Revelation 9 - Iñupiatun Mumiksat Uqalugiksuat

¹ Tavra tallimaŋat isaġulgich nipauqłuktaŋaruq, aasii tautuŋagiga uvluġiaq kataktuaq qiḷaŋmiñ nunamun, aasii ilaa aitchuusiaqaŋaruq pitchiġiiyautaanik mitaiḷam putum.

² Uvluġiam aŋmaŋagaa mitaiḷaq putu, tavraŋŋa isiq mayurraqsiŋaruq puyuatun kamanaqtuam igniġum, suli siqiñiq siḷalu taaqsiŋagik itchim putumiñ mitaiḷamiñ.

³ Tavrani itchimiñ salapqiŋarut nuttagayuich nunam qaaŋanun, aasii suaŋŋasiqsauŋarut ittuamik suaŋŋataatun igutchaqpaŋisa kapputilgich nunam.

⁴ Iliŋich uqallausiaqaŋarut maqutchitquŋił̣ł̣ugich iviŋiñik nunam naaggaunnii qanusipayaanik suŋaaqtuanik nauruanik napaaqtupayaaniglu, aglaatualuk tamatkuniŋa iñulimaanik nalunaiñŋutaitchuanik nalunaiñŋutchiutaanik God-im qauŋisigun.

⁵ Tamatkua nuttagayuich nagliksaaqtitchipkaqtauŋarut iñuŋnik tallimani tatqiñi, aglaan tuqunŋisiññaġlugich. Aasii kiiqsiuġniŋat kapputiŋisa inŋarut nagliksaaġnaġniŋatun kapputaata igutchaqpaum.

⁶ Tavraasii taipkunani tallimani tatqiñi iñuich tuquyumałhaaġniaġaluaqtut tuquyumiñaiññiaqtut. Kiiqsiuqpaił̣ł̣utiŋ kipiġniuġniaġaluaqtut tuqusuglutiŋ.

⁷ Nuttagayuich qiññaqaŋarut tuttuqpaktun aŋuyagumiññaqsaaŋaruatun. Niaquŋiññi inŋammiut qiññaqaqtuat niaquġutitun savaaguruatun maniŋmiñ kaviqsuamiñ, suli kiiñaqaqłutiŋ iñuktun.

⁸ Mitquŋich ilaaptauġmakua aġnat nuyaŋich, aasii kigutiŋich lion kigutiŋisitun.

⁹ Satqaŋich matuqaŋarut qiññaqaqtuanik savił̣hatun satqagutitun. Suli sukpaluat isaġuŋisa inŋarut tuttuqpirautitun aksraliktuatun sukpaluktaġmata tuttuqpaich paŋalgutimmatigik aŋuyaktuanun.

¹⁰ Tamatkua nuttagayuich pamiuqaŋarut igutchaqpaktun kapputiliktun suli kavluivḷutiŋ. Suli suaŋŋatiqaŋarut anniaqłiqł̣utiŋ pamiumiŋnik iñuŋnik tallimani tatqiñi.

¹¹ Umialiqaŋarut atanniqsimarimiŋnik isaġuliŋnik aŋalatchiruamik mitaiḷamik putumik. Ilaan atqa Jew-guruat uqausiatigun Abbadon, aasiiḷi Greek-gich taggisiqaġaat Apollyon, sivuniŋa Maqutchiri.

¹² Sivulliq iłuiḷḷiuġutiqpak qaaŋianiktuq. Uvva, malġuk iłuiḷḷiuġutiqpaak qaiyumaaqtuk suli taavruma aquagun.

¹³ Tavrani itchaksraŋat isaġulgich nipauqłuktaŋaruq. Aasii tusaaŋaruŋa nivliksuamik kaŋiġalluŋiñiñ kaviqsuamiñ maniŋmiñ ikipkaivium God-im sivuġaaniittuam.

¹⁴ Uqallaktuamik itchaksraŋannun isaġulgich nipauqłuktautiliŋmun, Pituikkich sisamat isaġulgich pituksimaruat kamanaqtuami kuuŋmi Euphrates-mi.

¹⁵ Tavra sisamat isaġulgich pituiqsauŋarut, tigummirauruat itqanaiqsimmativlugich ikarramun, uvlumun, tatqimun, ukiumullu, tuqutchiruksrautauvlugich piŋayuiŋiññik iñupayaat.

¹⁶ Iñugiaktilaaŋat tusaaŋagiga aŋuyaktit kakaksiraqtuat iñugiaktilaaqaŋarut 200 million.

¹⁷ Aasii uvaŋa John qiñiqtuuraamni tautuŋagitka tuttuqpaich kakaksiraqtuallu. Satqagutiqaŋarut qaummasiqaqtuanik kaviqsuanik igniqtun suŋauraaqtuatullu sapphire uyaġaktun, quqsuqtuatullu sulphur-tun. Suli niaquŋich tuttuqpaich qiññaqaŋarut lion niaquŋisitun, suli aniġniqaŋarut igniġmik itchimiglu tivluktuamiglu kakavyaŋmik.

¹⁸ Taapkunuuna piŋasutigun iłuiḷḷiuġutiqpaktigun iñuich piŋayuiŋich tuqutauŋarut, ignikun itchikullu tivluktuakullu kakavyakun aniġniġikkaŋatigun tuttuqpaich.

¹⁹ Qanuq suaŋŋatiŋich tuttuqpaich inŋarut ilaisa qaniŋiññi pamiuŋiññiḷu, pamiuŋich nimiġiatun inŋarut niaquqaqłutiŋ, aasii satkugivlugich kiiqsiuqtirrutigiŋagaich iñuŋnun.

²⁰ Kisiŋŋuqtaŋich iñuich tuqutauŋitchuat tamatkunuuna iłuiḷḷiuġutiqpaktigun, nutqaŋaitchut aŋaiyyuvigisuŋaiġḷugich savaaŋich argagmiŋ. Aŋaiyyuuŋaiŋitchut ilitqusiqł̣uŋnun iñuuraqpalianullu maniŋñiñ kaviqsuaniñ qatiqtuaniḷḷu maniŋñiñ patukpaŋniḷḷu uyaġagniḷḷu qiruŋniḷḷu, tautulaitchuanun tusaalaitchuanun pisualaitchuanullu.

²¹ Naaggaunnii isumalitqiŋaiñmiut iñuaqtuġniġmikkun aŋatkuuniġmikkullu allatuqtauniġmikkullu naaggaunnii tigligaġniġmikkun.