Revelation 7 - Iñupiatun Mumiksat Uqalugiksuat

144,000 Israel-guruat

¹ Taavruma aquagun uvaŋa John tautuŋaruŋa sisamanik isaġuliŋnik makitaruanik sisamani kaŋiġalluŋiñi nunam, aullaqtaiḷiññiktuanik sisamanik anuġiŋiñik nunam, anuġi anuqłiquŋił̣ł̣ugu sumikunnii nunamun naaggaunnii taġiumun naaggaunnii napaaqtupayaanun.

² Tavrani tautuŋammiuŋa allamik isaġuliŋmik qunmuktuamik nuisaġataġniŋaniñ siqiñġum, saagaqłuni nalunaiñŋutchiutaanik iñuuruam God-im, aasii ilaa ququulaŋaruq nipatuvluni sisamanun isaġuliŋnun aitchuusiaqaŋaruanun suaŋŋanmik maqutchumiñaqsivḷugu nuna taġiuġlu,

³ uqaqłuni, Maqunnagu nuna taġiuġlu napaaqtullu, uvagut nalunaiñŋutchiigaluaqtinnata kivgaŋiñik God-ipta qauŋisigun.

⁴ Tavra tusaaŋagiga iñugiaktilaaŋat nalunaiñŋutchiqsauruat God-im nalunaiñŋutchiutaanik, maŋŋupayaaŋiññiñ iñuŋniñ Israel-guruaniñ. Iñugiaktilaaqaŋarut 144,000-tun.

⁵ Nalunaiñŋutchiqsauruat maŋŋuqaqtuat Judah-mik 12,000, maŋŋuqaqtuat Reuben-mik 12,000, maŋŋuqaqtuat Gad-mik 12,000,

⁶ maŋŋuqaqtuat Asher-mik 12,000, maŋŋuqaqtuat Naphtali-mik 12,000, maŋŋuqaqtuat Manasseh-mik 12,000,

⁷ maŋŋuqaqtuat Simeon-mik 12,000, maŋŋuqaqtuat Levi-mik 12,000, maŋŋuqaqtuat Issachar-mik 12,000,

⁸ maŋŋuqaqtuat Zebulun-mik 12,000, maŋŋuqaqtuat Joseph-mik 12,000, maŋŋuqaqtuat Benjamin-mik 12,000. Iluqaġmiŋ tamatkua nalunaiñŋutchiqsauŋarut.

Iñusalapiaġatat

⁹ Taavruma aquagun qivialgiññama, suamakua, iñusalapiaġatat iñuum kialiqaa kisitchumiñaisaŋi, nunapayauraniñ, maŋŋuqaġlipayaaniñ iñupayaaniñ uqausipayaaniḷḷu, makitaruat sivuġaani umialgum aquppiutaŋisa sivuġaaniḷu Imnaiyaam, annuġaaqaqłutiŋ qatiqtuanik akuqturuanik annuġaanik, palm qisiqsiutiŋiññik saagaqaqłutiŋ,

¹⁰ suli nivliraqłutiŋ nipatuvlutiŋ, Annautigaatigut God-ipta aquppiruam umialgum aquppiutaŋiñi Imnaiyaavlu.

¹¹ Tavra isaġulgich iluqaġmiŋ makitaŋarut avałługich umialgum aquppiutaŋi avataanniḷu umialiŋnat sisamauruallu uumaruat savaat, aasii iluqaġmiŋ sitquqłutiŋ punŋarut sivuġaanun umialgum aquppiutaŋisa aasii nanġaqługu God,

¹² uqaqłutiŋ, Amen, nanġaun kamanaqsiḷġullu isumattullu quyyallu qiksikkullu ataniġnaqullu sapiġñaullu illi God-iptiŋnun taimuŋa isuitchuamun. Amen.

¹³ Tavrani iḷaŋata umialiŋnat apiġiŋagaaŋa, Kisut makua iñuich annuġaaqaqtuat qatiqtuanik akuqturuanik, sumiḷḷu qairuat?

¹⁴ Ilaa kiuŋagiga, Ilivich iḷisimarutin. Aasii ilaan uqallautiŋagaaŋa, Tamarra taapkuagurut pilluktuat kamanaqtuamiñ nagliksaaġutiqpaŋmiñ, iqaġiŋagaich annuġaatiŋ aasii qatiqsivḷugich auŋanik Imnaiyaam.

¹⁵ Taamna pisigivlugu iliŋich sivuġaani makitarut aquppiutaŋata God-im, suli savautivlugu uvlumi unnuamiḷu iḷuani aŋaiyyuvikpaŋan, aasiiḷi taavruma aquppiruam umialgum aquppiutaŋiñi piyaqquqtaiḷiñiaġai nayuġlugich.

¹⁶ Kaaksiutqikkumiñaitchut imiġuksiutqikkumiñaitchullu, siqiñġum uunniqialatchiñiaŋitkai pasiŋñialalugich,

¹⁷ qanuq Imnaiyaaq qitqanniittuaq umialgum aquppiutaŋisa qaunaksriginiaġaat imnaiḷiqirisun, suli ilaan aullatiniaġai imiġnun iñuunaqtuanun, suli God-im qulvipayaat piiġñiaġai iriŋiññiñ.