Revelation 4 - Iñupiatun Mumiksat Uqalugiksuat

Nanġairuat Qiḷaŋmi

¹ Taapkua aquatigun tautuktitauvsaaŋaruŋa, tautukługu upkuaq aŋmaqtuaq qiḷaŋmi. Aasii nipi tusaaŋakkaġa uqaġman uvamnun nipauqłuktautitun uqallaŋaruq, Mayuġiñ uvuŋa, tautukkitchumagikpiñ sunik nalaunniaqtuanik uuma aquagun.

² Tavrauvvaa Ilitqusiġiksuam aŋalanŋagaaŋa, aasii tautukługich umialgum aquppiutaŋi qiḷaŋmi, taamnalu aquppiruaq aquppiutani.

³ Aasii taamna aquppiruaq tavrani qiññaqaŋaruq akisuruam isiŋnam uyaġaum qivliġñiŋatun uyaġauvlu kaviġñiŋatun igniqtun, aasii avataanni umialgum aquppiutaŋisa rainbow inŋaruq qiññaqaqtuaq qivliqtuatun suŋaaqtuatun uyaġaktun.

⁴ Avataanni umialgum aquppiutaŋisa inŋammiut iñuiññaq sisamanik umialgich aquppiutaŋich, aasii aquppiŋarut iñuiññaq sisamat umialiŋnat, annuġaaŋaruat qatiqtuanik, niaquġutiqaqłutiŋ kaviqsuaniñ maniŋñiñ.

⁵ Umialgum aquppiutaŋiñiñ qaummaatitaŋaruq igniġuuqpatitaqtuaq, suli sukpaluk kalluularaġaqtuaġlu. Suli sivuġaanni umialgum aquppiutaŋisa ikualammiut tallimat malġuk naniġuat, taapkua tallimat malġuk ilitqusiŋi God-im.

⁶ Suli sivuġaanni umialgum aquppiutaŋisa ilaaptauġmanna taġiuq igalauraq, qaummaqtigivluni sikutun qaummaqtuatun. Suli avataanni umialgum aquppiutaŋisa avatiŋni ittut sisamat uumaruat savaat irisuŋaiññat saamikkun tunumikkullu.

⁷ Sivulliq uumaruaq savaaq qiññaqaŋaruq lion-tun, igḷua aasii uumaruaq savaaq aŋayukłiqqatun qimuktitun, piŋayuak uumaruak savaak kiiñaqaŋaruq iñuum kiiñaŋanik, aasii sisamaŋat uumaruat savaat iłłuni tiŋmiḷḷaruatun tiŋmiaqpaktun.

⁸ Aasii taapkua uumaruat savaat sisamauruat, ilimikkullaa itchaksrallaanik isaġuqaŋarut, irisuŋaiññauvlutiŋ isaġuŋich iḷuliñaaŋisigullu siḷaliñaaŋisigullu. Aasii atuŋaiyuiñŋarut uvlukkaluami unnuamiḷu, Piḷuutaitchuq, piḷuutaitchuq, piḷuutaitchuq Ataniq God sapiġñaqtuaq, inŋaruaq ittuaġlu qaiyumaaqtuaġlu.

⁹ Tavra qakugupayaaq sisamat uumaruat savaat atuusiġmata nanġaunmik qiksiksraunmiglu quyyatiniglu taavrumuŋa aquppiruamun umialgum aquppiutaŋiñi, iñuuruam taimuŋa isuitchuamun,

¹⁰ iñuiññaq sisamanik umialiŋnat puttaqtut sivuġaanun aquppiruam umialgum aquppiutaŋiñi aasii nanġaqługu taamna iñuuruaq taimuŋa isuitchuamun, mattaqługich niaquġutitiŋ aasii iḷivḷugich sivuġaanun umialgum aquppiutaŋisa, atuqłutiŋ,

¹¹ Ataniqpuut God-ikpullu, nalliummatirutin ilivich aitchuusiaqaġuvich nanġaunmik qiksiksraunmiglu ataniġnaqunmiglu, qanuq ilivich savaŋagitin supayaurat, suli ilivich pisuutipkun igliqtut savaaguŋarullu.