Revelation 12 - Iñupiatun Mumiksat Uqalugiksuat

Aġnaġlu Nimiġiaqługlu

¹ Tavra kamanaqtuaq aliuġnaq salapqiŋaruq qiḷaŋmi. Aġnaq annuġaalik siqiñiġmik, tatqiq isigaŋisa ataaniiłłuni, suli niaqqumiñi niaquġutiqaqłuni qulit malġugnik uvluġianik.

² Iġñiyasiñiqsuaq kiiqsiuqłuni iġñiñialakami nipaalaŋaruq.

³ Aasiisuli alla aliuġnaqtuaq salapqiŋaruq qiḷaŋmi. Uvva kamanaqtuaq kaviqsuaq nimiġiaqłuk, tallimat malġugnik niaqulik aasii qulinik nagruqaqłuni, aasii tallimat malġugnik niaquġutiqaqłuni niaqqumiñi.

⁴ Ilaan pamiuŋan kaligaŋagai piŋayuiŋich uvluġiaŋisa qiḷaum, aasii miḷuqsautivlugich nunamun. Tavra nimiġiaqłuk makitaŋaruq sivuġaani aġnam iġñisaġumaaqtuam, niġisukługu miqłiqtua anipqauraqpan.

⁵ Aġnaq iġñiŋaruq aŋunmik, atanniqsimannigniaqtuamik suaŋŋatiqpaqapiaġataġluni nunapayaanun, anauttaqaġluni savił̣hamik umialgum anauttaŋanik. Tavra ilaan miqłiqtua nuqitauŋaruq God-mun aquppiutaqpaŋiñullu.

⁶ Aasii aġnaq pigruŋaruq nunagluktuamun, iniksriuqtaŋanun God-im ilaanun. Tavrani munaqqusiaqaqtuksrauniaqłuni 1,260 uvluni.

⁷ Tavra aŋuyaksaŋarut qiḷaŋmi, Michael-lu isaġuliŋniḷu aŋuyakługu nimiġiaqłuk, nimiġiaqłuktauq aŋuyagmipkaqługu piqatigivlugich isaġuliŋni.

⁸ Tavra nimiġiaqłuk akiiñŋaruq aasii ilaalu isaġuliŋniḷu iniksraiqsauŋarut qiḷaŋmi tavraŋŋaaglaan.

⁹ Tavra kamanaqtuaq nimiġiaqłuk igitauŋaruq anmun. Taamna aippaaġnisaq nimiġiaq, atiqaqtuaq Tuunġaġmik Satan-miglu, sagluqiraqtiŋat iñupayaurat nunami. Ilaa igitauŋaruq nunamun, suli isaġuliŋi igitqatauŋarut.

¹⁰ Tavra tusaaŋaruŋa nipaturuamik nipimik qiḷaŋmi, uqallaktuamik, Paŋmapak annaurrisaa God-im tikitchuq. Paŋmapak God-im iḷisimanaqsigaa suaŋŋatini Umialguniġmiñi. Paŋmapak Christ-ŋata iḷisimanaqsigaa ataniġnaqutini, qanuq saŋutiŋat aniqatiipta igitauruq anmun, saŋutchiugaqtuaq iliŋiññik uvlumiḷu unnuamiḷu sivuġaani God-ipta.

¹¹ Aniqatiipta akiiḷiŋagaat saŋutiktiŋ, Satan, tuqutauŋaniŋagun Imnaiyaam auŋa maqivluni, iliŋisalu ukpiġnaqtuaguvlutiŋ quliaqtuaġniġmikkun iḷumun ittuamik, qanuq tuqutauniksraqtiŋ sugiŋaitkaat.

¹² Tavraasii quviasukpagitchi iluqasi iñuuruasii qiḷaŋmi. Aglaalli isumaaġutiqpak ilivsiññun, nunaa taġiuġlu qanuq Tuunġaum atqaqigaasi qinnautiqpaqaqłuni, qanuq iḷisimaruq piviksrani sivikłisilaaŋanik.

¹³ Tavra nimiġiaqłuum iḷitchuġikami siŋitautilaamiñik nunamun, ilaan maliqatarraqsiŋagaa aġnaq iġñiŋaruaq aŋugauramik.

¹⁴ Tavra aġnaq aitchuusiaqaŋaruq malġugnik kamanaqtuam tiŋmiaqpaum isaqqugnik tiŋitquvlugu nimiġiaqłuŋmiñ nunagluktuamun. Tavrani ini ilaa qaunakkusiaqaġniaqtuq piŋasuni iḷalugich avvaġmik ukiuni.

¹⁵ Tavra nimiġiaqłuk kuvisiŋaruq imiġmik kuuktun qaniġmiñiñ aġnam tuŋaanun, uaqtitchukkaluaqługu ulittuamun.

¹⁶ Tavra nuna ikayuiŋaruq aġnamik, aasii nuna qupiŋaruq, imaq aasii imaiqł̣uni qaiŋaruaq nimiġiaqłuum qanġaniñ.

¹⁷ Tavrani nimiġiaqłuum suammautiŋagaa aġnaq, aasii aullaqłuni aŋuyagiaŋagai kisiŋŋuqtaŋich miqłiqtuŋisa, tamatkua kamaksriruat pitquraŋiñik God-im suli ukpiġniaqtuaguruat iḷumun ittuamun salapqikkaŋanun Jesus.

¹⁸ Aasiiḷi nimiġiaqłuk makitaŋaruq taġium siñaani.