Revelation 13 - Iñupiatun Mumiksat Uqalugiksuat

Malġuk Niġrułłuuk

¹ Tavra uvaŋa John tautuŋaruŋa niġrułłuŋmik qakiruamik taġiumiñ, qulinik nagrulik aasii tallimat malġugnik niaquqaqłuni. Taapkunani qulini nagruŋiñi niaquġutillaat inŋarut, suli niaqullaaŋiñi aglautiŋavlutiŋ uqamaqłuutit atqich pisaaŋŋatauruat God-mun.

² Tavra niġrułłuk tautukkaġa inŋaruq leopard-tun, isigaŋiasii nannum isigaŋisun, aasii qanġa lion qanġatun iłłuni. Tavra nimiġiaqłuum aitchuŋagaa niġrułłuk suaŋŋanmiñik aquppiutaqpaŋmiñiglu kamanaqtuamiglu ataniġnaqunmik.

³ Iḷaŋat niaquŋisa qiññaqaŋaruq tuquagun ikiḷḷiiratun, aglaan taavruma tuquagun ikiŋa mamititauŋaruq, aasii iñupayaurat nunami maliġuarraqsiŋagaat niġrułłuk kamasuuttaġivlugu.

⁴ Iluqaġmiŋ iñuich qiksigiŋagaat nanġaqługulu nimiġiaqłuk, qanuq ilaa aitchuiŋaruq ataniġnaqunmiñik niġrułłuŋmun, suli ilaisa tainnatun piŋammigaat niġrułłuk, uqaqłutiŋ, Kiña itpa niġrułłuktun, suli kia aŋuyakkumiñaqpauŋ?

⁵ Tavra niġrułłuk uqaqtitauŋaruq pigiipiaġataqtuanik uqaluŋnik, suli ataniġnaqutiqaqtitauvluni malġukipiaq malġugni tatqiñi.

⁶ Taavruma uqamaqłuutigirraqsiŋagaa God atqalu, God-ivlu iñuuvia taputivlugich iñupayaurat iñuuruat qiḷaŋmi.

⁷ Suli aŋuyaktitauŋaruq God-im iñuŋiñun suli akiiḷivḷugich. Tavraasii ataniġnaqusiqsauŋaruq tamatkunuŋa maŋŋuqatigiipayaanun iñuŋnullu uqautchiñullu nunauruanullu.

⁸ Suli iluqaġmiŋ iñuuruat nunami qiksiginiaġaat nanġaġlugulu, iñupayaat atiŋich aglausimaŋitchuat sivuani nuna savaaguŋaiñŋaan makpiġaaŋiññi iñuuruat pigikkaŋisa Imnaiyaam tuqutauŋaruam.

⁹ Kiñaliqaa siutiqaġumi tusaggatiksraŋnik, naalaġniḷi.

¹⁰ Kiñaliqaa tigurauniaġumi, tigurauviŋmugniaqtuq. Kiñaliqaa iñuaqtauniaġumi, nalupqinaitchuq iñuktauniaqtuq savikpagaġlugu. Taamna pikpan, God-im iñuŋi igḷutuutiruksraurut ukpiġutiqaqtuiññaġlutiglu.

¹¹ Tavrani uvaŋa John tautulgitchuŋa allamik niġrułłuŋmik salapqiqsuamik nunamiñ. Malġugnik nagruqaġniqsuaq imnaiyaatun aasii uqausiqaqłuni nimiġiaqłuktun.

¹² Aŋalatchiŋaruq sivullium iluqaanik ataniġnaqutaanik niġrułłuum takkuani, aasii iluqaġmiŋ iñuuruat nunami qiksiksraliŋarut nanġaqługulu sivulliq niġrułłuk, tuquagun ikiḷḷiirauŋaruaq mamititauŋaruaq.

¹³ Taamna aqulliq niġrułłuk savaŋaruq kamanaqtuanik aliuġnaqtuanik, igniq unnii atqaqtitaqługu qiḷaŋmiñ nunamun takkuanni iñupayaat.

¹⁴ Aasii aliuġnaqtuatigun savaaġipkaqtitakkaŋisigun ilaanun sivuġaani sivullium niġrułłuum, sagluqiŋagaich tamatkua iluqaisa iñuuruat nunami. Aqullium niġrułłuum uqallautiŋagai iñupayaurat nunami iñuuraqpalitquvlugich qiksigiliġḷugu niġrułłuk ikiḷḷiirauŋaruaq savikpaŋmik aasii iñuuŋaiŋił̣ł̣uni.

¹⁵ Aasii taamna aqulliq niġrułłuk suaŋŋatiqaŋaruq qaitchiḷḷavluni iñuggunmik iñuŋŋuaŋanun niġrułłuum, taamna iñuuraqpaŋa niġrułłuum uqallasivḷugu suli tamatkua iñugiaktilaaŋatitun qiksiksrautaitchuat nanġaisuŋitchuallu iñuuraqpaŋanun niġrułłuum tuqutautquvlugich.

¹⁶ Suli taavruma aqullium niġrułłuum nalunaiñŋutchiqsinniaġai taliqpiŋisigun argaŋisa naaggaunnii qauŋisigun iluqaisa iñuich kamanaitchuallu kamanaġaluaqtuallu, suġalliruallu iḷiappaugaluaqtuallu, atanġitchuallu kivgallu.

¹⁷ Kiñaliqaa tauqsiġumiñaiññiaqtuq naagga tunisiyumiñaiññiaqtuq nalunaiñŋutchiqsauŋaisuaġumi taavrumiŋa, atqanik niġrułłuum naaggaunnii kisirrutaanik atqata.

¹⁸ Kaŋiqsisiqaqtuksrauniq ittuksrauruq taavrumuuna. Iñuk kaŋiqsisiqaqtuaq kisitchiḷi kisirrutaanik niġrułłuum. Taamna kisirrutigigaa iñuum, kisirrutiqaqtuaq 666-mik.