Romans 12 - Iñupiatun Mumiksat Uqalugiksuat

Iñuusiq Savautivlugu God

¹ Tavra aniqatiit, God nagliktauniġman, qapiŋaisaaġivsi aitchuutigitquvlugich timisi God-mun. Iñuich aitchuimmatun niġrutinik ikipkautiksranik God-mun, aasii tamatkua niġrutit payaappauruksrauŋitchut akuqtuġnaġumiñaġniaġumiŋ, tavraliasii qapiŋaisaaġivsi aitchuutigitquvlugich timisi God-mun, iñuuruanik aitchuimmatun piḷuutaitchuanik akuqtuġnaġumiñaqtuanik ilaanun. Tainnauvva pikavsi, aŋaiyyuvigipiaġiksi God.

² Tuvraġnagich nunam iñuŋisa piḷġusiŋich. Aglaan isumasitchi nutauruanik isumanik iluqani iñuusiqsi allaŋŋuġumauq. Tavra iḷitchuġiniaqtusi nalupqinaiġḷugu suna God-mun pisuutigitilaaŋanik, suvlu nakuutilaaŋanik, akuqtuġnaġumiñaqtuamiglu God-mun, suli qanupiaġataq God-mun iñuutqutilaaqsi.

³ Alġaqsruirauvluŋa tiliraŋa God-im uqallautigivsi uumiŋa. Nalliqsiunnii piġuqtiġnani naumasiḷuni, aglaan isummatigisitchi ilivsiññik nalaunŋaruakun, isivġiġḷugu nalaunŋaruakun piḷḷakkaqsi, God-im aitchuutaa ukpiliqavsi Christ-mun.

⁴ Tavra atautchim iñuum timaa iñugiaktuanik sulliñiqaġmatun, aasii sulliñillaaŋi timim inmikkullaa atuġnaqłutiŋ.

⁵ Tainnatuttauq uvagut inmiugut. Iñugiakkaluaqłuta, timitun atautchisun ittugut, qanuq atausiŋŋuqatigiŋagikput Christ. Aasii avanmun anniqsuutigiiksuksraurugut.

⁶ God-im nagliktuutiqpaŋagun aitchuusiaqallarugut allakaaġiiñik aitchuusianik, tavraasii atuġlavut. Iñuk aitchuusiaqaġniġumi uqaqtauniġ mik God-mun, uqaqtuaġli tuvrapiaġlugu qanuq God-im puttuqsripkaqpani ukpiġunmigun.

⁷ Iñugli alla aitchuusiaqaġniġumi savaurriñiġmik allanik, savautiligich piyummatiqaġluni. Iñugli aitchuusiaqaġniġumi iḷisaurriñiġmik, iḷisaurriḷḷuataġli.

⁸ Allali iñuk aitchuusiaqaġniġumi siḷġiqsuiñiġmik, siḷġiqsuiḷḷuataġli. Iñuglivsauq aitchuusiaqaġniġumi maniŋñik aitchuiḷḷaluni, aitchuiḷi siŋñataiġḷuni, nanġausiaksraqsiuŋaiġḷuniḷu iñuŋniñ. Allalivsauq aitchuusiaqaġniġumi umialiŋnauniġmik aŋaiyyuliqiruanun, atanniqsimannigli piḷḷuataġluni. Iñuk aitchuusiaqaġniġumi nagliktauniġmik allanun, piḷiuŋ taamna quviasuutigilugu.

⁹ Piviuttaġisigik iñuich iḷumutun. Uumigisiuŋ pigiitchuaq, nakuurualiqillatusitchi.

¹⁰ Piviuttaqqutisitchi avanmun, aniqatigiich piviuttaqqutimmatun avanmun. Nanġaġumałhaaqsigik allat nanġausiaqałhaaġniġmiñ ilivsi allaniñ.

¹¹ Suuramikunnii iqiakkiutinagu savaaqsi, aglaan savautisiuŋ Ataniq piyumalaaġlusi.

¹² Quviasugitchi niġiugnivsiññi isuitchuamik iñuggunmik. Qiñuitchitchi iłuiḷḷiuġutiqpaŋmi. Aŋaiyyumaruagusitchi.

¹³ Ikayuqsigik iñuich piiḷḷiuqtuat ilaaguaqtauŋaruat God-mun, tukkuliiñiq piḷġusiġisiuŋ.

¹⁴ Apiġisiuŋ God nagligitqulugich tamatkua nagliksaaqtitchiruat ilivsiññik, apiqsrisiŋaiġḷugich God-mun tatavsaqulugich.

¹⁵ Quviasuqatigisigik quviasuktuat. Isumaaqatigisigik isumaaqtuat.

¹⁶ Iñuuniaqatigiigitchi atilusi avanmun, piġuqtiġnasi, aglaan piqasiqsuutisitchi kamasaaŋitchuanun. Isummatiginasi ilivsiññik iḷisimanasugalugich supayaurat.

¹⁷ Iñuum pimaqłukpasi, akisaġnasi pimaqłuunmik iliŋiññun. Iñuulluataġitchi iñuich iluqaġmiŋ iḷisimayumaut nakuutilaavsiññik.

¹⁸ Qanaaqatigitchaiḷiuŋ kiñapayaaq piyumiñaqtilaaqtun. Aguirrutaunak qanaaġutiksramun.

¹⁹ Piviuttaġirauruasii, akisautinasi ilivsiññik, aglaan God-im tatavsaġligich pimaqłuktairuat ilivsiññik, qanuq aglausimaruq Bible-ni, God uqallaŋaruq inna, “Nalaunŋaruamik piñiaqtuŋa. Uvaŋa akisaurriñiaqtuŋa.”

²⁰ Aglaan, “Pimaqłuktaqtin kaakpan, niġipkaġuŋ. Imiġukpan, imiqtirruŋ. Tainna piguvich, kanŋutchaktinniaġiñ pimaqłuktaiñiŋagun iliŋnik.”

²¹ Pigiitchuamun akiiḷipkaġnasi, aglaan pigiitchuaq akiiḷisiuŋ nakuurualiqilusi.