Revelation 15 - Iñupiatun Mumiksat Uqalugiksuat

Isaġulgich Aŋalatchiruat Iłuiḷḷiuġutiqpaŋnik

¹ Tavrani uvaŋa John tautuŋaruŋa allamik aliuġnaqtuamik kamanaqtuamik qiḷaŋmi, tallimat malġuk isaġulgich piqaqłutiŋ tallimat malġugnik iłuiḷḷiuġutiqpaŋnik aqulliqsaaġutinik. Taapkuniŋa qinnautaa God-im aġiusaqtuq.

² Tavra tautuŋagiga arriḷiñaqtuaq taġiutun igalauratun iḷaŋavluni igniġmik, taapkualu akiiḷiññiktuat niġrułłuŋmik iñuuraqpaŋaniglu kisirrutaaniglu atqata. Taapkua makitaniqsut siñaani taġium igalauratun ittuam tigummivḷugich nuqaqtilgich atuqtuurat God-im aitchuutiŋi.

³ Tavra iliŋich atuŋarut atuutaanik Moses kivgaŋata God-im, atuutaaniglu Imnaiyaam uqaqłutiŋ, Ataniiq God Sapiġñaqtuatiin, qanutun kamanaqtigirut aliuġnaqtigirullu savaatin. Umialguruatiin nunapayauranun, qanutun nalaunŋatigirut iḷumun ittullu piḷġutchisin.

⁴ Kia qiksiginiaŋitpatin Ataniiq? Kia uqautigisuŋiññiaqpauŋ kamanautin? Qanuq kisivich piḷuutaitchutin. Nunauruapayaat qaiñiaqtut aasii nanġaġlutin, qanuq nalaunŋaruat piratin tautuŋagaich iluqaġmiŋ.

⁵ Taavruma aquagun uvaŋa John tautuŋagiga ilaaguaqtauruaq ini aŋaiyyuvikpaŋmi qiḷaŋmiittuami aŋmaqtuaq.

⁶ Aasii taavrumaŋŋa iḷullianiñ aŋaiyyuvikpaum iñukpalliŋarut tallimat malġuk isaġulgich piqaqłutiŋ tallimat malġugnik iłuiḷḷiuġutiqpaŋnik annuġaaŋavlutiŋ salumaruanik qaummaġiksuanik ukił̣haaġiksuanik, suli satqagutiqaqłutiŋ kaviqsuaniñ maniŋñiñ.

⁷ Tavra iḷaŋata sisamat iñuuruat savaat aitchuŋagai tallimat malġuk isaġulgich tallimat malġugnik maniŋmiñ kaviqsuamiñ piḷianik puvialuŋaanik puggunik siḷivinŋaruanik qinnautaanik God-im iñuuruam taimuŋa isuitchuamun.

⁸ Tavra aŋaiyyuvikpak siḷivinŋaruq itchimik qaumanġaniñ suaŋŋataaniḷḷu God-im. Kiñaliqaa isiġumiñaiñŋaruq aŋaiyyuvikpaŋmun naatchitchiaġilugich tallimat malġuŋnik iłuiḷḷiuġutiqpaŋnik qaġġisikkaŋiññik tallimat malġuk isaġulgich.