Romans 10 - Iñupiatun Mumiksat Uqalugiksuat

¹ Aniqatiit, uummatimniñ kipiġniupiaġataqtuŋa aŋaiyyuruŋalu God-mun, aŋaiyyutivlugich Jew-guruat aniqatiitka annaurrautquvlugich.

² Iḷisimaruŋa kipiġniuqłutiŋ savautigaat God, aglaan tuvraŋitkaat God-im uqautaa inmiŋnun.

³ Qanuq naluvlutiŋ God-mun iñuich nalaunŋasipkaġuutilaaŋat ukpiġutaatigun, inmiŋnik nalaunŋasiñiataŋarut sivuġaani God-im. Tavraasii nalaunŋasipkaqtinŋaitchut God-mun.

⁴ Iñupayaaq ukpiqtuaq Christ-mun nalaunŋasiñiataŋaiŋaruq inmiñik kamaksriñiġmigun God-im pitquraŋiñik aitchuutauŋaruanik Moses-kun. Nalaunŋasipkaqtauŋaruq ukpiqami Christ-mun.

Iñupayaat Annaurrauyumiñaqtut

⁵ Moses aglaŋaruq, iñugguuq nalaunŋasipkaqtauniaġumi pitquratigun, ilaan kamagipiallagaksraġigai ataramik iluqaqpiuraŋisa God-im pitquraŋi.

⁶ Aglaalli nalaunŋasiñikun uqallaun ukpiġutikuaqtuaq inna ittuq. Isumaruksrauŋitchutin mayuqtuksraunasugalutin qiḷaŋmun atqautiyaqtuġlugu Christ qiḷaŋmiñ,

⁷ atqaqtuksrauniḷutillu tuquŋaruat inaannun aŋipkaġiaġlugu Christ tuqqunmiñ.

⁸ Uqaluk nalaunŋasiñikun ukpiġutikuaqtuaq alġaqsruutigigikput. Taamna uqaluk kaŋiqsiñaqtuq, iḷisimalluataġiksi, uvva inna ittuq,

⁹ quliaqtuaġiguvsiuŋ allanun Jesus Atanġuniḷugu, suli ukpiġilugu uummativsiññiñ God-mun aŋipkaŋaniḷugu tuqqunmiñ, annaurrauniaqtusi.

¹⁰ Qanuq iñuk ukpiġuuruq uummanmiñiñ aasii nalaunŋasirauvluni sivuġaani God-im, suli quliaqtuaġutivlugich allat ukpiġilikkaġmiñik aasii annaurrauvluni.

¹¹ Bible uqaqtut, “Kiñaliqaa ukpiqtuaq Christ-mun, nunuuraliġumiñaipiaqtuq.”

¹² Jew-guruaġlu Jew-guŋitchuaġlu allagiiŋitchuk, atausiq Ataniq atanġuruq iluqaiññun, suli aitchuiruq suġaliŋiñik annautim iluqaiññun ququularuanun inmiñun aŋaiyyuvlutiŋ.

¹³ Qanuq “Iñupayaaq ququularuaq aŋaiyyuvluni Ataniġmun, annaurrauniaqtuq.”

¹⁴ Iñuich aglaan ququulayumiñaitchut Ataniġmun ukpiliŋaitkumiŋ ilaanun. Suli ukpiġumiñaiñmiut tusaayugaaŋaitkumiŋ ilaanik. Tusaayugaaġumiñaiñmiut alġaqsruiraiḷḷutiŋ.

¹⁵ Alġaqsruirit alġaqsruiyumiñaiñmiut tilirauŋisuaġumiŋ. Alġaqsruiritigun uqaluk aglausimaruq Bible-ni inna, “Qanutun aliuġnaqtigiruq alġaqsruirit kukiḷuŋniŋat alġaqsruutigivlugu tusaayugaaġiksuaq.”

¹⁶ Aglaan tamatkiġḷutiŋ akuqtuŋaitkaat tusaayugaaġiksuaq. Inna Isaiah uqallaŋaruq, “Ataniiq, ukpiġivigruaŋaitkaat alġaqsruutiga ilimiŋnun.”

¹⁷ Tavra iñuich ukpiliġuurut Christ-mun tusaayugaaqamiŋ alġaqsruunmik Christ-kun.

¹⁸ Aglaan apiqsriruŋa, tusaaŋaiḷgataqpat? Iḷumun tusaaŋarut, qanuq “Tusaayugaaġiksuat tikiurrauŋarut nunamun iluqaanun, suli iluqaiññun nunam iñuŋiñun.”

¹⁹ Apiqsrivsaaqtuŋa, Israel-guruat kaŋiqsiŋaitparruŋ tusaayugaaġiksuaq Christ-kun? Kaŋiqsiŋagaluaqtut. Qanuq Moses uqallaŋaruq Bible-ni God inna uqallaŋnivḷugu, “Annautiniaġitka allat iñuich pigiŋisatka, aasii ilivsi siŋñaliqsillusi. Annautiniaġitka allat kaŋiqsiŋaitchuat, aasii ilivsi qinnaiḷusi.”

²⁰ Isaiah suli taluqsrasuŋaġnani uqallaŋaruq, inna God uqallaŋnivḷugu, “Iñuich iḷisimaniugaŋitchuat iḷitchuġiŋagaanŋa. Apiqsruqtuutiqaŋitchuanun uvamnik, ilaiññun iḷitchuġipkaŋaruŋa.”

²¹ Israel-guruat God-im uqallausiġiŋagai inna, “Ataramik isaaqsimagaluaġikka tallika qaitquyummiiqł̣ugich kamaksriḷaitchuat qapiġnaqsruqtuallu iñuich.”