Revelation 17 - Iñupiatun Mumiksat Uqalugiksuat

Allatuqtiqpak

¹ Tavrani iḷaŋata isaġulgich tallimat malġuuruat piqaŋaruat tallimat malġuŋnik puvialuŋaanik puggunik qaivḷuni uvamnun John-mun uqallautiŋagaaŋa, Qaiñ, tautuktinniaġikpiñ tatavsausiaksraŋanik kamanaqtuam allatuqtim aġnam, taavruma kamanaqtuam iniqpaum naparuam qitqanni iñugiaktuat kuugich.

² Umialiŋi nunam allatuqatiqaŋarut taavrumiŋa kamanaqtuamik allatuqtimik, suli iñuŋi nunam imiŋasisiqaŋarut imiqłutiŋ wine-ŋanik allatuutaata.

³ Tavra Ilitqusiġiksuam aŋalanŋagaaŋa, aasii isaġulgum aullautiŋagaaŋa nunagluktuamun. Tavrani tautukkiga aġnaq aquppiruaq qaaŋani kavviġiksuam niġrułłuum pigiitchuanik atiġnik aglaqaqtuam iluqaani qaamiñi. Taamna niġrułłuk tallimat malġugnik niaquqaqtuq, suli qulinik nagruqaqłuni.

⁴ Aġnaq annuġaaqaŋaruq suŋauraammaġiksuanik kavviġiksuaniglu, suli qiñiyunaqusiqsuŋavluni maniŋñik kaviqsuanik uyaġaŋnik akisuruanik, suli qatiqtuanik uyaġaŋnik akisuruanik. Saagaqaŋaruq kaviqsuamiñ maniŋmiñ qallugauramik siḷivinŋaruamik naġġunapiaġataqtuamik suli salumairrutiŋiñik qaipkakkaŋiññik allatuutaata.

⁵ Suli aġnam qauŋani aglausimaŋaruq atiq kaŋiqsiñaiḷaq, Babylon kamanaqtuaq, aakaŋat aġnat allatuqtipayaurat, suli naġġunapiaġataqtuanun agvisauruaq iñuuraqpaŋnun qiksikkunmik nunam iñuŋiñi.

⁶ Tavra tautuŋagiga aġnaq, imiŋasiruaq auŋannik God-im iñuŋisa auŋanniglu iñuktauruat pisigivlugu iḷumun inniqtiŋ Jesus-mun. Tautukapku aġnaq, aliupiaġataŋaruŋa.

⁷ Tavra isaġulgum apiġiŋagaaŋa, Suvlutin aliuqpich? Quliaqtuaġutiniaġikpiñ kaŋiqsiḷgunaitchuaŋanik aġnam, niġrułłuuvlu kakaksiġvigikkaŋata niaquqaqtuam tallimat malġugnik suli qulinik nagruqaqtuam.

⁸ Niġrułłuk tautukkan iñuuŋaruaq, paŋmapak iñuuŋaiqsuq, mayuġumaaqsiruq natqiḷamiñ putumiñ aasii aullaġluni suksraunġiqsauyaqtuġluni. Iñuich iñuuruat nunami atiŋich aglautiŋaitchuat makpiġaaŋiññun iñuuruat nunaqaŋa savaagumman, aliuġniaqtut tautuglugu niġrułłuk, qanuq iñuuŋaruaq iñuuŋaiqsuq aasii salapqitqigñiaqtuq.

⁹ Isumattutiqaqtuksrauniq kaŋiqsisiqaqtuksrauniġlu taavrumuuna iḷiruq. Tallimat malġuk niaquŋi niġrułłuum sivuniqaqtut tallimat malġugnun qimiqqanun aġnam aquppiviŋiñik.

¹⁰ Taapkua suli sivuniqaġmiut tallimat malġugnun umialiŋnun. Tallimaiŋich umialgich taapkunani umialguŋaiqsitauŋarut, atausiq umialguruq suli, igḷua qaiŋaitchuq, aasii qaigumi umialguurallaŋniaġaluaqtuq sivikitchuami.

¹¹ Aasiiḷi taamna niġrułłuk iñuuŋaruaq paŋmapak iñuuŋaiŋaruaq, tallimat piŋayuġigaat umialgich aglaan iḷauruq tallimat malġuŋnun umialiŋnun. Aasii umialguanikkumi aullaġniaqtuq suksraunġiqsauyaqtuġluni.

¹² Aasii taapkua qulit nagruich tautukkatin qulit umialgich aitchuusiaqaaniŋaitchuat suli umialguniġmi suaŋŋanmik, aglaan aitchuusiaqaġumaaqtut ataniġnaqunmik umialiktitun sivikitchuami, iluqaġmiŋ piqatigilugu niġrułłuk.

¹³ Taapkua atausiuruamik isumaqaqtut aasii aitchuutigivlugich suaŋŋatitiŋ ataniġnaqutitiglu niġrułłuŋmun.

¹⁴ Iliŋich aŋuyaŋniaqtut Imnaiyaamun, aasii Imnaiyaam ilaallu ququaqtaŋisa piksraqtaaŋisalu ukpiġnaqłutiŋ maliġuaqtauruallu ilaanun akiiḷiñiaġaich, qanuq ilaa Ataniġigaat atanġich suli Umialigigaat umialgich.

¹⁵ Isaġulgum uqallautivsaaŋagaaŋa, Imġich tautukkatin aġnam aquppivigikkaŋi sivuniqaqtut iñuŋnik iñugiapiaġataqtuanik nunauruaniglu uqausipayaaniglu.

¹⁶ Qulit nagruich tautukkatin, niġrułługlu uumikłiġñiaqtut allatuqtimik aġnamik. Iliŋisa aanniaġaat suġautapayaaŋiñik aasii qimaglugu annuġaiḷaq. Ilaisa niġiñiaġaat timaa suksraunġiġḷugulu ikipkaġlugu.

¹⁷ God-im isummiqsinŋagai kipiqqutigiyumiñaqsivḷugich taŋŋiġuglugich ilaan sivunniutini savaaġitquvlugich atisiḷutiŋ, suli niġrułłuŋmun aitchuutigivlugich suaŋŋatitiŋ atanniqsimanniŋniġmi God-im uqaluŋi taŋŋiqsiaġilugich.

¹⁸ Aġnaq tautukkan sivuniqaqtuq kamanaqtuamik iniqpaŋmik atanniqsimanniktuamik umialiŋiñik nunam.