Revelation 19 - Iñupiatun Mumiksat Uqalugiksuat

¹ Taavruma aquagun uvaŋa John tusaaŋaruŋa nipiqpaŋatitun ittuamik iñugiapiaġataqtuat iñusalaich qiḷaŋmi nanġairuanik, Nanġaqtauli God. God-igigikput annaurriḷḷaruaq, kamanaqtuaq, suaŋŋatiqaqtuaġlu.

² Qanuq ilaan isivġiutiŋi iḷumun ittut nalaunŋarullu. Ilaan tatavsaŋagaa aġnaq allatuqtiqpak maqutchiruaq nunam iñuŋiñik allatuunmigun. God-im tatavsaŋagaa qanuq tuquġaŋagai God-im kivgaŋi.

³ Atausivsaami nivlivsaaŋarut, Nanġaqtauli God. Isiq iniqpaŋmiñ qunmuktuqtuq taimuŋa isuitchuamun.

⁴ Tavrali iñuiññaq sisamat umialiŋnat sisamallu uumaruat savaat punŋarut aasii qiksigivlugu nanġaŋagaat God aquppiruaq umialgum aquppiutaŋiñi uqaqłutiŋ, Amen. Nanġaqtauli God.

Imnaiyaaq Niqinaqiruq Katirrusiqunmik

⁵ Tavrasuli nipi nivliŋammiuq umialgum aquppiutaŋiñiñ uqaqłuni, Nanġaqsiuŋ God-ikput iluqasi ilaan kivgaŋi iñupayaallu kamanaitkaluaqtuat kamanaqtuallu qiksiksrautiqaqtuat ilaanun.

⁶ Tavrani tusaaŋaruŋa nipaatiktun iñugiapiaġataqtuat iñusalaich ittuamik, ilaimña quġluqtaqpaum imaavalua kallulaqpaktuaġlu. Tusaaŋagitka uqallaktuat, Nanġaqsiuŋ God. Ataniq God-ikput Sapiġñaqtuaq umialguruq.

⁷ Quviasukpakta quyalutalu. Nanġaġlakput Ilaa kamanaqtuaq, qanuq katirrusiqiniksraŋa Imnaiyaam tikitchuq, suli ilaan nuliaksrautaa inmiñik itqanaiganiktuq.

⁸ Nuliaksrautaa annuġaaksriqsauŋaruq qatiqtuamik ukił̣haaġiksuamik salumaruamik qivliqtuamiglu, qanuq ukił̣haaġiksuaq sivuniġigaa God-im iñuŋisa nalaunŋaruakun savaaŋisa.

⁹ Tavra isaġulgum uqallautiŋagaaŋa, Aglauttuuŋ una, Quviasuglich tamatkua aiyugaaqtauruat katirrusiqinikun niqinaqivianun Imnaiyaam. Suli isaġulik uqallavsaaŋaruq, Tamatkua tamarra iḷumun ittuat uqaluŋi God-im.

¹⁰ Tavrani punŋaruŋa isaġulgum isigaŋiñun qiksigivlugu, aasii ilaan uqallautiŋagaaŋa, Tainna piññak. Uvaŋa kivgauqatigigiŋma suli aniqatiiviḷḷu iḷagigaanŋa kamaksriruat iḷumun ittuamik Jesus salapqikkaŋanik. Qiksigilugu nanġaġuŋ God. Qanuq iḷumun ittuam Jesus salapqikkaŋata puttuqsripkaŋammigai uqaqtiŋi God-im quliaqtuaġitquvlugu iḷumun ittuaq.

Kakaksiqsuaq Qatiqtuami Tuttuqpaŋmi

¹¹ Tavrani tautuŋagiga qiḷak aŋmaqtuaq, aasii tautukługu qatiqtuaq tuttuqpak. Taamnaasii kakaksiqsuaq atiqaŋaruq Ukpiġnaqtuamik Iḷumullu ittuamik, suli nalaunŋaruakun ilaa isivġiiruq aŋuyaktuġlu.

¹² Ilaan irrak inŋaruk ikualaruatun igniqtun, suli niaquani iñugiaktut niaquġutit, suli ilaa atiqaŋaruq aglausimaruamik iñuum kialiqaa nalukkaŋanik aglaan kisimi.

¹³ Ilaa atuŋaruq akuqturuamik annuġaamik auguaqtaŋaruamik. Suli atiq taiguutigikkaŋa God-im Uqalua.

¹⁴ Suli aŋuyaktiŋisa qiḷaum maliŋagaat, kakaksiqł̣utiŋ qatiqtuani tuttuqpaŋni, annuġaaqaqłutiŋ salumaruanik qatiqtuanik ukił̣haaġiksuanik.

¹⁵ Aullarriŋata qanġaniñ qaiŋaruq ipiktuaq savikpak akimmatiginiakkaŋa aŋuyakkumigich nunauruat. Ilaan atanniqsimaniaġai nunauruat suaŋŋatiqpaqapiaġataġluni anauttaqaġluni savił̣hamik umialgum anauttaŋanik. Ilaan ivsaiyaġniaġai grapes tunmaġlugich ivsaiyaiviani wine-liuġviata suamavluni qinnautaata Sapiġñaqtuam God-im.

¹⁶ Suli akuqturuami annuġaamiñi sivyaamiñiḷu atiqaŋaruq aglausimaruamik, Umialgat umialgich suli Atanġat atanġich.

¹⁷ Tavrani uvaŋa John tautulgitchuŋa isaġuliŋmik makitaruamik siqiñiġmi, aasii nipatusivḷuni ilaan ququaŋagai iluqaisa tiŋmiat tiŋmiruat siḷami, Qaisitchi. Katittitchi niġiyaqtuġlusi God-im niqinaqusiuqtaqpaŋanun.

¹⁸ Qaiḷusi niġiyaqtuqsigik timiŋich umialgich, timiŋich umialiŋisa aŋuyaktit aŋuyaktillu, suli timiŋich tuttuqpaich kakaksiraqtiŋisalu, suli timiŋiḷḷu iñupayaurat, iluqatiŋ kivgallu atanġitchuallu, kamanaqtuallu kamanaitchuallu iluqaisa.

¹⁹ Tavra tautuŋagiga niġrułłuk umialiŋiḷu nunam aŋuyaktiŋiḷḷu katittuat aŋuyaksaġumaalliqł̣ugu taamna kakaksiqsuaq tuttuqpaŋmi aŋuyaktiŋiḷu.

²⁰ Tavra niġrułłuk tigurauŋaruq, piqasiqł̣ugu uqaqtauŋŋuaqtuamik God-mun sivuġaani savaaqaŋaruam aliuġnaqtuanik sagluqqutigivlugich tamatkunuŋa akuqtuiruanun nalunaiñŋutchiutaanik niġrułłuum tamatkualu qiksiksrautiqaqtuat iñuuraqpaŋanun niġrułłuum. Taapkuak niġrułługlu uqaqtauŋŋuaqtuaġlu iluqatik igitauŋaruk iñuuvlugik narvaŋanun igniġum ikualaruamun tivluktuamik kakavyaŋmik.

²¹ Aasii aŋuyaktiŋik iḷakutauruat tuqutauŋarut savikpaŋmik qairuamik qanġaniñ taavruma kakaksiqsuam tuttuqpaŋmi, aasii iluqaġmiŋ tiŋmiat niġiŋarut niqinŋuġataqłutiŋ timiŋiññiñ tamatkua iñuich.