Revelation 14 - Iñupiatun Mumiksat Uqalugiksuat

Atuutaat Annaurrauruat

¹ Tavrani uvaŋa John qiviaŋaruŋa, aasii tautuŋagiga Imnaiyaaq makitaruaq Iġġim Zion qaaŋani, piqatiqaqłuni 144,000 iñuŋnik piqaqtuanik atiġmiñik Aapamiḷu atqanik aglausimavlugik qauŋiññi.

² Tavra tusaaŋaruŋa nipimik qiḷaŋmiñ arriqaqtuamik tusaaruni quġluqtaqpaktun kallulaqpaktuatullu. Nipi tusaakkaġa inŋaruq nipiŋisitun nuqaqtiligaqtuat atuqtuuraġmata.

³ Aasii iliŋich atuŋarut nutauruamik atuunmik sanmivḷugich umialgun aquppiutaŋi suli sanmivḷugich sisamat iñuuruat savaat umialiŋnallu. Kiapayaaq iḷitchumiñaiñŋagaa taamna atuun aglaan 144,000 iñuich annaurrauŋaruat akunġanniñ nunam iñuŋisa.

⁴ Taapkua iñuich qaunagiŋarut inmiŋnik allatuunmiñ, iliŋich tuvaaqataitchut. Iliŋisa maliġuaŋagaat Imnaiyaaq sumulliqaa aullaġman, annaurrauŋaruat akunġanniñ iñupayaat, aasii ilaaguaqtauqqaaŋarut God-mun Imnaiyaamullu.

⁵ Taapkua iñuich iḷisimanaŋaitchut saglulugich. Pasiñaġumiñaitchut.

Piŋasut Isaġulgich

⁶ Tavrani tautuŋaruŋa allamik isaġuliŋmik tiŋmiruamik qutchikł̣uni siḷami, piqaqłuni allaŋŋulaitchuamik tusaayugaaġiksuanik quliaqtuaġiraksranik iñupayauranun iñuuruanun nunami, nunauruapayaanun maŋŋuqatigiiñullu uqautchiñullu iñuŋnullu.

⁷ Tavra ilaa uqallaŋaruq nipatuvluni, Qiksiksrautiqaġitchi God-mun nanġaġlugu kamanautaagun, qanuq isivġiiñiksraŋa iñuŋnik tikitchuq. Puttitchi qiksigilugu sivuġaanun God-im savaŋaruam qiḷaŋmik nunamiglu, taġiumik maqsraluktuanik imiġnik.

⁸ Allasuli igḷua isaġulik malgutiŋaruq sivulliġmun uqallakłuni, Suksraunġiqsauruq, kamanaqtuaq Babylon suksraunġiqsauruq. Qanuq Babylon inanŋagai iñupayaurat aasii wine-tuqatigivlugich wine-ŋanik allatuutiqpaŋmi.

⁹ Allasuli piŋayuak isaġulik malgutiŋaruq taapkuŋnuŋa uqallakłuni nipatuvluni, Iñuum kialiqaa qiksigilugu nanġaqpagu niġrułłuk iñuuraqpaŋalu, suli nalunaiñŋutchiqsinŋagumi qaumigun naagga argaŋmigun,

¹⁰ ilaaptauq imiġniaġmiuq wine-ŋanik God-im qinnautaata, kuvirauŋaruamik avuuġaluaġnagu qallutaanun God-im tatavsautaan. Iluqaġmiŋ qiksiksraqtuat niġrułłuŋnik nagliksaaqtitauniaqtuq igniġmik itchimiglu tivluktuamik kakavyaŋmik sivuġaanni piḷuutaitchuat isaġulgich Imnaiyaavlu.

¹¹ Suli puyua nagliksaaqtirrutaata avyualaŋaruq taimuŋa isuitchuamun, suli iliŋich piḷaiŋaiqsiaġviitchut, uvlumi naagga unnuami, taapkua qiksiksrautiqaqtuat niġrułłuŋmun iñuuraqpaŋanullu, suli kisupayaat nalunaiñŋutchiqsittuat ilaan atqanik.

¹² Tainna piraummata taapkua iñuich, God-im iñuŋi qapiŋaisaaqtaulich igḷutuġumiñaqsiḷugich nagliksaaqtirrusiat tamatkunuŋa kamaksriruanun God-im pitquraŋiñik ukpiġutiqaqtuanullu Jesus-mun.

¹³ Tusaaŋammiuŋa nipimik qiḷaŋmiñ uqallaktuamik, Aglauttuuŋ una. Quviasuglich tuquruat tavraŋŋaaglaan savautivlugu Ataniq. Ilitqusiġiksuam kiugaa, Taamna iḷumun ittuq. Iliŋich piḷaiŋaiqsiaġniaqtut siġġaqiniġmiŋniñ, qanuq qiḷaŋmugniaqtut akiḷiusiaqaġiaġlutiŋ savaurriñiġmikkun.

Kivrivik Katitchivigḷu Nunami

¹⁴ Tavrani uvaŋa John qiviaŋaruŋa, aasii tautukługu qatiqtuaq nuvuya, aquppiruaġlu nuvuyami iñuk inniqsuaq Iġñiŋatun Iñuum, kaviqsuamiñ maniŋmiñ niaquġutilik niaqqumiñi, suli ipiktuamik kivriñmik saagaqłuni.

¹⁵ Allasuli isaġulik aniŋammiuq aŋaiyyuvikpaŋmiñ, ququulavlugu nipatuvluni taamna aquppiruaq nuvuyami, Kivriiñ kivrisiŋnik, aasii katitchiḷutin, qanuq katitchisaġviksraq tikitchuq, palauvaksrat nunami kipinaqsirut.

¹⁶ Tavra taavruma aquppiruam nuvuyam qaaŋani atuqsaŋagaa kivrisini nunamun, aasii nunami palauvaksrat katitauŋarut.

¹⁷ Tavra allasuli isaġulik aniŋaruq aŋaiyyuvikpaŋmiñ qiḷaŋmi, piqaġmiñiqsuaq ipiktuamik kivriñmik.

¹⁸ Tavrani allasuli isaġulik ataniġnaqutiqaqtuaq igniġmun qaiŋaruq ikipkaiviŋmiñ. Ilaa ququulaŋaruq nipatuvluni taavrumuŋa isaġuliŋmun ipiktuamik kivrisiqaqtuamun, Kivriiñ kivrisiŋnik, aasii katillugich siiġñaŋich napaaqtuayaaŋisa nunam, qanuq grapes kipinaqsirut.

¹⁹ Tavra isaġulgum kivrisautigiŋagaa kivrisini nunamun aasii katiłługich grape-ŋich napaaqtuayaat, aasii miḷuqsautivlugich iḷuanun kamanaqtuamun wine-liuġvianun qinnautaata God-im.

²⁰ Tavra wine-liuġviŋmi grapes ivsaiyaŋagaich siḷataani iniqpaum, aasii auk maqiŋaruq wine-liuġviŋmiñ 200 mile-tun aasii tallimatun isigagniqtun ititigivluni.