Psalms 97 - Iñupiatun Mumiksat Uqalugiksuat

God Qaukłiuvluni Atanniqsuiri

¹ Ataniq umialguruq, nuna quviasugli! Quviatalasitchi, taġiuġmiuguruasii!

² Nuviyallu taaqtuavlu avanŋagaak; atanniqsuirauruq nalaunŋaruakun suli pitqiksiġautaitchuakun.

³ Igniq sivuġaanuktuq aasii ikipkaqugich akiḷḷiiŋich avatiŋaniittuat.

⁴ Igniġuuqpatirrutaata qaummaġiksiraġigaa nuna; nunam tautukkamiuŋ uuliksiraqtuq.

⁵ Iġġich aukkaich patiquraliaksratun sivuġaani Atanġum, sivuġaani Atanġuruam nunapayaamun.

⁶ Qiḷaich iḷsimapkaġaat nalaunŋaruagutilaaŋa, suli iluqaġmiŋ nunaqpauruat qiñiġaat ilaata qaumanġa.

⁷ Kiñapayaaq aŋaiyyusuuruaq iñuuraqpagnun kanŋunaqsiḷiqtauruq, kamanniraaqtuat iñuuraqpagnun— pullich sivuġaanun Atanġum, iñuuraqpauruasii.

⁸ Iñuŋich Zion quviasuktut, suli iniqpaŋich Judah-m quviattalarut isivġiutitin pisigivlugich, Atanġuruatiin.

⁹ Ataniiq Sapiġñaqtuaguruatiin, atanniqsimagiñ nunapayaaq; Qutchiksuagułhaaqtutin iluqaiññiñ god-auruaniñ.

¹⁰ Nakuaqsriruat Ataniġmik, uumigilirruŋ pigiitchuaq; munaġiraġigaich iñuusiŋich piŋitqataalaitchuat annautivlugiḷḷu suaŋŋataanniñ pigiiḷḷiqirauruat.

¹¹ Qaumaniq tunŋaraqtuq iluaqtualiqirauruanun, suli quviasuun nakuuruanun.

¹² Quviasugitchi Ataniġmi iluaqtualiqirauruasi, quyyatiqaġlusi atqanun salumaruamun.