Romans 11 - Iñupiatun Mumiksat Uqalugiksuat

God-im Nagligigai Israel-guruat

¹ Apiqsriruŋa inna, God-im pisunġiŋavagich iñuŋni? Naaggapiaġataq. Uvaŋaptauq uvva Paul Israel-gummiuŋa, kiŋunġuvluŋa Abraham-mun, iḷauvluŋa maŋŋuqaqtuanun Benjamin-mik.

² God-im pisuŋaiŋaitkai iñuŋni iñuksraqtaani aullaqisaamiñqaŋa. Bible-ni uqaluich iḷisimaguvsigik qanuq Elijah-mun uqautiŋatilaaŋa God, iḷisimarusi ilaan uqallautiŋagaa God, pasivḷugich Israel-guruat uqallakłuni,

³ “Ataniiq, tuqunŋagaich uqaqtitin kisiŋŋuqłuŋa, siquminŋagaich iñuich ikipkaivikaaŋich aŋaiyyukamiŋ iliŋnun, aasiuvva uvaŋa kisiŋŋuqtauruaŋa, iñuktaġiniaqsaammigaanŋa.”

⁴ Tavra God-im kiuŋagaa, “Kisiŋŋuŋaitchutin. Piqaqtuŋa 7,000-nik iñuŋnik putinŋaisamnik aŋaiyyulutiŋ Baal-mun.”

⁵ Tavraptauq paŋmapak, iñugiaŋitchuanik Israel-guruanik iñuqaġmiuq God-im piksraqtaaŋiñik ukpiquvlugich, qanuq nagliktuutiqpaqaqłuni.

⁶ Tavra annaurrauniġmata God-im nagliktuutiqpaŋagun, annaurrauŋiññiqsut kamaginiḷugich God-im pitquraŋi. Annaurrauniqpata kamaksriñiġmikkun pitquranik piiññayaqtuq annaurrauniksramik nagliktuutiqpakun.

⁷ Paŋmapak uvva inna sut ittut. Iñugiagniqsrat Israel-guruat paqinŋaitkaat annaun ivakkaqtiŋ pitquratigun. Aglaan God-im iñuksraqtaaŋisa paqinŋagaat annaun. Iḷaŋiḷḷu kaŋiqsipkallaiqsitauŋarut.

⁸ Taamna nalaunŋaruq aglausimaruatun Bible-ni, “God-im makautaŋaaqsipkaŋagai, tainnaqłutiŋ taiguaġaluaqamisigik God-im uqaluŋi, kaŋiqsiḷaitkaich. Tusaagaluaġmikamiŋ Christ-kun, ukpiliḷaiñmiut. Tainnasuŋaiññaq aasii ittut paŋmapaŋmun aglaan.”

⁹ David suli uqallaŋammiuq Bible-ni inna, “Niqilluataŋisa allallu quviasaaġusiaŋisa sagluqilisigik isumallasiḷugich nalaunŋaniḷutiŋ inmiŋni God-mullu. Nalaunŋaruamik tatavsaqtauŋarut killuġmik isumaqaġniġmikkun.

¹⁰ Kaŋiqsiḷḷaigutilich ayauŋaruat tautuksiḷaiñmatun. Nagliksaaġutigilisigik piḷuutitiŋ iñuktun nanmaktuatun, uqumaitchuanik puuŋasivḷutiŋ.”

¹¹ Aasiuvva apiqsriruŋa uumiŋa apiqqunmik, Israel-guruat pisuŋiñmarruŋ Christ, taamna sivuniqaqpa God-mun pisunġiġñiḷugich Israel-guruat isuitchuamun? Naaggapiaġataq. Pisunġiqsauŋaitchut isuitchuamik. Aglaan pisuŋiñmarruŋ Christ, Jew-guŋitchuat annaurrauyugaqtut, Israel-guruat siŋñaliġḷutiŋ annaurrauyumaliquvlugich.

¹² Tavra Jew-guruat ukpiŋairrutaat anniqsuiŋamman annaunmik nunam iñuŋiñun, suli inuqsraġniŋat qaġġirriŋamman anniqsuiñiŋanik annautim Jew-guŋitchuanun, qanutułhaaq aŋitiginiaqtut anniqsuusiaksrat taimanigu Jew-guruat ukpiliqpatali Christ-mun.

Jew-guŋitchuat Annaurrauyumiñaqtut

¹³ Paŋmapagli Jew-guŋitchuasii uqautiniaġivsi. God-im tiliŋagaaŋa alġaqsruitquvluŋa Jew-guŋitchuanun aasii taamna katchuŋairrutigigiga God-mun tiliŋaniġa alġaqsruitquvluŋa,

¹⁴ tamatkua Jew-guqatitka siŋñaliġḷutiŋ iḷaŋich-unnii annaurrautquvlugich.

¹⁵ Pisuŋirrusiaŋat God-miñ sivuniqaŋaniġman nunam iñuŋiñun iḷauraaliuġunmik God-mun, qanutułhaaq aŋitiginiaqtuq quviasuun akuqtuqtaukpata. Aliuġnaqtiginiaqtuq iñuktun aŋipkaqtauruatun tuqqunmiñ.

¹⁶ Uvva urriqan. Jew-guruat nutauruanik palauvaksranik pikamiŋ, punnilivium igaaŋa atausiq aitchuutigisuugaat God-mun, tasammaasii tainna pikamiŋ akutaq iluqaan ilaaguaġmatun pigaat God-mun. Tainnatun Abraham punnilivium igaaŋatun ittuq, aasii iluqaġmiŋ kiŋuniŋi iluqaatun akutatun. Abraham God-im iñuginiġmagu, tainnatun kiŋuniŋi God-im iñuginiaġmigai. Tainnainmiuq napaaqtuq. Maŋŋua napaaqtum nakuukpan, tasamma qisiqsiutiŋi nakuummiut.

¹⁷ Israel-guruat qisiqsiutiŋisun napaaqtum olive-nik naurisuuruam ittut. Iḷaŋich kipirauŋarut ukpiŋił̣ł̣utiŋ. Aasiiḷi Jew-guŋitchuasii, qisiqsiutiŋisun taavaniġruiññaq nauruam napaaqtum, ittusi maŋuktatun qisiqsiutitun inaannun kipirauruat inaŋiquvlugich. Ilivsiasii aitchuusiaqaqtusi quviasaaġusianik God-im unniqsuqłiisiŋiñik Abraham-mun miqłiqtuŋiñullu.

¹⁸ Uqavigaaġutiginagu inaŋiġñiŋniqsi Jew-guruanik. Itqaumasiuŋ napaaqtum maŋŋuatun inŋitchusi, aglaan qisiqsiutiłhiñat. Nappatauŋitchusi napaaqtumun, aglaan napaaqtum nayummigaasi.

¹⁹ Uqallagniaġugnaqtusi inna, taipkua qisiqsiutit naviktauŋaniqsut illiqsaqłuŋa, nakuupayaaŋŋuġugnaġniqsuŋa.

²⁰ Qaunagisitchi. Itqaumasigik taipkua qisiqsiutit, Jew-guruat, naviktauŋarut ukpiġutaił̣ł̣utiŋ, aasii ilivsi ittusi ukpiġutiqaqłusi. Kamasaaġnasi aglaan qiksiksrautiqaġitchi God-mun.

²¹ Qanuq God-im kipiŋakpagich nutim qisiqsiutit, sivuniqaqtuat Jew-guruanik, qaunagisitchi iḷaanni kipiviaġmigaasi, Jew-guŋitchuasii.

²² Tamatkua iḷisimapkaġumiñaġaatigut God-im nagliktautilaaŋanik, nalaunŋaruakullu tatavsaiḷḷatilaaŋanik. Nalaunŋaruakun tatavsaqługich ukpiŋitchuat Christ-mun, aglaan nagliktuqłusi ilivsi, ukpiqsimaaġuraġniatuaġuvsi ilaanun. Tainna piŋisuaġuvsi, kipirauniaġmiusi.

²³ Jew-kkaluat unnii sivunmuuŋaiqpata ukpiŋairrunmiŋni maŋuktautqiḷḷarut napaaqtumun qanuq God suaŋŋatiqaqtuq maŋutqikkumiñaqługich napaaqtumun.

²⁴ Tavra ilivsi Jew-guŋitchuasii qisiqsiutitun ittusi kivratun taavaniġruiññaq nauruamiñ olive napaaqtumiñ, aasii maŋuktauruatun olive napaaqtumun iñuum qaunagikkaŋanun. Paŋmapak iñuurusi maŋuktauruatun napaaqtuġiksuamun, uniuqługu nutim piḷġusiq, qisiqsiutigipiaġataŋitkaluaqtillusi napaaqtuġiksuamun. Tainna pirauŋaguvsi nutim qisiqsiutauŋitkaluaqtillusi, qanutułhaaq God-im maŋutqikkumiñaqtigivagich nutim qisiqsiutiŋi nakuuruamun olive napaaqtumun, Jew-guruat, Abraham kiŋuniŋi.

God-im Nagligigai Iñupayaat

²⁵ Aniqatiit, kaŋiqsitqugivsi uumiŋa sivuani kaŋiqsiñaiñŋaruamik, kamasaaquŋił̣ł̣usi isumatuniḷusi. Iñugiałhamaaqtuat Jews paŋmapak akuqtuaġiŋitkaat tusaayugaaġiksuaq, taamna igliġniaqtuq Jew-guŋitchuat ukpiġumaaqtuat Christ-mun naatitchiaġilugich.

²⁶ Tavraasii iluqaġmiŋ Israel-guruat annaurrauniaqtut aglausimaruatun Bible-ni inna, “Annaurri qaiñiaqtuq Zion-miñ aasii piiġḷugu god-iliqiŋiññiq iluqaiññun Jacob kiŋuniŋiñiñ.

²⁷ Tavra piiġupkich piḷuutiŋich taŋŋiġñiaġiga sivunniuġutiga iŋiḷġaan taipkunuŋa iñuŋnun.”

²⁸ Paŋmapak iñugiagniqsrat Jew-guruat akiḷḷiḷiqsuġaat tusaayugaaġiksuaq Christ-kun, tainnainman akiḷḷiḷiqsuġaat God. Aasii taamna anniqsuutauruq ilivsiññun Jew-guŋitchuanun qanuq God-im aitchuutigiŋagai aitchuutini ilivsiññun Jew-guŋitchuanun. Aglaattauq Jew-guruat God-im piviuttaġigai pisigivlugich unniqsuqłiisini Abraham-mun Isaac-mullu Jacob-mullu.

²⁹ God-im aitchuikami aitchuutinik suli ququaqamigich iñuich, aŋiuqsiḷaitchuq uqaluŋmiñik aglaan taŋŋiġuugai unniqsuqłiisini.

³⁰ Qaŋauvlugu akiḷḷiḷiqsuutiŋagaluaqtuasii God-mun, aasii Jew-guruat pisuŋiñmatigik ilaan aitchuutini, God nagliksraliŋaruq ilivsiññik inaŋiutigivlusi Jew-guruanun.

³¹ Paŋmapak-aasii Jew-guruat akiḷḷiḷiqsuutirut aglaan imma uvlut iḷaŋanni iḷaŋiutiniaqtut God-im nagliktuutaaniñ ilivsiññun.

³² Qanuq God-im qiñiġai iñupayaat kamasuutaitchualivḷugich, sunauvva nagliksrautiqaġukłuni iñupayauranun.

God Nanġaqtauli

³³ Qanutun aliuġnaqtigiruamik God-iqaqtugut. Qanutun aliuġnaqtigirut ilaan isumattutaalu iḷisimmataalu nagliktuutiqpaŋalu. Qanuġlugu kialiqaa iñuum kaŋiqsiyumiñaitkaa God qanuq pimman summan tainna pisilaaŋanik, naagga qanuġluni iñuk kaŋiqsiyumiñaitchuq summan God-im sunik pisilaaŋiñik.

³⁴ “Qanuq kiñaliqaa iḷisimasiyumiñaitchuq God-im iḷisimatilaaŋatun, suli kialiqaa iḷayumiñaitkaa God-im kaŋiqsimmataa, qanuq God iḷisimaruq supayaanik.

³⁵ Aasiisuli kiñaliqaa aitchuiyumiñaitchuq God-mun paaqłiiyumiñaqsisaġlugu God inmiñun aquvatigun.”

³⁶ Qanuq God-im kisimi supayaat savaŋagai. Supayaat ittut suaŋŋataagun God-im. God-im savaŋaniġai kamanaqsiḷiqtausukłuni. Nanġaqtauli God isuitchuamun. Amen.