Romans 15 - Iñupiatun Mumiksat Uqalugiksuat

Iviġakkich Allat Iliŋnułhiñaŋiḷaaq

¹ Tavra uvagut suaŋaruaguut ukpiġutiptiŋni, qiñuiġḷuta ikayugaksraġigivut tamatkua suaŋaitchuat ukpiġunmiŋni, iviġagniaqsiññaŋaiġḷuta uvaptiŋnun.

² Atausiullaaluta iluqata iviġagniaġlavut siḷallivut anniqsuqsaġlugich, suaŋasiyumaut ukpiġunmiŋni.

³ Qanuq Christ inmiñun iviġagniaqsiññaŋaitchuq. Aglausimaruq Bible-ni inna, “Iñuich uqamaqłuktaqtuat ilipkun, Aapaaŋ, uqamaqłuktaġvigiŋagaanŋa uvaŋałhaaq.”

⁴ Iluqaġmiŋ aglausimaruat Bible-ni iŋiḷġaan, aglaagurut iḷisautisaqłuta qiñuirrunmik qapiŋaisaaqłutalu, niġiuquvluta iñuggunmik isuitchuamik.

⁵ God-im qiñuisitkaatigut quviasaaqłutalu. Aasii ilaan iñuupkaġlisi aŋuyautaiḷḷusi avanmun, nalaupiaġlugu Christ iñuutqutaa ilivsiññun.

⁶ Tainna iñuuguvsi, iluqasi atautchisun iñuktun nanġaġumiñaġniaġiksi God, Aapaŋa Atanipta Jesus Christ.

Tusaayugaaġiksuat Alġaqsruutaurut Jew-guŋitchuanun

⁷ Taamna pisigilugu, paġlatisitchi avanmun, tainnatuttauq Christ paġlaŋagaasi, God nanġausiaqaquvlugu.

⁸ Itqaumasiuŋ Christ kivgaliutiŋaruq Jew-guruanun, salapqiġukługu God-im ukpiġnaqtilaaŋa, suli taŋŋiqsaqługich unniqsuqłiisit God-im unniqsuqłiisigiŋakkaŋich maŋŋuŋiññun,

⁹ suli Jew-guŋitchuanun nanġaquvlugu God nagliktuutaagun. Taamna aglausimaruq Bible-ni inna, “Nanġaġniaġikpiñ akunġanni Jew-guŋitchuat, atuġluŋalu nanġautinik iliŋnun.”

¹⁰ Aglausimammiuq inna Bible-ni, “Ilivsi Jew-guŋitchuasii, quviasuqatigisigik iñuŋi God-im.”

¹¹ Suli aglausimammiuq, “Nanġaqsiuŋ Ataniq, iluqasi Jew-guŋitchuasii. Suli iñupayaurat nanġaġlirruŋ Ataniq.”

¹² Aglautiŋammigaa suli Isaiah-m inna, “Maŋŋuqaqtuaq Jesse-mik qaiñiaqtuq. Suaŋŋatinigniaqtuq aasii atanniqsimalugich Jew-guŋitchuat. Ilaa pisigilugu Jew-guŋitchuat niġiuktuaguniaqtut.”

¹³ Taavrumatuq niġiuksruiruam God-im, quviasuutiqpaqaqtillisi tutqiutiqpaqaqtillusiḷu ukpiqsimaaġnivsiññi. Tavraasii qapiŋasiñiaŋitchusi niġiuktuallavsi, qapiŋaisaaqtiqaqłusi Ilitqusiġiksuamik iḷuvsiññiittuamik.

Paul Taluqsraŋirrutaa Tuyuqami

¹⁴ Uvaŋa nalupqigiŋitkiga ilivsi iluqasi iñuuniaġluataqtilaaqsi iḷisimatilaaqsiḷu tamatkuniŋa sunik tuyuutimni uqautigikkamnik, iḷisaurriyumiñaqsivḷusiḷu allanik.

¹⁵ Aglaaġiŋagitka taluqsraiqł̣uŋa tamatkua itqaumayumiñaqsisaqługich ilivsiññun, qanuq God nagliktuutiqpaqaqłuni uvamnun,

¹⁶ alġaqsruiriġuŋagaaŋa quliaqtuaġitquvlugich tusaayugaaġiksuat Christ Jesus-kun Jew-guŋitchuanun. Aŋaiyyuliqsiqpaktun aitchuiruatun aitchuutinik God-mun tupiġmi aŋaiyyuviŋmi, tainnatun God-mun savaktauvluŋa aitchuimmiuŋa God-mun tamatkuniŋa Jew-guŋitchuanik, akuqtuiruanik ilaan tusaayugaaġiksuaŋiñik. Aasii iliŋich akuqtuġnaġumiñaqsiŋarut ilaanun, qanuq ilaaguaŋagai ilaanun Ilitqusiġiksuaŋata.

¹⁷ Savaqatauniqama Christ-mun, uqaqpagaaġutigiyumiñaġiga savaurriñiġa God-mik.

¹⁸ Qanuq uqavigaaġutigisuŋitkiga sunapayaaq uvaŋa savaaġiraġa, aglaan suna Christ-gum savaaġiŋaraŋa uvapkuaqługu, Jew-guŋitchuat ukpiqtillasivḷugich. Taamna piŋagaa alġaqsruiñipkun iñuulluataġnipkullu

¹⁹ aliuġnaqtuatigullu ukpiġnaqsiḷiqługu tusaayugaaġiksuaq, suaŋŋataagullu Ilitqusiġiksuam. Alġaqsruiŋaruŋa tusaayugaaġiksuamik Christ-kun sumiḷiqaa Jerusalem-miñ Illyricum-munaglaan.

²⁰ Alġaqsruiñiapiaġataqtuŋa tusaayugaaġiksuamik iñuŋnun quliaqtuaġurriqaŋaitchuanun Christ-mik. Alġaqsruisuŋitchuŋa allat iñuich alġaqsruivigiŋakkaŋannun qaŋapak.

²¹ Ikayuutausuktuŋa taŋŋiġñiksraŋannun aglausimaruat Bible-ni inna, “Tamatkua iñuich qaŋaunnii quliaqtuaġurriqaŋaitchuat, quliaqtuaġurrauniaqtut, suli iñuich qaŋaunnii tusaaŋaitchuat ilaanik, iḷitchuġiniaqtut ilaanik.”

Paul Rome-mugumaalliqsuq

²² Tavra taamna pisigivlugu qaiñaiḷutaġa ilivsiññun.

²³ Aasii paŋmapak alġaqsruiviksraiġutikama makkunani nunaaqqiñi, suli iñugiaktuani ukiuni ullakkumaalġataŋagaluaqavsi,

²⁴ tautugumalaaġivsi nalaullusi Spain-muksaġuma. Ikayuquyumaruŋa ilivsiññun iglauniksramni takuruutillaqqaaġluta sivikitchuami.

²⁵ Paŋmapak-aglaan uvva, Jerusalem-muŋniaqtuŋa manniraġluŋa ikayuutiksranik ukpiqtuanun.

²⁶ Qanuq ukpiqtuat Macedonia-mi Greece-miḷu nagliktuutiqaŋarut iḷiappauruanun ukpiqtuanun Jerusalem-miittuanun, aitchuivḷutiŋ ikayuġukługich.

²⁷ Iviġaumagiŋagaat tainna pigumiŋ. Suli piyummatigiłhaaŋagaat akiiḷaqtuqtuaguvlutiŋ iliŋiññun, qanuq Jew-guŋitchuat aitchuusiaqaŋavlutiŋ annaunmik Jew-guruatigun, Jew-guŋitchuat ikayugaksraġigaich Jew-guruat tuyuġlugich maniŋñik.

²⁸ Tavraasii taamna pianikkupku, qaisanikkupkich maniich iliŋiññun, Spain-mun iglausaġniaqtuŋa nalaullusi.

²⁹ Iḷisimaruŋa ullakkuvsi anniqsuusiaqaġniaqtusi, qanuq ukpiġurri Christ-mun suaŋasiḷaaqtauniaqtuq.

³⁰ Aniqatiit, atausiŋŋuqatauŋarusi Christ-mun, suli Ilitqusiġiksuam piviuttaqqutipkaġaasi avanmun. Taamna tainnainman, apiġipiaġataġivsi aŋaiyyutipiaġataquvluŋa God-mun,

³¹ annaurrautquluŋa ukpiŋaitchuaniñ Judea-mittuaniñ, taapkualu aitchuutit ukpiqtuanun Jerusalem-mi akuqtuqulugich.

³² Tavraasii ullagniaġivsi quviasugluŋa, Atanġum pisuutigikpagu, aasii qapiŋaisaaġusiaqaġluŋa ilivsiññiñ.

³³ God-im aitchuiruam tutqiunmik itqatigilisi iluqasi ataramik. Amen.