Revelation 21 - Iñupiatun Mumiksat Uqalugiksuat

Nutauruaq Qiḷak Nutauruaġlu Nuna

¹ Tavrani uvaŋa John tautuŋaruŋa nutauruamik qiḷaŋmik nutauruamiglu nunamik, qanuq sivulliq qiḷak sivulliġḷu nuna piiŋaruk, taġiuġlu piiŋammiuq.

² Suli tautuŋagiga iniqpak ilaaguaqtauŋaruaq God-mun, nutauruaq Jerusalem, atqaqtuaq qiḷaŋmiñ God-miñ, itqanaiŋavluni niviaqsiatun qiñiyunaqsaŋaruatun kasuġiaqługu uiksrautini.

³ Suli tusaaŋammiuŋa kamanaqtuamik nipimik umialgum aquppiutaŋiñiñ uqallaktuamik, Uvva, iñuuvia God-im piqasiutiruq iñuŋnun. Ilaan iñuuqatiginiaġai, aasii iliŋich ilaan iñugilugich, aasiisuli God ilaa itqatauniaqtuq iliŋiññun God-auluniḷu iliŋiññun.

⁴ Ilaan saluaġniaġai qulvipayaat iriŋiññiñ, suli tuqqun piiġñiaqtuq, isumaaġutaiññiaqtuġlu qirrataiḷḷuniḷu kiiqsiuġutaiḷḷuniḷu tavraŋŋaaglaan, qanuq sivuani pisuuruat piiŋarut.

⁵ Suli taamna aquppiruaq umialgum aquppiutaŋiñi uqallaŋaruq, Paŋmapak savakkitka supayaat nutaaġuqługich. Suli uqallavsaaqłuni uvamnun, Aglautikkich taapkua, qanuq taapkua uqaluich ukpiġnaqtut iḷumun ittullu.

⁶ Suli ilaan uqallautiŋagaaŋa, Naataniktut, Uvaŋa Alpha-uruŋa Omega-lu, aullaqisaaq isuuruaġlu. Kimulliqaa imiġuliqsuamun aitchuutiginiaġiga imiq akiiḷaaġlugu taavrumaŋŋa maqisaġvianiñ imġum iñuunaqtuam.

⁷ Kiñaliqaa akimaruaq kiŋuvaannagniaqtuq tamatkuniŋa iluqaiññik, aasii uvaŋa ilaan God-iginiaġaaŋa, aasiiḷi uvaŋa ilaa iġñiġilugu.

⁸ Aglaalli qapiyaruat, ukpiġutaitchuallu, naġġunapiaġataqtuallu, iñuayuktuallu, allatuqtillu, aŋatkuuruallu, iñuuraqpaktuqtuallu, iluqaġmiglu sagluturuat iniqaġniaqtut narvami ikualaruami igniġmi tivluktuamiḷu kakavyaŋmi. Taamna igḷugigaa tuqqutim.

Nutauruaq Jerusalem

⁹ Tavrani qaiŋaruq iḷaŋat tallimat malġuk isaġulgich piqaŋaruat tallimat malġuŋnik puvialuŋaanik puunik siḷivinŋaruanik tallimat malġuŋnik aqulliġñik iłuiḷḷiuġutiqpaŋnik, aasii uqallautivluŋa, Qaġġiiñ, tautuktinniaġikpiñ Nuliaksrautaanik Imnaiyaam.

¹⁰ Tavra Ilitqusiġiksuam aŋalanŋagaaŋa, aasii isaġulgum aullautivluŋa qaaŋanun qutchipiaġataqtuam iġġim. Aasii ilaan tautuktinŋagaaŋa Jerusalem-mik, ilaaguaqtauruamik God-mun atqaqtuamik qiḷaŋmiñ God-miñ.

¹¹ Taamna iniqpak qaummatiqaŋaruq qaumanġanik God-im, qaummaŋa arriqaqłuni ayuġnaġniqsrauruatun akisuruatun uyaġaktun qivliqtuatun isiŋnatun, qaummaqtigivluni igalauratun.

¹² Taamna iniqpak kamanaqtuanik qutchiksuanik katchiqaqtuq, qulit malġuŋnik upkuaqpaqaqłuni, qulit malġuk isaġulgich qaunaksriruat upkuaqpaŋnik. Upkuaqpaŋni aglausimaŋarut atiŋich qulit malġuk maŋŋuŋisa Israel-guruat.

¹³ Piŋasullaat upkuaqpaich inŋarut avatillaaŋani, kiluaŋnam tuŋaaŋani piŋasut, ikagnam tuŋaaŋani piŋasut, uŋallam tuŋaaŋani piŋasut, uaŋnaaġruum tuŋaaŋani piŋasut.

¹⁴ Suli katchiŋi iniqpaum qulit malġuŋnik uyaġaŋnik maŋŋuqaqłutiŋ, aglaqaqtuanik qulit malġuŋnik atiŋiññik qulit malġuk tiliraŋisa Imnaiyaam.

¹⁵ Tavra taamna isaġulik uqaqtuaq uvamnun piqaŋaruq uuktuunmik maniŋmiñ kaviqsuamiñ piḷiamik uuktuġukługu iniqpak upkuaqpaŋiḷu katchiŋiḷu.

¹⁶ Tavra iniqpak iññaqaŋaruq sisamanik kaŋiġalluqaqłuni, taktilaaŋa ativluni iraqtutilaaŋanun. Tavraasii isaġulgum uuktuŋagaa iniqpak uuktuunmiñik, 1,500 mile-luuġutitun, taktilaaŋalu iraqtutilaaŋalu kiŋiktilaaŋalu ativlutiŋ.

¹⁷ Ilaan suli uuktuŋagai katchiŋi, aasii 216 isagniqtun qutchiksigivluni, iñuum uuktuusiagun, taavruma isaġulgum uuktuġniŋagun.

¹⁸ Katchich savaaguŋarut qivliqtuamiñ isiŋnamiñ. Iniqpak savaaguŋaruq qivliqtuamiñ maniŋmiñ kaviqsuamiñ, tapiglakługu qiñiġnaqtuatun igalauratun.

¹⁹ Maŋŋuŋi katchiŋisa iniqpaum qiñiyunaqusiqsuqtauŋarut qanusipayaanik akisuruanik uyaġaŋnik. Sivulliq maŋŋuliun inŋaruq qivliqtuatun isiŋnatun, tuglia suŋauraaqtuatun uyaġaktun qivliqtuatun, piŋayuak aasii qanuġliqaa aglaqaqtuatun qivliqtuatun uyaġaktun, aasii sisamaŋat suŋaaqtuatun qivliqtuatun uyaġaktun,

²⁰ tallimaŋat kavviġipiaqtuatun kaviqsuatun qivliqtuatun uyaġaktun, itchaksraŋat aasii kaviqsuatun qivliqtuatun uyaġaktun, tallimat malġuat quqsuqtuatun uyaġaktun, tallimat piŋayuat taġium suŋauraaġniŋatun uyaġaktun, quliŋŋuġutaiḷaŋat siḷaliŋaruatun suŋaaqtuatun qivliqtuatun uyaġaktun, quliŋŋuġutaat aasii siḷaliŋałhaaqtuatun suŋaaqtuatun qivliqtuatun uyaġaktun, qulit atausiŋŋuġuutaat piqaluyaum suŋauraaġniŋatun qivliqtuatun uyaġaktun, qulit malġuŋŋuġuutaat suŋauraammaġiksuatun qivliqtuatun uyaġaktun.

²¹ Aasii qulit malġuk upkuaqpaich qulit malġuuŋarut qatiqtut uyaġaich akisuruat, ilimikkullaa upkuaqpaich savaaguvlutiŋ suġaitchuamiñ atautchimiñ qatiqtuamiñ akisuruamiñ uyaġaŋmiñ, suli apqutiŋi iniqpaum qivliqtuaq kaviqsuaq manik, tapiglakługu qiñiġnaqłuni igalauratun.

²² Uvaŋa John tautuŋaitchuŋa aŋaiyyuvikpaŋmik iniqpaŋmi, qanuq aŋiayyuvikpauruq Ataniq God Sapiġñaqtuaq Imnaiyaaġlu.

²³ Suli iniqpak siqiñiqtuŋitchuq naaggaunnii tatqimik qaummatiksraŋanik, qanuq qaumanġa God-im qaummatigigaa, suli qulliġivlugu Imnaiyaaq.

²⁴ Nunauruat iñuuniaqtut qaumaniŋani, suli umialiŋi nunam qaġġirriñiaqtut suġaliġmiŋnik tavruŋa.

²⁵ Suli upkuaqpaŋi aŋmaniaqtut uvluqtutilaaŋatun. Umiŋniaŋitkaich sumikunnii qanuq unnuagiññiaqtuq.

²⁶ Tavruŋa iniqpaŋmun qaġġirriñiaqtut suġaliŋiññik qiñiyunaqtuaŋiññiglu nunauruat.

²⁷ Aglaan sunapayaaq salumaitchuaq isiġumiñaitchuq iniqpaŋmun naaggaunnii kiñaliqaa piḷġusiqaqtuaq naġġunapiaġataqtuanik naagga saglunmik. Aglaan kisimiŋ tamatkua atiŋich aglausimaruat Imnaiyaam makpiġaaŋiñi iñuuruatigun isiġniaqtut iniqpaŋmun.