Revelation 11 - Iñupiatun Mumiksat Uqalugiksuat

Malġuk God-im Uqaqtik

¹ Tavrani aitchuusiaqaŋaruŋa uuktuunmik ayauppiatun ittuamik, aasii uqallaurrauŋaruŋa, Makillutin uuktuġuŋ aŋaiyyuvikpaŋa God-im ikipkaivigḷu iñugiaktilaaŋallu taapkua aŋaiyyuruat tavrani.

² Aglaan uuktuġnagu siḷalliq kasimmavik siḷataani aŋaiyyuvikpaum. Taamna iḷaginagu, qanuq aitchuutauŋaruq Jew-guŋitchuanun, aasii ilaisa tunmaluginiaġaat ilaaguaqtauŋaruaq iniqpak God-mun malġukipiaq malġugni tatqiñi.

³ Aasii uvaŋa tiliñiaġikka malġuk uqaqtikka annuġaaqaġlugik miitchuŋnik ukił̣haanik, aasii iliŋik suaŋŋasiqsauniaqtuk alġaqsruiyumiñaqsiḷugik taapkunani 1,260 uvluni.

⁴ Taapkuak malġuk uqaqtik God-im malġuk Olive napaaqtuk malġuglu qulliqaġviik naparuak sivuġaani Atanġata nunam.

⁵ Tavraasii kialiqaa anniaġumasaġaluaqpagik, igniq pikiaġaqtuq qaniŋiŋniñ aasii suksraunġiqł̣ugich uumigiriŋik. Kialiqaa anniaġumasaġaluaġmagik, ilaa tuqutauruksraġuġaqtuq.

⁶ Suaŋŋatiqaġmiuk sialukkumiñaiḷḷavlugu uvluŋiññi alġaqsruiñiġmiŋ, suli suaŋŋatiqaqłutiŋ imiġnun auguqtillavlugich. Suli suaŋŋasiqsauŋaruk nuna qanusipayaanik iłuiḷḷiuġutiqaqtillavlugu, qanutun akulaisigilugu pisukkumik.

⁷ Tavraasii iliŋikta naatanikpatku uqaqtuaġniqtik, niġrułłuum mayuqtuam mitaiḷamiñ putumiñ aŋuyagniaġik aasii akiisillugik tuqullugiglu.

⁸ Aasii timiŋik nalaniaqtuk apqutiŋiñi iniqpaum Atanġata kikiaktuurrauviani aŋarrauramun. Taamna iniqpak atiqaqtuatun inmiuq Sodom-mik naagga Egypt-mik.

⁹ Tavra piŋasuni uvluni avvaġmik iḷavlugich iḷaŋich iñuich maŋŋuqatigiipayaaniḷḷu uqautchiñiḷḷu nunauruaniḷḷu takunnaŋagaich tuquŋaruak timiŋik, iḷuviquŋiñmivḷugik.

¹⁰ Tavraasii tamatkua iñuuruat nunami quviasualaniaqtut pisigilugik tuquruak taapkuak. Iliŋich quviasualaniaqtut aatchuqtuutilutiglu avanmun, qanuq taapkuak uqaqtiŋik God-im nagliksaaqtitchiŋaruk tamatkuniŋa iñuuruanik nunami.

¹¹ Tavra uvlut piŋasut avvaġmik iḷaqaqłutiŋ pianiŋmata, God-im aniġniŋan iñuggutim isiŋagik, aasii iliŋik makinŋaruk, tavraasii iñuich tautuktuat taapkuŋniŋa iqsiḷipiaġataŋarut.

¹² Tavra malġuk taapkuak God-im uqaqtik tusaaŋaruk nipatuvluni nivliqsuamik qiḷaŋmiñ uqallaktuamik ilimiŋnun, Mayuġitchik. Tavra takkuanni uumigirimiŋ iliŋik mayuŋaruk qiḷaŋmun nuvuyakun.

¹³ Tavra tavrauvvaa nuna aulaqpaŋaruq, aasii quliŋŋuġutiŋich iniqpaum ulġuŋaruq, aasii 7,000 iñuich tuqutauŋarut nuna aulamman, aasii kisiŋŋuqtauruat iñuich tatamaatchaŋarut aasii nanġaqługu kamanaqtuaq God qiḷaŋmiittuaq.

¹⁴ Igḷua iłuiḷḷiuġutiqpaum pilluaniktuq. Aglaan tautuksiuŋ, piŋayuak iłuiḷḷiuġutiqpaak qaiyasiuraqtuq.

Tallimat Malġuat Nipauqłuktautit

¹⁵ Tavrani tallimat malġuat isaġulgich nipauqłuktaŋaruq. Aasii nipatuvlutiŋ nipit nivliŋarut qiḷaŋmi uqaqłutiŋ, Umialgutaa nunam umialgutigiliutigaa Atanipta Christ-ŋatalu aasii ilaa atanniqsimanniŋniaqtuq taimuŋa isuitchuamun.

¹⁶ Tavra iñuiññaq sisamat umialiŋnat aquppiruat aquppiutaqpaŋmiŋni sivuġaani God-im sitquqłutiŋ punŋarut aasii nanġaqługu God,

¹⁷ uqaqłutiŋ, Ataniiq God Sapiġñaqtuatiin, paŋmapak ittutin, inŋaruatiillu, quyyavigigiptigiñ iḷitchuġipkaqapku kamanaqtuaq suaŋŋatin Atanniqsimanniksaqaviḷḷu.

¹⁸ Nunauruat akiḷḷiḷiqsuutiruat iliŋnun qinnalipiaġataŋarut, qanuq tatavsaiñiksran tikitchuq, isivġiqsauviksraŋat tuquŋaruat tikitchuq, suli akiḷiusiaqaġviksraŋat kivgaqpich uqaqtit tikitchuq, iluqaġmiglu iñukpich kamanaqtuallu kamanaitchuallu, qiksiksrautiqaqtuallu iliŋnun. Suksraunġiqsauviksraŋat tikiñmiuq tamatkua maqutchiruat nunamik.

¹⁹ Tavrani aŋaiyyuvikpaŋa God-im aŋmaŋaruq qiḷaŋmi, suli Kiguunniŋa God-im imaqaqtuaq God-im sivunniuġutiŋiñik iñuŋmiñun qiñiġnaŋaruq iḷuani aŋaiyyuvikpaum, aasii qaummaatitaŋaruq igniġuuqpatitaqtuaq, nipaturuallu sukpaluktuat, kallularuaġlu, nunalu aularuaq, natatquġnasugruktuaġlu.