Revelation 3 - Iñupiatun Mumiksat Uqalugiksuat

Tuyuutit Uqaluich Sardis-mun

¹ Isaġuliŋanulli aŋaiyyuvium Sardis-mi aglagiñ. Uqaluŋiñik taavruma piqaqtuam tallimat malġugnik ilitqusiŋiñik God-im tallimat malġuglu uvluġianik. Iḷisimagitka savaasi, iḷisimanaġaluaqłusi iñuurualirauvlusi uvamnun, piqasiqsuutipiaġataŋitchusi uvamnun, tuquŋaruatun iłłusi.

² Tavraasii qiptaiġitchi, suaŋasiḷaaqsiuŋ pigiłaurakkaqsisuli god-iliqinivsiññi, tuqupiaġataġmatun piŋaiñŋaan. Qanuq iḷitchuġigivsi taamna pigiłaurakkaqsisuli inuqsimaruq iviġaumanaġumiñaġluni sivuġaani God-im.

³ Itqaumasiuŋ taamna iḷisaurrusiaqsi tusaaŋakkaqsiḷu. Kamagisiuŋ isumalitqigḷusiḷu. Qiptaiŋisuaġuvsi, ullagniaġivsi tigligayuktitun, iḷisimayumiñaiñmiusi kisumi ikarraġmi ullautiniaqtilaamnik ilivsiññun, isivġiġiaġlusi.

⁴ Kisiŋŋuqtaqałauraġaluaqtusi iñukitchuanik iñuŋnik Sardis-mi piḷuusiqiŋitchuanik, annuġaatiŋ piġuaqsaiḷimmatun, aasii ilaisa pisuaqatiginiaġaanŋa qatiqtuanik annuġaaqaġlutiŋ, qanuq iliŋich nalliummatirut.

⁵ Iñuich akimaruat annuġaaġniaqtut tainna qatiqtuanik annuġaanik, suli piiyaġumiñaitkitka ilaisa atiŋich makpiġaaŋiñiñ God-im iñuuruatigun, aglaan uqallausiġiniaġitka uvaŋa piginiḷugich takkuani Aapama isaġuliŋisalu.

⁶ Siutiqaqtusi tusaggatiksraŋnik, naalaġnisitchi Ilitqusiġiksuam uqautiŋiñik aŋaiyyuliqiruanun.

Tuyuutit Uqaluich Philadelphia-mun

⁷ Isaġulganulli aŋaiyyuvium Philadelphia-mi aglagiñ. Uqaluŋiñik piḷuutaitchuam iḷumun ittuavlu, piqaqtuam ataniġnaqunmik pitchiġiiyautaatun David, aŋmaġumiñaqługu iñuŋmun umikkumiñaiġḷugu, suli umiglugu iñuŋmun aŋmaġumiñaiġḷugu.

⁸ Iḷisimagitka savaasi. Iḷisimaruŋa mikiruamik suaŋŋatiqaqtusi. Kamagiŋagisi iḷisaurrutitka, suli ukpiġnaŋarusi uvamnun. Aitchuŋagivsi piviksramik savaurriñiġmun iñuum upkuatun umikkumiñaisaŋatun.

⁹ Naalaġnisitchi. Taapkuali iñuich pigipkaqtuat Satan-mun, sagluturuat Jew-gunivḷutiŋ Jew-guŋiḷḷaġmiŋ, ullautipkaġniaġitka ilivsiññun aasii purvigipkaġlusi uqallakkumiñaqsiḷugich ilivsi uvamnun piviuttaġinivḷusi.

¹⁰ Pisigivlugu kamaksriŋaniqsi piraksriutimnik qiñuiqł̣uni igḷutuiñikun, uvaŋa qaunaginiaġivsi uuktuaqtauguvsi qaiñiaqtuamiñ iñupayaanun, uuktuaġuglugich iñupayaurat nunamiittuat.

¹¹ Qaiyasiruŋa. Atuqsiuŋ suaŋŋatiłauraq pigikkaqsi iñuŋmun aatitchumiñaiḷḷusi akiḷiusiaksramik akimaguvsi.

¹² Iñuk akimaruaq nayummasiutiruatun piñiaġiga aŋaiyyuvikpaŋani God-iŋma, aasii sumikunnii tavraŋŋa aniñiaŋitchuq. Suli aglagniaġiga atiŋa God-iŋma ilaanun, suli atiŋa iniqpaŋan God-iŋma, nutauruaq Jerusalem atqaġniaqtuaq God-imniñ qiḷaŋmiñ. Suli aglagniaġiga ilaanun nutauruaq atiġa.

¹³ Siutiqaqtusi, tusaggatiksraŋnik naalaġnisitchi Ilitqusiġiksuam uqautiŋiñik aŋaiyyuliqiruanun.

Tuyuutit Uqaluich Laodicea-mun

¹⁴ Suli isaġulganun aŋaiyyuvium Laodicea-mi aglagiñ. Uqaluŋiñik Amen-guruam, ukpiġnaqtuam iḷumullu iḷitchuġipkairuam God-im iḷumun ittuaŋanik, aullaqisaaguruaq iluqaiññun God-im savaaŋiñun.

¹⁵ Iḷisimagitka savaasi. Akiḷḷiḷiqsuŋitkivsiŋa, naagga kipiġniuġutiqpaŋitkivsiŋa. Nigḷiñaŋitchusi uutiqsiñaiñmiusi. Qanutun nalliaŋnun nigḷiñaqtuavlu uunaqtuavlu atausiŋŋuqugaluaġivsi.

¹⁶ Tavraasii, pisigivlugu uunnaavyugniqsi, nigḷiñaŋiññiqavsi naagga uutiqsiñaġlusi, tivvuaqsałhiñaaġuġivsi qanimniñ.

¹⁷ Qanuq uqaqtusi inna, Suiḷḷiuŋitchugut uvagut. Suġallirugut uvaptiŋnik piḷḷuatautivluta. Tainna uqaqtuasii nalurusi qanutun piiḷḷiuqtuagutilaavsiññik naglignaqtilaavsiññiglu. Irrusiqaqtusiuvva iḷiappaktun annuġaagitchuatun ayauŋaruatullu.

¹⁸ Tavra piraksriġivsi utiquvlusi uvamnun iḷumutun suġallakkumausi, tauqsiġmatun piḷusi uvamniñ kaviqsuapiaġatamik maniŋmik. Tauqsiġitchiḷu qatiqtuanik annuġaanik atiraksravsiññik aasii matulugu kanŋunaqtuaq annuġaiññiqsi. Tauqsiġitchisuli maratchimik irigiksautiksravsiññik tautuksiḷḷasiyumausi.

¹⁹ Tamatkua piviuttaġikkatka, suaguugitka tatavsaqługiḷḷu, taamna pisigilugu kipiġniuġutisiŋa isumalitqigḷusiḷu.

²⁰ Uvva, makitaruŋa upkuami tigluktuqłuŋa. Kialiqaa tusaagumiuŋ nipiga aasii upkuiġḷugu upkuaq, itchaqiniaġiga aasii niġiqatigilugu, ilaattauq uvaŋa niġiqatigiluŋa.

²¹ Iñuich akimaruat aquppiqatigipkaġniaġitka saniġaani umialgunimni aquppiutama, uvaptuttauq akimavluŋa aquppiqasiutimmatun saniġaani Aapama aquppiutaŋisa.

²² Siutiqaqtusi tusaggatiksraŋnik, naalaġnisitchi Ilitqusiġiksuam uqautiŋiñik aŋaiyyuliqiruanun.