses-kun aŋalatchirut iñuŋnik aitchuusiaqaqtuanik pitquranik. Tavraasii, kiñaliqaa patchisiksraqaġumiñaitchuq kamaksriŋiññiġmigun pitquranik, suli nunam iñupayaaŋa pasikkusiaqaġniaqtuq God-miñ.

²⁰ Kiñaliqaa nalaunŋarualiyumiñaitchuq inmiñik sivuġaani God-im, kamagiugaġniḷugich pitquraŋi God-im ataramik, qanuq pitqurat iḷisautigiññaġaatigut qanutun piḷuktilaaptiŋnik.

Qanuqłuni God-im Nalaunŋasiḷḷagai Iñuich

²¹ Aasii paŋmapak God-im salapqiŋagaa qanuq iñuk nalaunŋasiyumiñaqtilaaŋanik sivuqqamiñi, pitqurat piqutigiŋaiġḷugich. Uqaqtiŋisa God-im Bible-ni iŋiḷġaan uqautigiŋagaat taamna nalaunŋasiñiq sivuġaani God-im.

²² Taamna nalaunŋasipkaun qairuq ukpiġutikun. Iñupayaaq ukpiqtuaq Jesus Christ-mun nalaunŋasipkaqtauniaqtuq sivuġaani God-im. Iñuich iluqaġmiŋ atirut,

²³ qanuq iñupayaat piḷuksiŋarut aasii God-im nanġaġumiñaitkaa kiñaliqaa nalaunŋaniḷugu.

²⁴ Tavraasii, nagliktuutiqpaqaqłuni, God-im nalaunŋasipkaŋagai iñupayaat akiiḷaamik. Ilaan tiliŋagaa Christ Jesus akiḷiquvlugich piḷuutipayaurat tuqulugu aŋarraurami.

²⁵ God-im tiliŋagaa Jesus tuqutquvlugu aasii maqipkaġlugu auŋa akiḷiqsaġlugich piḷuutiŋich iluqaġmiŋ ukpiqtuat inmiñun. Taamna piŋagaa salapqiġukługu nalaunŋatini suliqutigiŋaiqsiñiġmigun piḷuutinik, piḷuusiqiaŋiññik-unnii iñuich Christ tuquŋaiñŋaan. God-im tatavsaŋaitkai tavrauvvaa manimmiḷgutiqaqłuni.

²⁶ Tavra paŋmapak God-im salapqiġaa nalaunŋatilaani suli nalaunŋasipkallatilaaŋanik kiñaliqaa ukpiqtuaq Jesus-mun.

²⁷ Tainnainniġman, uqavigaaġutiksraipiaqtugut qanuq nalaunŋasiyumiñaitchugut kamagilugich God-im pitquraŋi. Nalaunŋasipkaqtaurugut ukpiġutiptigun,

²⁸ qanuq iḷisimarugut iñuk nalaunŋasipkaqtautilaaŋanik ukpiġutaagun Christ Jesus-mun. Iñuk nalaunŋasipkaqtaulaitchuq kamaginiḷugich pitqurat.

²⁹ God Jew-guruat kisimik God-igiŋitkaat. God-igimmigaat Jew-guŋitchuat.

³⁰ Atausiuniġman God, ilaan nalaunŋasipkaġniaġai iñupayaat pisigilugu ukpiġutaat, Jew-guruallu Jew-guŋitchuallu.

³¹ Nalaunŋasipkaqtaullaniqapta ukpiġutiptigun, sivuniqaŋipiaġataqtuq kamagiraksraiġñiḷugich God-im pitquraŋi qaisaŋi Moses-kun. Aglaan paŋmapak ukpiliqapta Jesus-mun, kamagiyumiñaġivut pitqurat.