Revelation 2 - Iñupiatun Mumiksat Uqalugiksuat

Tuyuutit Uqaluich Ephesus-mun

¹ Isaġulganun aŋaiyyuvium Ephesus-mi aglagiñ inna. Uqaluŋi taavruma tigummiruam tallimat malġugnik uvluġianik taliqpiŋmiñi, pisuaqtuam akunġanni tallimat malġuk kaviqsuat maniich qulliqaġviich.

² Iḷisimagitka savaasi, siġġaqutisi qiñuirrutikullu igḷutuasi, suli qanuq iḷatchiḷaisilaaŋannik piḷuktuat iñuich aglaan uuktuŋavlugiḷḷu tamatkua taiguqtuat inmiŋnik tiliranik piuŋitkaluaŋŋaġmiŋ, aasii iḷitchuġivlugich saglutilaaŋannik.

³ Iḷisimaruŋa igḷutuirusi iłuiḷḷiuġutinik qiñuił̣ł̣usi, suli igḷutuivḷusi pisigivluŋa, aasii qapiŋaitchusisuli.

⁴ Aglaan uumiŋa iviġaumagiŋitkivsi. Piviuttaġiŋitkivsiŋa paŋmapak pisaqqaaġusivsiññiñ.

⁵ Isumalaaġutigisiuŋ piviuttaqqutiqqaaqsi uvamnun ukpiqqaaqavsi. Isumalitqigitchi, aasii piqqaaġusivsisun savautilluatatqiksalgiḷḷuŋa. Isumalitqiŋisuaġuvsi, qaiḷuŋa piiġiaġniaġiga qulliqaġviksi inaaniñ.

⁶ Aglaan uumiŋa iviġaummatigigivsi. Uumigigisi piḷġusiŋich pigiitchuat Nicolaitans, uvaptuttauq.

⁷ Siutiqaqtusi tusaggatiksraŋnik, naalaġnisitchi Ilitqusiġiksuam uqautiŋiñik aŋaiyyuliqiruanun. Iñuich akimaruat niġipkaġniaġitka napaaqtuaniñ iñuunaqtuam nauruamiñ nautchiaqaġviani God-im.

Tuyuutit Uqaluich Smyrna-mun

⁸ Suli isaġulganun aŋaiyyuvium Smyrna-mi aglagiñ. Uqaluŋi sivulliuruam aqulliuruavlu, tuquŋaruam suli aŋiŋaruam.

⁹ Iḷisimagitka iłuiḷḷiuġutisi iḷiappauniqsiḷu, aglaan ami umialgurusi. Iḷisimaruŋa saŋutchisaannik ilivsiññik tamatkua Jew-guniruat God-im iñuŋi iñugiŋitkaluaqtillutiŋ God-mun, aglaan savautigaat Tuunġaq.

¹⁰ Sivuuġaginagu nagliksaaġutigiyumaagaqsikkaqsi. Uvva, Tuunġaum isiqtaupkaqsaġumaagaqsigai iḷasi, uuktuaqtautquvlusi. Tavraasi uvluni qulini iłuiḷḷiuġutiqpaqaġniaqtusi. Ukpiġutiqaġitchi tuqunivsiññun aglaan, aasiiḷi akiḷiññiaġivsi iñuggusiġḷusi isuitchuamik niaquġusiġmatun.

¹¹ Siutiqaqtusi tusaggatiksraŋnik, naalaġnisitchi Ilitqusiġiksuam uqautiŋiñik aŋaiyyuliqiruanun. Tamatkua akimaruat tuquvsaaġniaŋitchut igḷuani tuqqutim.

Tuyuutit Uqaluich Pergamum-mun

¹² Isaġulganulli aŋaiyyuvium Pergamum-mi aglagiñ. Uqaluŋiñik taavruma piqaqtuam ipiktuamik avanmun kiiñaliŋmik savikpaŋmik.

¹³ Iḷisimaruŋa sumi iñuutilaavsiññik, Satan-gum aŋalatchiviani iñuŋnik. Iḷumun ittuagurusi uvamnun, ukpiġutaiŋaitchusiunnii uvamnun Antipas quliaqtuaqaqtuaq uvamnik tuqutaumman, Satan-gum iñuuviani.

¹⁴ Aglaan uvva naġġukkutiqaġmiuŋa iñukitchuanik ilivsiññun. Iḷaqaqtusi tuvrairuanik iḷisaurrutiŋiñik Balaam, iḷisaurriŋaruam Balak-mik Israel-guruat piḷuksitquvlugich, niġiḷutiŋ aitchuutauŋaruanik iñuuraqpaŋnun, suli allatuquvlugich.

¹⁵ Aasiisuli iḷaqaġmiusi tuvrairuanik pigiitchuanik iḷisaurrutiŋiññik Nicolaitans.

¹⁶ Isumalitqigitchiasiiñ. Isumalitqiŋitkuvsi, ullagnasuaġniaġivsi aasii aŋuyaglugich taipkua iñuich savikpaŋmik piruamik qanimniñ.

¹⁷ Siutiqaqtusi tusaggatiksraŋnik, naalaġnisitchi Ilitqusiġiksuam uqautiŋiñik aŋaiyyuliqiruanun. Akimaruat niqiksriññiaġitka iḷaŋanik iriqsimaruam maana-m, suli aitchuġlugu qatiqtuamik uyaġaŋmik, nutauruamik atiġmik aglausimaruamik uyaġaŋmun iñuum kialiqaa nalukkaŋanik aglaan kisimi aitchuusiaqaqtuam.

Tuyuutit Uqaluich Thyatira-mun

¹⁸ Isaġulganulli aŋaiyyuvium Thyatira-mi aglagiñ. Uvva uqaluŋi Iġñiŋata God-im, iriqaqtuam ikualaruatun igniqtun, isigaŋiḷu ittuat qivliqsaqtatun uvluyuiḷatun.

¹⁹ Iḷisimagitka savaasi, piviuttaqqutiksiḷu ukpiġutiksiḷu savaurriñiqsiḷu qiñuiqł̣usi igḷutuiñiqsiḷu. Iḷisimammiuŋa paŋmapak savałhamaaqtusi pisaqqaaġnivsiññiñ.

²⁰ Aglaan una iviġaummatigiŋitkiga ilivsigun. Ilivsi iḷatchiqł̣ugu taamna aġnaq Jezebel-tun ittuaq, taiguqtuaq inmiñik uqaqtaanik God-im, suli iḷisaurrivḷuni sagluqivlugiḷḷu kivgatka allatuqtautquvlugich, suli niġitquvlugich niqinik aitchuutauŋaruanik iñuuraqpaŋnun.

²¹ Aitchuŋagaluaġiga piviksramik isumalitqiquvlugu, aasii isumalitqiguŋiñŋaruq allatuqtauniġmigun.

²² Taamna pisigilugu ilaalu iñuiḷḷu allatuqatiŋi pipkaġniaġitka nagliksaaġutiqpaŋmun iginmatun siñigviŋiñun nagliksaaqpaktuam. Taamna piñiaġiga paŋmapak isumalitqiŋisuaqpata piḷuktuaniñ pikkamiŋniñ piqatigivlugu.

²³ Suli uvaŋa tuqunniaġitka miqłiqtuŋi. Aasii aŋaiyyuliqiruapayaat nunallaani iḷitchuġiniaqtut uvaŋautilaamnik iḷisimaruaq iñuich isumaŋiññik piyummatiŋiññiglu. Suli paaqłiġñiaġivsi atausiullaalusi sutigun piŋaravsigun.

²⁴ Aglaalli ilivsi iḷasi Thyatira-mi kamaksriŋaitchut taavrumiŋa pigiitchuakun iḷisaurrunmik, iḷisaaġiŋaitkiksi iñuich tairaŋat nalupkapiaġatakkaŋa Satan-gum. Sumik allamik piraksriġñiaŋitkivsi,

²⁵ tuniqsimapiaġumausiaglaan ukpiġutiqaqtuiññaġlusi suli nalaunŋaruakun iñuulusi qaitchiaġiluŋa.

^26-27 Iñuich akimaruat, iñuutuiññaqtuat uvaŋa pitqutiptun isuanunaglaan, ataniġnaqusiġñiaġitka aitchuusiaptuttauq ittuamik ataniġnaqunmik Aapamniñ. Ataniġnaqusiġñiaġitka atanniqsimannikkumiñaqsiḷugich nunauruanik, atanniqsimayumiñaqsiḷugich suaŋŋatiqpapiaġatamik, saagaqaqtuatun umialgum anauttaŋanik savił̣hamik, aŋalataġiyumiñaqsiḷugich siġḷiġnaisigilugich iñuum siqummayaaqsallaŋmatun qikuyyaq utkusik.

²⁸ Aasiisuli aitchuġniaġitka uvluġiamik nuisuuruamik uvlum sivuuraŋani.

²⁹ Siutiqaqtusi tusaggatiksraŋnik, naalaġnisitchi Ilitqusiġiksuam uqautiŋiñik aŋaiyyuliqiruanun.