Revelation 6 - Iñupiatun Mumiksat Uqalugiksuat

Nipitirrutit

¹ Tavra takunnaqtilluŋa imnaiyaaq aŋmaisaġman iḷaŋannik nipitirrutit tallimat malġuuruat, tusaaŋaruŋa iḷaŋannik sisamauruat uumaruat savaat uqallaktuamik nipiqaqłuni kallularuatun, Qaġġiiñ.

² Tavraasii tautuŋagiga qatiqtuaq tuttuqpak suli kakaksiqsuaq pisiksiqaŋaruq, aitchuusiaqaqłuni niaquġunmik. Ilaa aullaŋaruq akimasautigillaġmi akimayaqtuqsaqłuniḷu.

³ Tavra Imnaiyaam aŋmalgiñmagu igḷua nipitirrutim, tusaalgitchuŋa igḷuanik uumaruam savaam uqallaktuamik, Qaġġiiñ.

⁴ Allasuli tuttuqpak salapqiŋaruq kaviqsuaq. Taamna kakaksiqsuaq suaŋŋasiqsauŋaruq aŋuyakkumiñaqsivḷugich iñuich nunami, avanmun tuquġautitquvlugich, suli aitchuusiaqaŋaruq savikpakpaŋmik.

⁵ Imnaiyaam aŋmalgiñmagu piŋayuak nipitirrutik, tusaaŋagiga piŋayuak uumaruak savaak uqallaktuaq, Qaġġiiñ. Tavra tautulgitkiga maŋaqtaaq tuttuqpak, suli kakaksiqsiŋa saagaġniqsuaq uqumaisilaaġutiŋnik.

⁶ Tavra tusaalgitchuŋa nivliqpalliqsuamik iġiñamik akunġanniñ sisamat uumaruat savaat uqallaktuamik, Akutchiñiq palauvak sivuniqaġli uvlupak savaŋniġmun akiññaktaamun, suli piŋasuni akutchiñiq barley palauvak uvlupak savaŋniġmun akiññaktaaguli, aglaan qanuq piññagu uqsruq, wine-lu.

⁷ Tavra Imnaiyaam aŋmaġmagu sisamaŋat nipitirrutit, tusaaŋaruŋa nipaanik sisamaŋata uumaruat savaat uqallaktuamik, Qaġġiiñ.

⁸ Tavra tautulgitkiga misuitchuatun qiññalik tuttuqpak, kakaksiqsuaŋa atiqaġniqsuq Tuqqunmik, suli Nagliksaaġvium maliġuaŋagaa. Iliŋik suaŋŋasiqsauŋaruk pisaġiyumiñaqsivḷugu avvaŋata avvaŋa nunam iñuŋisa, tuquġaitquvlugich savikpaŋmik niqaiḷḷiuġniġmiglu naŋirrutiqpaŋniglu niġrułłuŋiñullu nunam tuquġaquvlugich iñuich.

⁹ Tavra Imnaiyaam aŋmaġmagu tallimaŋat nipitirrutit, tautuŋagitka ataani ikipkaivium ilitqusiŋich iñuich iñuktauŋaruat pisigivlugu uqalua God-im, suli pisigivlugu ukpiġnaqsivḷugu quliaqtuaġiniŋa tusaayugaaġiksuam.

¹⁰ Iliŋich nipanŋarut nipatuvlutiŋ, Ataniiq, sapiġñaqtuatiin, piḷuutaitchuatiin iḷumun ittuaġlu, qanutun sivisutigiruamik isivġiġñiaŋitpigich iñuŋi nunam aasii tatavsaġlugich pisigilugu tuqunŋammatigut?

¹¹ Tavra iliŋich aitchuusiaqallaaŋarut qatiqtuanik akuqturuanik annuġaanik aasii uqallautivlugich piḷaiŋaiqsiallavsaaquvlugich, iñugiaktilaaksrautaat kivgauqatiŋisa aniqatiimiglu naatchiaġilugu, tuqutauyumaaġmiruat iliŋisituttauq.

¹² Tavra Imnaiyaam aŋmaġmagu itchaksraŋat nipitirrutit qiñilgitchuŋa. Tavra nuna aulaqparraqsiŋaruq, siqiñiq taaqsimmivḷuni maŋaqtuatun ukił̣haatun, suli naaqiŋaruaq tatqiq kaviqsivḷuni auktun.

¹³ Suli uvluġiat qiḷaŋmi kataŋarut nunamun fig napaaqtua kataiqpaŋmatun naaqiŋaitchuanik siiġñiamiñik aŋalayyauġmani anuġiqpaum.

¹⁴ Qiḷak tautuŋnaiŋammiuq immuatun makpiġaatun imummatigik, iġġipayaat suli qikiqtallu nuutauŋarut inimiŋniñ.

¹⁵ Tavrani umialiŋi nunam atanaurallu qaukłiŋiḷḷu aŋuyaktit suġalliruallu sapiġñaqtuallu iñupayaurallu kivgakkaluat atanġitchuallu, iriqtuŋarut qaiġusuŋnun akunġannullu uyaġagruaŋisa iġġich,

¹⁶ ququulavlutiŋ iġġiñun uyaġagruanullu, Kattaqisigut aasii iriġluta irraŋniñ, taavruma aquppiruam umialgum aquppiutaŋiñi, suli qinnautaaniñ Imnaiyaam.

¹⁷ Qanuq kamanaqtuaq uvlua tatavsautaata tikitchuq, aasii kiñaliqaa igḷutuutiyumiñaipiallaktuq taavrumuŋa.