Romans 14 - Iñupiatun Mumiksat Uqalugiksuat

Isivġiġñagu Aniqatin

¹ Kiñaliqaa suaŋaitkaluaŋŋaan ukpiġutaa, paġlasiuŋ aŋaiyyuliqiruat kasimaniŋannun. Uqavaaqatigisuŋaġnagich sunik ukpiġiraqaġniŋat.

² Iñuich iḷaŋich ukpiqtut niġiḷḷanivḷutiŋ qanusiḷimaanik niqipianik. Allattauq iñuich suaŋaitchuat ukpiġunmiŋni isumaqaqtut God-mun akuqtuġniaġnivḷutiŋ pisigilugich niqigikkatiŋ ukpiġunmiktuttauq, naurianik aasii kisianik niqiqaqłutiŋ.

³ Iñuich niġiḷḷaruat qanusiḷimaanik niqinik isummatiginatiŋ nalaułhamaaġasugalutiŋ nauriałhiñanik niqiqaqtuaniñ. Aasiivsauq iñuich nauriałhiñanik niqiqaġumiŋ, uqallausiġinagich qanusipayaanik niġiḷḷaruat killuliqiniḷugich, qanuq God-im akuqtuŋammigai.

⁴ Kiñaliqaa nalaunŋaruamik uqallakkumiñaitchuq iñuum allam kivgaŋa killuliqinigumiuŋ. Ilaan nanmiñiq atanġata nalaunŋarualiñiaġaa naagga killuliqirualiñiaġaa. Isivġiqsiqaġniaqtuq Ataniġmik nalaunŋarualiḷugu, qanuq God-im ikayuġniaġaa nalaunŋarualiqiyumiñaqsiḷugu.

⁵ Iñuich iḷaŋich isumaqaqtut uvlut nalunaiqsaŋich Jew-guruat, aŋaiyyuniksrauvlugich nakuułhaaġnivḷugich allaniñ uvluniñ. Allalli isumaqaqtut uvlupayaurat atinivḷugich aŋaiyyuvigiruni Ataniq. Iñupayaaq piḷi, nalupqisuŋaiġḷuni nalaunŋarualiqitilaamiñik.

⁶ Iñuich aŋaiyyuruat Ataniġmun nalunaiqsauruani uvluni, aŋaiyyurut nanġaġukługu Ataniq. Iñuich niġiḷḷaruat qanusipayaanik niqinik, niġirut iviġagniaqługu Ataniq, qanuq quyyavigigaat God niqitiŋ quyyatigivlugich. Aasiivsauq iñuich niqiqaqtuat naurianik kisiŋiññik, niġimmiut iviġagniaqługu Ataniq, qanuq iliŋisa quyyavigimmigaat God niqimikkun.

⁷ Iñuuruksrauŋitchugut iviġagniaqsiññaġluta uvaptiŋnun, suli tuquyumiñaiñmiugut isumapianiaptiktun.

⁸ Iñuuŋŋapta iñuurugut iviġagukługu Ataniq, suli tuqugaluaġmigupta, tuquniaġmiugut ilaan pisuutaagun. Tavraasii iñuugaluaġupta naagga tuqugaluaġupta, Atanġum pigigaatigut.

⁹ Taamna pisigivlugu Christ tuquŋaruq suli aŋivḷuni tuqqunmiñ, ilaa Ataniġitquvluni uvaptiŋnun iñuuŋŋapta tuquguptalu.

¹⁰ Uqalliaruksrauŋitchusi aniqatisi killukuaġniḷugich, aasiiḷivsauq ilivsi uqalliaruksrauŋiñmiusi nalaułhaaġniḷusi aniqatiivsiññiñ. Iluqata makittuksrauniaqtugut God-im isivġiivianun iñuŋnik.

¹¹ Sivuniġivlugu taamna aglausimaruq Bible-ni inna, “Nalupqinaisilaaŋatun iñuutilaaġma, uqallaktuq Ataniq, iñupayaat punniaqtut sivuqqamnun, aasii iñupayaat nanġaġniaġaanŋa God-auniḷuŋa.”

¹² Tavra iluqapayaurapta uqaġviginiaġikput God qanuq piŋatilaaptiŋnik iñuuŋŋapta.

Piḷuksipkaġnagu Aniqatin

¹³ Tamatkua tainnainniġmata, tavraŋŋaaglaan aniqatiivut uqausiġiŋaiġḷavut killukuaqtaġniḷugich, aglaan qaunagiłhaaqta agvisausuŋiḷḷuta aniqatipta piḷuksiñiksraŋanun.

¹⁴ Iḷisimaruŋa ukpiġunmalu Ataniġmun Jesus-mun nalupqisuktinŋitkaaŋa, sumik piisilaaŋanik killuliqutauyumiñaqtuamik niġiruni niqipiamik. Aglaan iñuk isumagumi killuliqiniaġasugaluni niġiruksrauŋitchuq, qanuq killukuaġutauniaqtuq ilaanun.

¹⁵ Niġiñiġuvich aniqarvich isummatigikkaŋanik niġiraksrauŋiññivḷugu aasii isumanŋutchakługu, piviuttaġiŋaiġñiġiñ aniqatin. Suksraunġiġñagu aniqatin Christ tuqqutiŋakkaŋa niġiḷutin isummatigikkaŋanik pigiitchuaguvlugu.

¹⁶ Suna piññagu iłuigutchautiginiakkaŋa aniqarvich, iḷisimaluġiñ unnii nalaunŋatilaaŋanik ilivich pigupku.

¹⁷ Qanuq naumaniqsraq ukpiqtuat aŋalatittuat God-mun, piraksraŋat niġikkaptiguaŋitchuq imikkaptigullu, aglaan iñuuluni nalaunŋaruakun, pigilugu aŋuyautairrun, quviasuullu Ilitqusiġiksuakun.

¹⁸ Iñuk savaurriruaq Christ-mik iñuuvluni tainna, God-im iviġaumagigaa, iñuiḷḷu iviġaumagimmigaat.

¹⁹ Tavraasii pisa supayaamik aŋuyautaiññaqtuamik sivunmuktuutauyumiñaqtuamiglu ukpiġunmun.

²⁰ Pisigigiññaġlugu niġiḷḷaniq qanusipayaamik niqimik, maqunnagu God-im savaaŋa. Killuliqutauŋiḷḷuqtuq unnii niġiñiq qanusipayaanik niqinik, killuliqutauruq allat piḷuksipkaġuvsigik niġikkavsigun.

²¹ Killukuaŋaruq niqipiaqtuqtuni taaŋŋiqiruniḷu suli supayaakkaluamik piuni piḷuksipkautauyumiñaqtuamik aniqatinun.

²² Qanusipayaamik ukpiġutiqaġuvich niġiñikun niqipianik, nalupqinaigilugu piyumautin iviġaktilaaŋanik God, uqavaaġutigiŋaiġḷugu avanmun. Quviasugli iñuk iłuigutchaŋitchuaq inmiñik sukun pikkaġmigun.

²³ Aglaan iñuk niġiruaq niqipiamik isummatigillaan killukuaġutaunivḷugu, piḷuksiruq, qanuq iñuuŋitchuq tuvraġlugu ukpiġikkani. Qanuq sunapayaaq piguptigu ukpiġikkaqput nalautkaluaġnagu piḷuutauruq.