Romans 1 - Iñupiatun Mumiksat Uqalugiksuat

¹ Ukua tuyuutit qairut ilivsiññun Paul-miñ, kivgaŋaniñ Jesus Christ, piksraqtaaġiŋaraŋa tiliraġisukługu alġaqsruitquvlugu God-im tusaayugaaġiksuaŋiñik.

² Taapkua tusaayugaaġiksuat iŋiḷġaan unniqsuqłiisigiŋakkaŋich God-im uqaqtiŋisa Bible-ni.

³ Taapkua tusaayugaaġiksuat quliaqtuaqaqtut God-im Iġñiŋanik aniŋaruamik David kiŋuniŋiññiñ,

⁴ suli pisigivlugu piḷuutaitchuaq Ilitqusia nalupqinaiqsauŋapiaqtuq God-mun Iġñiġinivḷugu aliuġnaġniŋagun aŋŋisim tuqqunmiñ.

⁵ Ataniqput Jesus Christ naglikkutiqpaqaŋaruq uvamnun tilivḷuŋa quliaqtuaġutitquvlugich iñupayaat annautiyumiñaġniḷugich ilaanun ukpiġikpanni kamagikpanniḷu.

⁶ Ilivsivsauq ququaqtaummiusi pigitquvlusi Jesus Christ-mun.

⁷ Paġlagivsi iluqasi Rome-miittuasii, God-im piviuttaġiraŋasi, ququaqtauŋaruasii ilaaguaqtautquvlusi ilaanun. Nagliktuusiaqpaqaġitchisuq tutqiunmiglu God-miñ Aapaptiŋniñ, Ataniptiŋniḷḷu Jesus Christ-miñ.

Aŋaiyyun Quyyavigivlugu God

⁸ Quyyavigiqqaaġiga God-iga Jesus Christ-kun iluqavsigun, ukpiġurri quliaqtuaġimmarruŋ nunapayaani.

⁹ God, savautikkaġa pisuqtilaaptun tusaayugaaġiksuaŋagun Iġñiŋan, iḷisimaruq ataramik itqaumatilaamnik ilivsiññik aŋaiyyutimni.

¹⁰ Suli ataramik apiqsriruŋa qanuġluŋa ullagukłusi God-im pisuutigikpagu.

¹¹ Tautugumapiaġivsi ikayuġukłusi ukpiġutiksi suaŋasiḷaaġukługu.

¹² Taamna sivuniqaqtuq, uvagut avanmun qapiŋaisaaġutiluta ukpiġutiptigun.

¹³ Aniqatiit, iḷisimatqugivsi ataramik qaiyumagaluaġaqtuŋa ilivsiññun alġaqsruisukłuŋa, tautullasiḷuŋa ukpiqtuanik suaŋasiḷaaqtuanik, piḷuusiqirauruaniglu annaurrauruanik, piŋaruatuttauq allani nunani. Aglaan piñaiḷutaksraq itchuuruq tamauŋanun aglaan.

¹⁴ Alġaqsruiruksraupiaqtuŋa iñupayaanun aglagnik iḷisimaruanun naluruanullu isumaturuanullu isumalluaġiitchuanullu,

¹⁵ ilivsiññullu Rome-miittuanun alġaqsruiyumapiaqtuŋa tusaayugaaġiksuanik.

Tusaayugaaġiksuaq Suaŋŋatiqaqtuq

¹⁶ Kanŋugiŋitkiga tusaayugaaġiksuaq qanuq taavrumuuna God-im annautillagaa kiñaliqaa ukpiqtuaq tusaayugaaġiksuamik, qaiqqaaŋaruaq Jew-guruanun, aasii aquvatigun Jew-guŋitchuanun.

¹⁷ Taavrumuuna tusaayugaaġiksuakun God-im nalaunŋatqutaa salapqiŋaruq iñupayaami ukpiqtuami tusaayugaaġiksuamik, aglausimaruatun inna, “Iñuk nalaunŋasirauruaq ukpiġunmigun iñuuniaqtuq isuitchuamun.”

Iñupayaat Piḷuksiŋarut

¹⁸ Qanuq God-im qinnautaa salapqiqsuq qiḷaŋmiñ iñupayaanun god-aiḷaqtuanun piḷuktuanullu, tamatkunuŋa piñaiḷutchiqsuiruanun iḷumun ittuamik.

¹⁹ Sut iḷitchuqqutiksrat God-iqaqtilaamik nalunaitkaluaqtut iliŋiññun qanuq God-im iḷitchuġipkaŋagai iliŋiññun.

²⁰ Taimaŋŋaqaŋa God-im savaŋmagich supayaat, iñuich qiñiŋagaich sut God-im savaaŋi, suli iḷisimavlugu iñuutilaaŋa suaŋŋatiqaqłuni kamanaqtuamik isuitchuamun. Tavraasii patchisiksraitchut,

²¹ qanuq iḷisimagaluaqługu God, ukpiġilipiaġataŋaitkaat God-auniḷugu aasii nanġaġlugu quyyavigilugulu, aglaan isumalluaġiiḷiŋarut kamasuutaiqł̣utiglu.

²² Uqavigaaqłutiŋ isumatunivḷutiŋ isumalluaġiiḷiŋarut,

²³ suli aŋaiyyuniq tuqulaitchuamun God-mun simmausiqł̣ugu aŋaiyyuvigivlugich iñuuraqpaliat tuqullaruatun iñuktun, tiŋmiatullu niġrutitullu nimiġiatullu.

²⁴ Taamna pisigivlugu, God-im ilaisituuqtinŋagai pisuutaatigun. Iliŋich piḷuksiŋarut kamagivlugich pigiitchuat kipiġniuġutitiŋ aasii atuqługich timitiŋ kanŋunaqtuakun avanmun.

²⁵ Tainnatchich iñuich ukpiġiŋagaat saglun, ukpiġigaluaġnagu iḷumun ittuaq God-ikun. Tavra aŋaiyyuvigiŋagaich sut God-im savaaŋi, aasii kamagisuŋił̣ł̣ugu God savaŋaruaq supayaanik, nanġagaksrauruaq isuitchuamun, Amen.

²⁶ Taamna pisigivlugu God-im ilaisituuqtinŋagai pigiitchuanun kipiġniuġutiŋiññun. Aġnaŋisa simmausiqł̣ugu nutim piḷġusiuruaq atugaġivlugich timitiŋ aġnauqanmiŋnun.

²⁷ Tainnatuttauq aŋutit simmausiqł̣ugu nutim piḷġusiq aġnamun kipiġniupiaġatautigivlugich atugaġisukługich aŋutit timitiŋ kanŋunaqtuakun allanun aŋutinun. Aasii nalliummatiruamik paaqłiusiaqaqłutiŋ pigiitchuatigun piḷġusiġikkaġmikkun.

²⁸ Qanuq isummatigimmarruŋ kamagiraksraiññivḷugu God, ilaan ilaisituuqtinŋagai pigiitchuanun kipiġniuġutiŋiññun, piḷuusiqutinullu piḷġutchiñun.

²⁹ Iḷumiutaġiŋagaich qanusipayaat piḷuutit, allatuutillu kaviuqqutillu uumisuutiqpaiḷḷu. Suli iḷumiutaġivlugich killuqsrautit iñuaġutillu uqavaaġutillu pisaasuġmiaġutillu, pigiitchuamik irrusiqaġniġiḷḷu allanun, uqautikłiġñiġiḷḷu,

³⁰ saglutiginnigniġiḷḷu, uumikłiqsuallu God-mik, qapiġnautikun uumisaaqłiqsillu, arguaŋŋatillu uqavigaaġutillu. Isummatiqaqtuallu nutauruakun piḷuusiqutiksranik kamasuutairrutiniglu aŋayuqaanun,

³¹ isumalluaġiirrutillu, taŋŋiiḷaiññiġiḷḷu unniqsuqłiisinun, aŋayuqaaġiiñi piviuttaqqutairrullu, nagliktairrutillu.

³² Tamatkua tainnatchiñik piraġausiqaqtuat iḷisimalluataġaluaqtut God-mun uqallautiŋatilaaqtiŋ tuquruksraunivḷugich. Aasii piḷuusiqiugaŋarut tainnatchisigun kiaqsruqługiḷḷu allat tainnali pitquvlugich.