Revelation 20 - Iñupiatun Mumiksat Uqalugiksuat

1,000 Ukiut

¹ Tavrani uvaŋa John tautuŋaruŋa isaġuliŋmik atqaqtuamik qiḷaŋmiñ, saagaqłuni kiluutchaŋanik mitaiḷam putum kalimñaqpaŋniglu takiruanik.

² Tavraasii tiguniqłaŋagaa nimiġiaqłuk, taimña aippaaġnisaq nimiġiaq, Tuunġauruaq Satan-guvluniḷu, aasii qiḷiqsruivḷugu sivunniqł̣ugu 1,000-nun ukiunun.

³ Tavra isaġulgum siŋinŋagaa putumun aasii pitchiġiiyaqługu nipirrusiqł̣ugulu aŋmaġumiñaiqł̣ugu, Satan-mun sagluqiyumiñaiqł̣ugich nunauruat tavraŋŋaaglaan, 1,000 ukiut naatchiaġilugich. Taapkua aasii aquatigun pituiqsaullaktuksrauniaġmiuq sivikisuurami.

⁴ Tavrani tautuŋaruŋa umialgich aquppiutaŋiññik iñuŋniglu aquppiruanik tamatkunani aquppiutani. Taapkua iñuich ataniġnaqusiqsauŋarut isivġiqsiġuquvlugich. Suli tautuŋammigitka ilitqusiŋich tamatkua iñuktauŋaruat pisigivlugu uqaluktuaqaġniŋat iḷumun ittuamik Jesus salapqikkaŋanik uqaluaniglu God-im. Taapkua iñuich qiksigilugu nanġaŋaitkaat niġrułłuk iñuuraqpaŋalu, suli akuqtuiŋaitchuat ilaan niġrułłuum nalunaiñŋutaŋanik qaumikkun naagga argagmikkun. Iliŋich aŋipkaqtauŋarut, aasii umialguqatigivlugu Christ 1,000-ni ukiuni.

⁵ Kisiŋŋuqtaŋich tuquŋaruat aŋiŋaitchut 1,000 ukiut naanŋaiñŋaisa. Taamna sivulliq aŋipkaqtauniŋat tuquŋaruat.

⁶ Quviasuktut piḷuutaitchullu taapkua piqatauruat sivulliġmi aŋŋiñmi tuqqunmiñ. Tuqqutim igḷuata qanuġumiñaipiaġai. Iliŋich aŋaiyyuliqsiqpaginiaġai God-im Christ-guvlu, suli iliŋisa umialguqatiginiaġaat 1,000-ni ukiuni.

Satan Akiiḷirauruq

⁷ Tavraasii 1,000 ukiut naatpata, Satan pituiqsaullagniaqtuq tigutaaġviŋmiñiñ,

⁸ aasii aniḷuni sagluqiyaqtuġlugich nunauruat siaminŋaruat nunapayaurani, iḷagilugik God-lu Magog-lu. Satan-gum katinniaġai iluqaisa atautchimun aŋuyaqulugich iñugiaktilaaqaqługich qaviaŋisun taġium siñaata.

⁹ Aasii iliŋich siaminŋarut iluqaanun nunamun iḷuvlugich God-im iñuŋi iniqpaglu piviuttaġikkaŋa. Tavraasii igniq atqaŋaruq qiḷaŋmiñ aasii suksraunġiqł̣ugich.

¹⁰ Tavrani Tuunġaq sagluqinniŋaruaq iliŋiññik igitauŋaruq narvaŋanun igniġum tivluktuavlu kakavyaum, niġrułłuum sagluqqutikullu uqaqtauŋŋuaqtuam God-mun igitauviaŋnun, aasii iliŋich nagliksaaqtitauniaqtut uvlumiḷu unnuamiḷu taimuŋa isuitchuamun.

Aqulliq Isivġiġvik

¹¹ Tavraniasi uvaŋa John tautuŋaruŋa aŋiruanik qatiqtuanik umialgum aquppiutaŋanik taavrumiŋalu aquppiruamik taapkunani. Ilaan sivuġaaniñ nunalu qiḷaglu piiŋaruk.

¹² Tavra tautuŋagitka tuquŋaruat, kamanaġaluaqtuat kamanaitchuallu, makitaruat sivuġaanni umialgum aquppiutaŋisa. Tavra iñugiaktuat makpiġaat aŋmaŋagaich. Aasiisuli allat atautchiich makpiġaat aŋmaŋagaich, makpiġaaŋich iñuuruat. Aasii tuquŋaruat isivġiqsauŋarut savaaŋisigun aglaŋisitun makpiġaani.

¹³ Iluqaġmiŋ tuquŋaŋaruat tavraniinŋarut, tamatkua taġiumiñ tamatkualu tuqqunmiñ nagliksaaġviŋmiḷḷu. Iluqaġmiŋ isivġiqsauŋarut savaamikkun.

¹⁴ Tavraniasiiñ Tuqqullu Nagliksaaġvigḷu igitauŋaruk narvaŋanun igniġum. Tavra taamna igniŋa igḷuata tuqqutim.

¹⁵ Tavra kialiqaa atqa aglausimaŋiñman makpiġaaŋiñi iñuuruat, ilaa igitauŋaruq narvaŋanun igniġum.