Revelation 5 - Iñupiatun Mumiksat Uqalugiksuat

Immuat Makpiġaat Imnaiyaaġlu

¹ Tautuŋammiuŋa taliqpiani taavruma aquppiruam umialgum aquppiutaŋiñi immuanik makpiġaanik aglaqaqtuanik iḷumikkullu siḷatimikkullu, nipititaqtat tallimat malġugnik nipitirrutinik.

² Suli tautuŋammiuŋa sapiġñaqtuamik isaġuliŋmik nivliqsuamik nipatuvluni, Kiña nalliummativa qauqtiġumiñaqługich nipitirrutiŋich aŋmaġlugiḷḷu immuat makpiġaat?

³ Tavraasii kiapayaaq qiḷaŋmi naagga nunami naaggaunnii nunam ataani aŋmaġumiñaiñŋaġaich immuat makpiġaat naaggaunnii taiguaġumiñaiññiġaich.

⁴ Tavra qiaŋaruŋa atqunaqłuŋa pisigivlugu iñuiññiġman nalliummatiruamik aŋmaġumiñaġlugich immuat makpiġaat naaggaunnii taiguaġumiñaġlugich.

⁵ Tavrani iḷaŋata umialiŋnat uqallautiŋagaaŋa, Qianak. Uvva iñuum suaŋŋatiqpaqaqtuam Lion-tun, maŋŋuqaqtuaq Judah-miñ, kiŋunġuruaq David-mun, akimaŋaruq aŋmaġumiñaqsivḷugiḷḷu immuat makpiġaat, piiġumiñaqsivḷugiḷḷu tallimat malġuk nipirrutiŋich.

⁶ Aasii akunġanni umialgum aquppiutaŋisa sisamallu uumaruat savaat umialiŋnallu, tautuŋagiga Imnaiyaaq makitaruaq, qiññaqaqłuni tuqutauŋaruatun, tallimat malġugnik nagruqaqłuni suli tallimat malġugnik iriqaqłuni, taapkua sunauvva tallimat malġuk ilitqusiŋi God-im tilirauŋaruat iluqaanun nunamun.

⁷ Tavra imnaiyaaq ullautiŋaruq aasii tiguvlugich immuat makpiġaat taliqpianiñ aquppiruam umialgum aquppiutaŋiñi.

⁸ Tavraasii tiguaniŋmagich immuat makpiġaat, sisamat iñuuruat savaat iñuiññaq sisamallu umialiŋnat punŋarut sivuġaanun Imnaiyaam. Iliŋich atuqtuuraqallaaŋarut nuqaqtiliŋnik, kaviqsuamiḷḷu maniŋmiñ puvialuŋaanik utkutchianik siḷivinŋaruanik ikipkaqługich tivraġiksautinik, sunauvva aŋaiyyutiŋiññik God-im iñuŋisa.

⁹ Aasii atuŋarut atuutitchiamik inna, Nalliummatirutin ilivich tiguyumiñaqługich immuat makpiġaat suli aŋmaaġumiñaqługich nipirrutiŋich, qanuq tuqutauŋarutin. Aasii maqipkaqługu augiñ tauqsiŋagitin iñuich God-mun qanusipayaaniñ kiŋuniġiiñiñ uqautchiñiḷḷu iñuŋniḷḷu nunauruaniḷḷu.

¹⁰ Suli ilivich katinŋagitin atautchimun atanniqsimavianun God-im aŋaiyyuliqsiqpautquvlugich savautilugu God-ikput, aasii atanniqsimannigniaqtut nunami.

¹¹ Tavra qivialgitchuŋa, aasii tusaavluŋa isaġulisalaŋnik iñugiapiaġataqtuanik kisiññaitchuanik. Makitaŋarut avataani umialgum aquppiutaŋisa sisamallu iñuuruat savaat umialiŋnallu,

¹² atuqtuat nipatuvlutiŋ, Nalliummatiruq Imnaiyaaq tuqutauŋaruaq, aitchuusiaqaġumi ataniġnaqunmik suġaliqpaŋmiglu isumattunmiglu sapiġñaunmiglu qiksiksraunmiglu nanġaunmiglu kamanaqsiḷiġunmiglu.

¹³ Tusaaŋammiuŋa suli uumaruurapayauraq qiḷaŋmi nunamiḷu ataaniḷu nunam taġiumiḷu, uumaruurapayaallu sumipayaaq atuŋarut, Ilaanun taavrumuŋa aquppiruamun umialgum aquppiutaŋiñi Imnaiyaamullu illi nanġaun qiksiksraun, kamanaqsiḷġullu sapiġñaullu taimuŋa isuitchuamun.

¹⁴ Tavrasuli sisamat uumaruat savaat uqallaŋammiut, Amen. Suli umialiŋnat punŋarut aasii nanġaivḷutiŋ ilaanun iñuuruamun taimuŋa isuitchuamun.