Romans 16 - Iñupiatun Mumiksat Uqalugiksuat

Paul Paġlagai Ukpiqtuat

¹ Paġlatqugiga ilivsiññun aniqatikput Phoebe, aġnaq tiikauruaq aŋaiyyuliqiruani Cenchrea-mi,

² akuqtuġumagiksi akuqtuisikaavsisun kisunik allanik ukpiqtuaguruanik Ataniġmi, ilaaguaqtauŋaruanik God-mun. Ikayuġumagiksi supayaamik piqaqtuksraukpan, qanuq ilaan ikayuŋammigai iñugiaktuat iñuich, uvaŋalu iḷagivluŋa.

³ Paġlasigik Priscilla-lu Aquila-lu ikayuqtikaaka savaurriñiġmi Christ Jesus-mik,

⁴ anayasaaġaluaġuugaak iñuggurrik iñuuliñiaqłuŋa. Taamna pisigivlugu, uvaŋalu iluqaġmiglu aŋaiyyuliqiruat Jew-guŋitchuat quyanaaġivut.

⁵ Paġlasigiktauq aŋaiyyuliqiruat igluagniittuat. Paġlasiuŋ piviuttaġikkaġa Epaenetus, ukpiqtuaġuqqaaŋaruaq Christ-mun Asia-mi.

⁶ Paġlasiuŋ Mary siġġaqiŋaruaq akunnavsiññi.

⁷ Paġlasigik Andronicus-lu Junia-lu, nanmiñiq iḷaka, sivuaniḷu tigutaaqtauqatigiŋakkaka. Nuimaruk akunġanni God-im tiliraŋisa, suli ukpiqtuaġuŋaruk uvaŋa sivumni.

⁸ Paġlasiuŋ Ampliatus, ukpiqtuaguqatiga piviuttaġivlugu.

⁹ Paġlasiuŋ Urbanus, savaqatikput Christ-mun, piviuttaġiraġalu Stachys.

¹⁰ Paġlasiuŋ Apelles manimmisiqaŋaruaq ukpiqtuagulluataqłuni Christ pisigivlugu. Paġlasigik igluqatigikkaŋi Aristobulus-gum.

¹¹ Paġlasiuŋ nanmiñiq iḷaga Herodion. Paġlasigik ukpiqtuaguruat Ataniġmun Narcissus igluqatiŋi.

¹² Paġlasigik Tryphaena-lu Tryphosa-lu savaktauruak Ataniġmun. Paġlasiuŋ piviuttaġirauruaq Persis siġġaqivluni savaurriŋaruaq Ataniġmik.

¹³ Paġlasiuŋ Rufus ukpiqtuagulluataqtuaq. Paġlasiuktauq aakaŋa, aakaummatun inmiruaq uvamnun.

¹⁴ Paġlasigik Asyncritus-lu Phlegon-lu Hermes-lu Patrobas-lu Hermas-lu aniqativullu tavrani ittuat.

¹⁵ Paġlasigik Philologus-lu Julia-lu Nereus-lu aniqataalu aġnaq, Olympas-lu iluqaisalu ilaaguaqtauruat God-mun tavraniittuat.

¹⁶ Paġlatisitchi avanmun paġlatikaaŋannik ukpiqtuaguruat. Iluqaġmiŋ aŋaiyyuliqiruaŋisa Christ-gum paġlagaasi.

Paul Siḷġiqsuutiŋi

¹⁷ Aniqatiit, qaunagipiaġataqugivsi iñuŋnik qanaaġuksautausuuruanik, atiŋirrutiksriuġuuruaniglu, akiḷḷiḷiqsuisuuruanik iḷisausiakaavsiññik. Tainnatchiñiñ niguaqtuġumausi.

¹⁸ Qanuq tainnatchit iñuich savautiŋitkaat Ataniqput Christ, piñiaqsiññaqługu ilaisa pisukkaqtiŋ. Uqayuqsaaġutitigun, uqayutchiñiaġutitigullu sagluqinniguurut iñuŋnik iḷisimavigruaŋitchuanik iḷumun ittuamik.

¹⁹ Iñuich iluqaġmiŋ tusaaganiŋarut qanutun kamaksriŋatilaavsiññik God-im uqaluŋiñik, aasii taamna pisigivlugu quviasuktuŋa. Iḷisimalluataqugivsi sum nakuutilaaŋanik, iḷaksiayumiñaiġḷugu suna pigiitchuaguruaq.

²⁰ Tainna iñuusiqaġuvsi, God-im aŋuyautairrutiqaqtitchiruam akiisinniaġaa Tuunġaq, ilivsiññun tunmalugimmatun siqumiłługu. Nagliktuutiqpaŋata Atanipta Jesus Christ itqatigilisi.

²¹ Timothy-m savaqanma paġlagaasi. Lucius-lu Jason-lu Sosipater-vlu nanmiñiima paġlammigaasi.

²² Uvaŋa Tertius, aglaktuaŋaa ukuniŋa tuyuutinik, paġlagivsi.

²³ Gaius-gum tukkuuruam uvamnun iluqaiññullu aŋaiyyuliqiruanun, paġlagaasi. Erastus-gum iniqpaum manniqiraata, Quartus-lu aniqatipta, paġlagaasi.

²⁴ [Nagliktuutiqpaqaġli Ataniqput Jesus Christ iluqapayauravsiññun. Amen.]

Aġiusaun Aŋaiyyutigivlugu Nanġaun God-mun

²⁵ Qaitkivsi God-im munaqqutaanun, suaŋasiḷaaġiḷḷaruamun ukpiġutivsiññik nalaułługu tusaayugaaġiksuat uqautaat, uvaŋa uqausivsun ilivsiññun. Taamna tusaayugaaġiksuaq Christ-kun kaŋiqsiñaiñŋaruaq aippaapak.

²⁶ paŋmapak salapqiŋaruq. Tusaayugaaġiksuat iḷisimanaqsiŋarut iñupayaanun, ukpiliquvlugich Christ-mun. Tavra taamna God-im uqaqtiŋisa aglautiŋakkaŋat, aasii taŋŋiutauruq isuitchuamun God-auruam piraksriutaanun.

²⁷ God, kisimi isumaturuaq, nanġaqtauli isuitchuamun Jesus Christ-kun Ataniptigun. Amen.