Revelation 8 - Iñupiatun Mumiksat Uqalugiksuat

Tallimat Malġuŋŋuutaat Nipitirrutit

¹ Tavra Imnaiyaam aŋmaġmagu tallimat malġuat nipitirrutit, nipaiġruummiŋarut qiḷaŋmi kaivallagniġum avvasuŋnaŋani.

² Tavraami uvaŋa John tautuŋagitka tallimat malġuk isaġulgich makitaruat sivuġaani God-im, suli tallimat malġugnik nipauqłuktautinik aitchuusiaqaŋarut.

³ Suli allaptauq isaġulik qaivḷuni makinŋaruq ikipkaiviŋmi kaviqsuamiñ maniŋmiñ tivraġiksautiqaġviŋmik saagaqłuni, suli aitchuusiaqaŋaruq atqunaqługu tivraġiksaunmik avvutigitquvlugu aŋaiyyutaannun God-im iñuŋisa, naavitquvlugu manium kaviqsuam ikipkaivium qaaŋani sivuġaani umialgum aquppiutaŋata.

⁴ Tavra avyua tivraġiksautim qunmuŋaruq piqasiqł̣uni aŋaiyyutiŋiññik God-im iñuŋisa isaġulgum naavitaŋa ikipkaiviŋmun sivuġaani God-im.

⁵ Tavraasii isaġulgum tiguŋagaa tivraġiksautiqaġvik aasii immiqł̣ugu igniġmik ikipkaiviŋmiñ, aasii miḷuqsautivlugu nunamun. Suli kalluularraqsiŋaruq, nipaturuallu sukpaluktuat, igniġuuqpatitaqtuaġlu, suli nuna aulavluni.

Nipauqłuktautit

⁶ Tavra tallimat malġuk isaġulgich tallimat malġugnik nipauqłuktautiqaqtuat itqanaiġutiŋagaich nipauqłuktaqsaġumavlutiŋ.

⁷ Sivulliq isaġulik nipauqłuktaŋaruq. Tavra natatquġnat igniġlu iḷaŋavluni auŋmik kuviŋaruq nunamun. Aasii nuna piŋayuigułługu piŋayuaŋnun nuna ikirauŋaruq, suli piŋayuiŋich napaaqtut ikirauŋammiut, suli iluqani suŋaaqtuaq ivik ikirauŋaruq.

⁸ Igḷua isaġulgum nipauqłuktaŋammiuq. Tavraasii sunakiaq iġġiqpaktun ittuaq ikualavluni igniġmik igitauŋaruq taġiumun.

⁹ Suli piŋayuigułługu taġiuq piŋayuak auguŋaruq, piŋayuiŋich uumaruurat niġrutit taġiumi tuquŋarut, suli piŋayuiŋich umiaqpapayaurat suksraunġiqsauvlutiŋ.

¹⁰ Piŋayuak isaġullak nipauqłuktalgitchuq. Tavra uvluġiaqpak kataŋaruq qiḷaŋmiñ, ikualaruatun naniġuatun, aasii kattaqivlugich piŋayuiŋich kuugich maqsraluktuallu imġich.

¹¹ Atiŋa uvluġiam Tivluktuaq. Piŋayuiŋich imġich tivluksiŋarut, aasii iñugiaktuat iñuich tuquŋarut imiqłutiŋ, qanuq tivluksipkaqtauŋaruq imiq.

¹² Sisamaŋat isaġulgich nipauqłuktaŋaruq. Aasii iḷaŋa siqiñġum taaqsiŋaruq. Siqiñġum iḷaŋa taaqsiruaq aktilaaqaŋaruq siqiñiq piŋasuutpan, piŋayuak taaqsivḷuni. Tainnatuttauq piŋammiut tatqivḷu uvluġiallu piŋayuiŋich. Tainnaasii taapkua qaummatit iḷimmata uvluq qaummaġiiḷiŋaruq irrusimiñiñ, qaummaġiiḷivḷutiktauq tatqiġḷu uvluġiallu irrusikaamiŋniñ unnuami.

¹³ Tavrani uvaŋa John qiviaŋaruŋa, tusaavluguasii tiŋmiaqpak tiŋmiruaq qutchikł̣uni siḷami nipattuaq nipatuvluni, Iłuiḷḷiuġutiqpak, iłuiḷḷiuġutiqpak. Qanutun iłuiḷḷiuqtiginiaqtut iñuuruat nunami, nivliqpata allat nipauqłuktautit piŋasut isaġulgich nivliqsitchaġumakkaŋich.