Revelation 10 - Iñupiatun Mumiksat Uqalugiksuat

Isaġulik Immuaġurallu Makpiġaat

¹ Tavra uvaŋa John tautuŋalgitchuŋa allamik sapiġñaqtuamik isaġuliŋmik atqaqtuamik qiḷaŋmiñ maġġusimavluni nuvuyami, rainbow-m qaumanġanik kaivallagutiqaqłuni niaqua. Ilaan kiiñaŋa siqiñiqtun inŋaruq, aasii niuŋik ayyaktun igniġuvlutiŋ.

² Ilaa piqaŋaruq immuaġuranik aŋmavlugich makpiġaanik saagaqługich. Tavra ilaan inillaŋagai taliqpiich isigaŋni taġiumun, aasii saumiich isigaŋni nunamun.

³ Aasii ququulaŋaruq nipatuvluni, lion-tun ugiallaruatun. Ququulaaniŋman tallimat malġuk kallulavlutiŋ kiuŋagaat.

⁴ Tavra tallimat malġuk kalluich nivlianiŋmata, aglaksaġumaŋaruŋa. Aglaan tusaaŋaruŋa uqallaktuamik qiḷaŋmiñ, Iḷisimanaqtinnagich tallimat malġuk kalluich uqalugikkaŋich suli aglautinagich.

⁵ Tavraasii isaġulik tautukkaġa makitaruaq taġiumi nunamiḷu isaaŋaruq taliqpiŋmiñik qiḷaŋmun,

⁶ aasii kiliŋniŋaruq pisivlugu God iñuuruaq taimuŋa isuitchuamun, savaŋaruaq qiḷaŋmik suniglu qiḷaŋmiittuanik, nunamiglu nunamiittuaniglu, taġiumiglu taġiumiittuaniglu. Isaġulik uqallaŋaruq, God piñatchiaŋaiqsaqtuq tavraŋŋaaglaan.

⁷ Tavra tallimat malġuat isaġulgich nipauqłuktaqpan, God-im naanniaġaa kaŋiqsiñaiñŋaruaq sivunniuġutigiŋarani uqautigiŋarani kivgamiñun uqaqtigiŋaramiñun.

⁸ Tavrani tusaaŋakkaġa uqallaktuaq qiḷaŋmiñ uqallatqiŋaruq uvamnun, Aullaġiñ, tiguyaqtukkich immuat makpiġaat aŋmaruat argaŋiñi isaġulgum makitaruam taġiumiḷu nunamiḷu.

⁹ Tavra ullautiŋaruŋa isaġuliŋmun aasii apiġivlugu qaitquvlugich uvamnun immuaġurat makpiġaat, aasii ilaan uqallautiŋagaaŋa, Tigulugich niġikkich. Siiġḷanŋulatchiñiaġaluaġaatin aqiaġuġni, aglaan siiġñaaġniaqtuq honey-sun qaniġni.

¹⁰ Tavra tiguŋagitka immuaġurat makpiġaat argaŋiñiñ isaġulgum aasii niġivḷugich. Siiġñaaqtigiŋarut qanimni honey-sun, aglaan niġianikapkich aqiaġuġa siiġḷanŋuliŋaruq.

¹¹ Tavraasii uqallaurrauŋaruŋa, Alġaqsruivsaaqtuksraurutin God-im uqaluŋiñik iñugiaktuatigun iñuktigun nunauruatigullu qanusiḷimaaniglu uqausiqaqtuatigun, umialiktigullu.