Psalms 96 - Iñupiatun Mumiksat Uqalugiksuat

God Qutchigñiqtauruaq Umialik

¹ Atuġitchi nutauruamik atuunmik Ataniġmun! Atuġitchi Ataniġmun, iluqasi nunamiittuasii!

² Atuġitchi Ataniġmun, nanġaqsiuŋ atqa! Iḷisimapkaqsiuŋ uvluġaġikpan tusaaraksralluataq ilaata annautiŋammatigut.

³ Iḷisimapkaqsiuŋ qaumanġa nunaqpauruanun, aliuġnaqtuat suaŋŋanmiñik savaaŋich iñupayaanun.

⁴ Ataniq kamanaqtuaguruq suli nanġaqtaksraupiaqtuq; qutchiksuaġiłhaaqtaksrauruq allaniñ god-auruaniñ.

⁵ Allat god-auruat allani nunaqpaupayaaqtuani iñuuraqpałhiñaurut, Atanġum aglaan savaŋagaich qiḷaich.

⁶ Qaumaniġuvlu kamanautivlu avanŋagaak; suaŋŋanmiglu qiñiyunaqtuamiglu immiŋaruq Aŋaiyyuvikpaŋa.

⁷ Nanġautiqaġitchi Ataniġmun, iñupayaat nunamiittuasii; nanġaqsiuŋ qaumaniŋagun suli suaŋŋataagun.

⁸ Nanġaqsiuŋ Atanġum qaumanġuruaq atqa; aitchuutiligaaġlusi qaisitchi Aŋaiyyuvikpaŋanun.

⁹ Nanġaqsiuŋ Ataniq qaumanġa salumaruaguniŋata; uuligitchi sivuġaani, iluqasi nunamiittuasii!

¹⁰ Uqautilugich nunaqpauruat, “Ataniq umialguniḷugu! nuna inillaktauŋaruq payaŋaił̣ł̣ugu suli aulayyagnaġumiñaitchuq; isivġiġñiaġaich iñuich nalaunŋaruakun.”

¹¹ Qiḷaich quviasuglich, nunalu quviasugli; taġiuq nipatusiḷi, niġrutipayaallu taġiumiittuat;

¹² quviasugitchi nautchiiviuruasii, supayaallu iliŋniittuat! Napaaqtuuruamiḷu napaaqtut nipaalalich quviasuglutik.

¹³ Savaapayaaq quviasugli sivuġaani Atanġum, qaigumikii qaiñiaqtuq atanniqsuġiaġlugu nuna, Ilaata aŋalanniaġaich iñuŋich nunam iluaqtuakullu iḷumun ittuakullu.