Revelation 18 - Iñupiatun Mumiksat Uqalugiksuat

Babylon Suksraunġiqsauruq

¹ Taavruma aquagun uvaŋa John tautuŋaruŋa allamik isaġuliŋmik atqaqtuamik qiḷaŋmiñ. Ilaa kamanaqtuamik ataniġnaqutiqaŋaruq, aasii nuna iluqaan qaummaġiksipkaŋagaa ilaan qaumaniġmiñik.

² Tavra ilaa ququulaŋaruq nipatusipiaġataqłuni, Babylon kamanaqtuaq suksraunġiqsauruq, suksraunġiqsauruq. Inigiliutigaat tuunġaich, inigiliutigaat qanusipayaat ilitqusiqł̣uich, inigiliutigaat iluqaġmiŋ pigiitchuat uumiñaqtuallu tiŋmiat.

³ Qanuq ilaan aitchuŋagai wine-gunmiñik imiqtiłługich iñupayaurat, wine-ŋanik allatuutiqpaŋmi. Suli umialiŋisa nunam allatuqatigianiŋagaat ilaa, suli tauqsiġñiaqtiŋi nunam suġallautiqaŋarut suġalġanik pitquraiḷaġniŋata.

⁴ Tavrani uvaŋa John tusaaŋammiuŋa allamik nipimik qiḷaŋmiñ uqallaktuamik, Annisitchi Babylon-miñ, iñutkaa, annisitchi ilaaniñ. Iḷauruksrauŋitchusi piḷuutiŋiñi. Iḷauruksrauŋitchusi tatavsausiaŋiñi.

⁵ Qanuq ilaan piḷuutiŋi qaliġiiksittut qutchiksisigivlutiŋ qiḷaktun, aasii God-im naluruuraaġniaŋitkai ilaan piḷuutiŋi.

⁶ Akisaġvigisiuŋ Babylon aulatchisiatun ilivsiññik suli paaqłiġḷugich ilaan savaaŋi malġuktun iḷiḷugich, immiġḷugu ilaan qallugauraŋa wine-mik malġuktun kimnaqsiḷugu ilaan imiksriuqtaŋatun ilivsiññun.

⁷ Aitchuqsiuŋ nagliksaaġutiqpaŋmik isumaaluunmiglu nalliġaaġlugu nanġausiaġiŋaraŋa susuŋisaaġutiqpaŋalu. Qanuq inmiñun uqautiugaqtuq inna, Uvva aquppiruŋa umialik aġnaq. Uiḷgaŋaitchuŋa, iḷitchuqsriyumiñaitchuŋa isumaaluunmik.

⁸ Tavra ilaan iłuiḷḷiuġutiqpaŋi qaiñiaqtut uvlumi atautchimi, naŋirrutiqpaich isumaaluullu kaaksiunġiḷḷu, suli ilaa ikirauniaqtuq igniġmik, qanuq sapiġñaqtuq Ataniq God isivġiiruaq ilaanik.

⁹ Tavraasii umialiŋi nunam, allatuqatiqaŋaruat pitquraiḷaqatigivlugulu ilaa, qianiaqtut uiġualalutiglu pisigilugu iniqpaum tautukkumirruŋ puyua ikualaniŋan.

¹⁰ Iliŋich makitaniaqtut uŋasigḷutiŋ, sivuuqqatigilugu ilaan nagliksaaġutiqpaŋa, suli uqaġlutiŋ, Yaqhii, yaqhii, ilivich kamanaqłutin iniqpaak, ilivich sapiġñaqtuatiin iniqpak Babylon. Atautchimi ikarraġmi tatavsaqtauganiktutin.

¹¹ Tavraasii tauqsiġñiaqtiŋi nunapayaam qiaŋarut kiŋuvġuŋarullu ilaanik, tauqsiqsiksraiġñiġmata suġauttatiŋ tavraŋŋaaglaan.

¹² Tauqsiqsiksraiqsut maniich kaviqsuat, qatiqtuallu maniich, uyaġaiḷḷu akisuruat qatiqtuallu akisuruat uyaġaich, ukił̣haaġiksuallu qatiqtaat, suŋauraammaġiksaallu ukił̣haat, siluiḷḷu kavviġiksaallu ukił̣haat, qanusiḷimaallu ayuġnaqtuat qiruich, qanusiḷimaat savaat tuugaaniñ, qanusiḷimaat akisuruat qiruich, patukpaiḷḷu, savił̣hallu qatiqtaallu uyaġaich igluqpaksriat,

¹³ sinimakkaluat, avuuġutit, ikipkaqługich tivraġiksautit, myrrh-lu, tivraġiksuallu, wine-lu, uqsruq, palauvagiksaaq palauvaksraġlu, immuliviich aŋusalluġiich imnaiḷḷu, tuttuqpaiḷḷu tuttuqpirautillu, kivgallu iñukkaluatunniiḷu tuniuqqaqługich tauqsiqsuqługiḷḷu.

¹⁴ Tauqsiġñiaqtit uqallautigaat ilaanun, Supayaat nakuuruat kipiġniuttaġikkatin pigisukługich taimmaurut, suli iluqaġmiŋ umialgutitin suġalġich, qiñiyunaġniġiḷḷu piiqsut, aasii qakuguluunnii paqitchumiñaiġitin.

¹⁵ Tauqsiġñiutilgich tamatkunuŋa tauqsiġñiutinik, umiallaktuat taavrumaŋŋa, iniqpaŋmiñ makitaniaqtut uŋasiksuami, iqsigilugu nagliksaaqtitauniŋa, qialutiŋ kiŋuvġulutiglu,

¹⁶ Yaqhii, yaqhii, taamna kamanaqtuaq iniqpak annuġaaqaŋagaluaqtuaq ukił̣haaġiksuanik, suŋauraammaġiksuanik kavviġiksuaniglu, qiñiyunaqusiqsuqtanik maniŋñik kaviqsuanik, uyaġaŋniglu akisuruanik, qatiqtuaniglu uyaġaŋnik akisuruanik.

¹⁷ Ikarraġmi atautchimi tammaigai iluqaisa umialgutini. Suli iluqaġmiŋ umiaqpaich umialiŋich taġiuqsiuqtillu iñuich, umiaqpagaqtit iluqaġmiglu akiññagniaqtuat taġiumi makitaŋarut uŋasiksuami,

¹⁸ suli nipaalaŋarut qiñillaan isia ikualaniŋan, Iniqpaŋmik allamik piiñŋaruq taavrumatun kamanaqtuatun iniqpaktun.

¹⁹ Tavra iliŋich nalluqsraŋarut nunam avyuanik niaqumiŋnun, qiallaġmiŋ kiŋuvġullaġmiglu nipaalavlutiŋ, Yaqhii, yaqhii, kamanaqtuaq iniqpak iluqaġmiŋ umiaqpaqaqtuat taġiumi suġallaktuat ilaan umialgutiŋigun. Atautchimi ikarraġmi suksraunġiqsauruq.

²⁰ Quviasukpautigiuŋ qiḷaak suksraunġiqsauniŋa. Quviasukpagitchi God-im iñuŋi tilirauruasiḷu uqaqtauruasiḷu God-mun, qanuq God-im tatavsaŋagaa iniqpak savaaŋigun.

²¹ Tavrani sapiġñaqtuaq isaġulik tigusiŋaruq uyaġagruaġmik kamanaqtuatun kaivragruaqtun ittuamik aasii miḷuqsautivlugu taġiumun, uqallakłuni, Tainnatun Babylon kamanaqtuaq iniqpak miḷuqsaurrauniaqtuq suammatilugu, aasii tautugnatqigñiaŋitchuq tavraŋŋaaglaan.

²² Suli nipiŋich nuqaqtiligaqtit atuqtillu, suvluaqtuġnaniglu nipauqłuktautiniglu atuqtuuraqtit, tusaġnatqigñiaŋitchut iliŋni tavraŋŋaaglaan. Piḷiuqti qanusiḷimaanik tautugnatqigñiaŋitchuq iliŋni, suli tusaġnaġniŋa palauvaksriuġutim tusaġnatqigñiaŋiñmiuq iliŋni.

²³ Suli qaummaŋa nannim qaummaġitqigñiaŋitchuq iliŋni tavraŋŋaaglaan, suli nipiŋik uiksrautivlu nuliaksrautivlu tusaġnatqigñiaŋitchuk iliŋni tavraŋŋaaglaan, qanuq ilivich tauqsiġñiaqtitin kamanaqtuaguŋarut nunami, suli nunam iñuŋi iluqatiŋ sagluqirauŋarut ilivich aŋatkuunipkun.

²⁴ Suli Babylon tatavsaqtauŋaruq, qanuq auŋat God-im uqaqtiŋisa iñuŋisalu tautugnaŋaruq iniqpaŋmi. Aaŋami auŋat iluqaġmiŋ tuqutauŋaruat nunami.