Revelation 16 - Iñupiatun Mumiksat Uqalugiksuat

Puvialuŋaat Puggut Imalgich Qinnautaanik God-im

¹ Tavrani tusaaŋaruŋa nipaturuamik nipimik aŋaiyyuvikpaŋmiñ uqallaktuamik tallimat malġuŋnun isaġuliŋnun, Aullaġlusi kuviyaqtuqsigik nunamun tallimat malġuk puvialuŋaat puggut imaqaqtuat qinnautaanik God-im.

² Tavra sivulliq isaġulik aullaŋaruq aasii kuvivḷugu pugguni nunamun. Tavraasii tatamaanaqtuat kiiqsiuġnaqtuallu kiḷḷiġruat qaiŋarut iñuŋnun nalunaiñŋutaqtuqtuanun niġrułłuum nalunaiñŋutaŋanik qiksiksrautiqaqtuanun nanġaqługulu iñuuraqpaŋa.

³ Igḷuasuli isaġulik kuvisiŋaruq puggumiñik taġiumun, aasii taġiuq irrusiñiŋaruq auŋatun tuquŋaruam iñuum, aasii iluqaqpiuraġmik uumaruurat taġiumiittuat tuquŋarut.

⁴ Piŋayuakta isaġullak kuviŋagaa pugguni kuugnun maqsraluktuanullu imiġnun, aasii immat auguŋarut.

⁵ Tavra uvaŋa John tusaaŋagiga isaġulik ataniġnaqutiqaqtuaq immanun uqallaktuaq, Nalaunŋapiaqtutin tatavsaikavich tainna, ilivich ittuatiin inŋaruatiillu, Piḷuutaitchuatiin.

⁶ Qanuq iñuich maqipkaiŋarut auŋiññik ukpiqtuat uqaqtiŋisalu God-im, aasiiḷi ilivich aitchuŋagitin auŋmik imiksraŋannik. Tainnagaksraurutkiataŋ.

⁷ Tavra tusaaŋaruŋa nipimik ikipkaiviŋmiñ uqallaktuamik, Aaŋ, Ataniiq God Sapiġñaqtuatiin, iḷumun nalaunŋapiaqtut ilivich tatavsautitin.

⁸ Sisamaŋat isaġulgich kuvisiŋaruq puggumiñik siqiñiġmun, aasii siqiñġum ikiŋagai iñuich uunaqpaił̣ł̣uni.

⁹ Iñuich ikiŋagai suamaruam uunnaum, aasii ilaisa taimaqłuktaŋagaat atqa God-im suaŋŋatiqaqtuam tamatkunuŋa iłuiḷḷiuġutiqpaŋnun, suli iliŋich isumalitqiŋaitchut nanġaŋaitkaallu kamanaġniḷugu.

¹⁰ Tallimaŋat isaġulgich kuvisiŋaruq puggumiñik aquppiutaqpaŋanun niġrułłuum, aasii niġrułłuum atanniqsimmataa taaqsiŋaruq. Iñuich kiŋmaŋagaich uqqatiŋ kiiqsiuqpaił̣ł̣utiŋ.

¹¹ Suli uqamaqługvigivlugu God qiḷaŋmiittuaq pisigivlugich kiiqsiuġnitiŋ kiḷḷiġruatiglu, suli isumalitqiŋaitchut pigiitchuaniñ piḷġusimiŋniñ.

¹² Itchaksraŋat isaġulgich kuvisiŋaruq puggumiñik kamanaqtuamun kuuŋmun Euphrates-mun, aasii imaŋa kuugum imaiŋaruq, itqanaiqsaqługu iglauyaaksraŋat umialgich qavaŋŋamiñ.

¹³ Tavraasii uvaŋa John tautuŋaruŋa piŋasunik ilitqusiqł̣uŋnik qiññaqaqtuanik naaġaayisun pikiaqtuanik qanġaniñ nimiġiaqłuum suli qanġaniñ niġrułłuum suli qanġaniñ uqaqtauŋŋuaqtuam God-mun.

¹⁴ Tavra taapkua ilitqusiqł̣uich savaktuat aliuġnaqtuanik. Taapkua piŋasut ilitqusiqł̣uich aullaŋarut umialiŋnun nunami iluqaani ittuanun atautchimuktitchaqługich aŋuyaquvlugich kamanaqtuami uvluani tatavsautaata Sapiġñaqtuam God-im.

¹⁵ Uvva, qaiñiaqtuŋa tigligayuktitun, uqaqtuq Ataniq. Quviasugli iñuk itqumaruaq, annuġaani atuqługich aullaġuŋił̣ł̣uni annuġaiḷaġluni aasii qiñiqtinŋiḷḷuni annuġaiḷaġluni.

¹⁶ Tavra ilitqusiqł̣uich katinŋagaich umialgich inimun taggisiqaqtuamun Jew-guruat uqausiatigun Armageddon.

¹⁷ Tallimat malġuakta isaġulgich kuviŋagaa pugguni siḷamun. Tavraasii kamanaqtuaq nipi nivliŋaruq aquppiutaqpaŋmiñ aŋaiyyuvikpaŋmi, uqallakłuni, Naatchirut.

¹⁸ Tavraasii qaummatitaŋaruq igniġuuqpatitaqtuaq, nipaturuallu sukpaluich, kallularaġaqtuaġlu, nunalu aulaqpakłuni. Qaŋaunnii nuna tainnatun aulaŋaitchuq iñuk savaagumman. Taamna suaġiiññiqsrauŋaruq qaŋapak nunam aulaniŋaniñ.

¹⁹ Kamanaqtuaq iniqpak qupiŋaruq piŋasuułłuni, aasii iniqpaŋich nunauruat suksraunġiŋarut. God-im itqaŋagaa kamanaqtuaq Babylon, nuŋuutchipiaġataquvlugu qallugauraŋanik suamaruam qinnaunmi.

²⁰ Suli qikiqtapayaat qiñiġnaiŋarut, iluqaġmiglu iġġich piiŋarut.

²¹ Suli kamanaqtuat natatquġnat, uqumaisilaaqaqtuat sukautiqpaktun katagaŋarut qiḷaŋmiñ iñuŋnun. Aasii iñuich uqamaqługvigiŋagaat God pisigivlugu iłuiḷḷiuġutiqpak natatquġnanik, tatamaanaqpaił̣ł̣uni taamna iłuiḷḷiuġutiqpak.