Psalms 98 - Iñupiatun Mumiksat Uqalugiksuat

God-im Atanniqsimaaġaa Nuna

Psalm.

¹ Atuġitchi nutaamik atuunmik Ataniġmun; qanuq ilaa savaŋaruq aliuġnaqtuanik! Suaŋŋatiqpagmiñik salumaruamik akimmatiqaŋaruq.

² Atanġum annaurrautilaani iḷisimanaqtinŋagaa; suli nalaunŋaruagutilaani iḷisimanaqtiłługu nunaqpauruanun.

³ Taŋŋiŋagaa unniqsuqłiisini Israel-gum kiŋuvaaŋiññun iḷumutuuġutikullu ataramiglu nakuaqqunmigun. Iñupayaurat sumiḷiqaa qiñiŋagaat akimmataa God-ipta.

⁴ Avaalauġitchi Ataniġmun nunapayaat, attualasitchi quviasuunmi nipaalavlutik!

⁵ Atuġitchi nanġautinik Ataniġmun! Atuqtuuraġlusi nuqaqtilignik,

⁶ qalġuqtautiniglu nipauqłuktautiniglu, nipaalaqpakhutiŋ quviasuunmik Ataniġmun, Umialiptignun.

⁷ Qaiġuatitaġli taġiuq, taġiumiittuapayaallu; nunapayaaġlu, iñuupayaaqtuallu nunami!

⁸ Pattakulalich kuuguruat; qimiqqallu atautchikun atuġlich quviasuglutiŋ

⁹ sivuġaani Atanġum, qaiñiaqtukkii atanniqsimayyaġlugu nuna. Isivġiġniaġaich iñuŋich nunam pitqiksiġautaitchuakullu nalaunŋaruakullu.