Revelation 22 - Iñupiatun Mumiksat Uqalugiksuat

¹ Tavrani isaġulgum uvaŋa John tautuktinŋagaaŋa kuuŋanik imġata iñuunaqtuam, qaummaqtigiruamik igalauratun, maqiruamik aquppiutaŋaniñ God-im Imnaiyaavlu,

² qitqatigun apqutiŋisa iniqpaum. Suli avatiŋni kuugum, napaaqtut iñuunaqtuat inŋarut, siiġñisuuruat qulit malġuŋnik ukiumi atausiallaavlugu tatqiq, aasii akutuqpaŋi napaaqtum tumaqsruutauŋarut nunauruanun.

³ Sunapayaaq God-im tatavsaŋakkaŋa pisigivlugu piḷuun paqinnaġniaŋitchuq iniqpaŋmi. Aglaan aquppiutaqpaŋa God-im Imnaiyaavlu tavraniinniaqtuk, suli ilaan kivgaŋisa qiksigilugu nanġaġniaġaat.

⁴ Iliŋisa tautuŋniaġaat kiiñaŋa, suli ilaan atqa aglautiŋaniaqtuq qauŋiññi.

⁵ Suli unnuaqaġniaŋitchuq, piqaqtuksrauŋaiġñiaqtut qaummaŋanik qullium naaggaunnii siqiñġum, qanuq Ataniq God qaummatiginiaġaat, aasii iliŋich atanniqsimanniŋniaqtut umialiktun taimuŋa isuitchuamun.

Jesus Qaikpan

⁶ Tavra isaġulgum uqallautiŋagaaŋa, Taapkua uqaluich ukpiġnapiaqtut iḷumun ittullu. Suli Ataniq God aitchuiruaq Ilitqusiġiksuamiñik uqaqtimiñun tiliŋagaa isaġulini iḷitchuġipkaquvlugich kivgani sunik piyasiuraqtuanik.

⁷ Aasiuvva, Uvaŋa Jesus qaiyasiruŋa. Quviasuglich iñuich kamaksriruat uqaluŋiññik ukua makpiġaat piyumaaqtuatigun.

⁸ Uvaŋauvva John-guruŋa tusaaŋaruaġlu tautuŋaruaġlu tamatkuniŋa iluqaiññik. Aasii tusaaganikapkich tautuanikługiḷḷu punŋaruŋa isigaŋiñun isaġulgum qiksigivlugu qiñiqtitchiruaq tamatkuniŋa uvamnun,

⁹ aasii ilaan uqallautiŋagaaŋa, Tainna piññak. Uvaŋa kivgauqatauruŋa iliŋnun aniqatiŋnullu uqaqtiŋiñun God-im, suli piqatigivlugich tamatkua kamaksriruat uqaluŋiññik ukua makpiġaat. Qiksigilugu nanġaġuŋ God.

¹⁰ Tavra ilaan uqallautiŋagaaŋa, Nalupkaqsaġnagich uqaluŋich ukua makpiġaat piyumaaqtuatigun, qanuq piviksraq qalliruq taapkua iluqaġmiŋ taŋŋiġviksraŋat.

¹¹ Pigiitchualiqirauruaq iñuk kiikaa pigiitchualiqili, suli salumaitchuanik isumalik kiikaa salumaiḷḷi isumamiñi, suli nalaunŋaruaq iñuk kiikaa nalaunŋaruakuaġli, suli piḷuutaitchuaq kiikaa piḷuutaiḷḷi.

¹² Uvva, uvaŋa Jesus qaiyasiruŋa. Saagaġniaqtuŋa paaqłiutiksrautimnik, akiḷitchuglugu iñupayaaq qanuq savaaŋagun.

¹³ Uvaŋa Alpha-uruŋa Omega-lu, sivulliq aqulliġḷu, aullaqisaaq isuuruaġlu.

¹⁴ Quviasuglich iñuich tuvrairuat pitquraŋiñik, iqaġimmatun annuġaatiŋ salummaqługich, niġiyumiñaġumaut siiġñaŋiñiñ napaaqtum iñuunaqtuam, suli isiġumiñaġlutiŋ iniqpaŋmun paaqpaŋigun.

¹⁵ Isiqtitauniaŋitchut iniqpaŋmun, iqsiñaqtuat qimmich isiqtitauyumiñaiñmatun iniqpaŋmun, iñuich allatuqtit, aŋatkullu, iñuaqtillu, iñuuraqpaŋnullu aŋaiyyusuuruat, suli iluqaġmiŋ piviuttaqaqtuat aullasiqaqtuallu saglunmik.

¹⁶ Uvaŋa Jesus tiliŋagiga isaġuliga iliŋnun quliaqtuaksrił̣ł̣ugu aŋaiyyuliqiruanun. Uvaŋa maŋŋuuruŋa kiŋuniġigaaŋalu David, qaummaġiksuaq uvluġiaq nuisuuruaq uvlum sivuuraŋani.

¹⁷ Ilitqusiġiksuaġlu Nuliaksraullu uqaqtuk, Qaisitchi. Suli kiñaliqaa tusaaruaq taavrumiŋa uqallaktuksraummiuq, Qaisitchi. Suli kiñaliqaa imiġuliqsuaq qaiḷi. Akuqtuġliuŋ imiq iñuunaqtuaq aitchuusiaġilugu kiapayaaq piqaġuktuam.

Aqulliich Uqaluich

¹⁸ Uvaŋa John kilipiaġataġiga iñupayaaq tusaaruaq uqaluŋiññik ukua makpiġaat piyumaaqtuatigun, Kialiqaa iḷakpagich ukua uqaluich God-iptauq pipkaġniaġmigai ilaanun tatavsausiaŋi iłuiḷḷiuġutiqpaich quliaqtuaguruat ukunani makpiġaani.

¹⁹ Suli kiñaliqaa piiqsikpan uqaluŋiññiñ makpiġaat ukua piyumaaqtuatigun, God-im piiġñiaġaa ilaan iḷaŋiutiniksraŋa siiġñaŋiñiñ napaaqtum iñuunaqtuam piḷuutaitchuamiḷḷu iniqpaŋmiñ, quliaqtuaguruaniñ ukunani makpiġaani.

²⁰ Iñuk taamna quliaqtuaqtuaq iluqaiññik taapkuniŋa uqallaktuq, Nalupqinaitchuamik qaiñasuaġniaqtuŋa. Amen. Qaiñasuaġiñ Ataniiq Jesus.

²¹ Ataniq Jesus nagliktuutiqpaqaġli iluqavsiññun. Amen.