Psalms 95 - Iñupiatun Mumiksat Uqalugiksuat

Atuun Nanġautikun

¹ Qaiḷusi, nanġaġlakput Ataniq! Quviasugluta atuqta uyaġauruamun annaurriptinnun!

² Ullautisa saaŋanun quyyatiqaġluta suli atuġluta quvianaqtuanik nanġautinik.

³ Atanikkii God-auruq suaŋŋatiqaqtuaguvluni, umialik qutchigñiqsrauruaq god-ipayaaniñ.

⁴ Atanniqsuġaa nunapayaaq, itiniqsraŋiññiñ iḷuata nunam qutchigniqsraŋiññun iġġich.

⁵ Taġiuq atanniqsuġaa, ilaata piḷiaġivlugu; nunaptauq, argamiñik piḷiaŋa.

⁶ Qaiḷusi, purvigilakput suli nanġaġlugu ilaa; sitquġluta sivuġaanun Atanġum, Savaŋaruam uvaptinnik!

⁷ Qanuq ilaa God-igigikput; uvagut ilaan qaunagigaatigut, iluqata imnait naamapkaġaatigut. Uvlupak naalaġnisiuŋ:

⁸ “Siqquqsipkaġnasiuŋ uummatiksi, piusiŋatitun maŋŋuvsi Meribah-mi, piḷġusiatitun taiptumani uvlumi Massah-mi nunagluktuami.

⁹ Taikani kiŋuniivsi uuktuŋagaanŋa, qiñiŋagaluaqłutigluuvvaa savaamnik.

¹⁰ Malġukipiani (40) ukiuni qinnautiŋagitka taipkua kiŋuniġiiguruat. Uqallaŋaruŋa, ‘Iḷumutuuġutaiññiaġaatiin! Kamaksrisuŋiñŋarut piraksriutimnik.’

¹¹ Qinnaliŋaruŋa aasii unniqsuqłiivḷuŋa: ‘Isiġataġumiñaitchusi nunamun unaŋuiqsiġviksrautikkaluavsiññun.’”