Psalms 94 - Iñupiatun Mumiksat Uqalugiksuat

God Isivġiqsuiruq Iluqaiññun

¹ Ataniiq God, akisaurrisuuruatiin, qiñiqtirruŋ qinnautin.

² Isivġiqsaurutin iluqaptinnun nunami; makillutin tatavsakkich arguaŋaruat!

³ Qakuguaglaan sivisutigiruamik, Ataniiq, qakuguaglaan sivisutigiruamik pigiiḷḷiqirauruat kamaniraagniaqpat?

⁴ Qanutun sivisutigiruamik pigiiḷḷiqirit arguaŋaaġniaqpat kamasaaġutigiaqsiḷugich aasii killukun savaatiŋ?

⁵ Anmuksruġaich iñuktin, Atanġuruatiin; nagliksaaqtitaġigaich ilvich nanmiñiq iñuktin.

⁶ Iñuaqtuqtut uiḷgaŋaruanik iglaaguruaniglu; iñuaqtuqtut aŋayuqaagitchuanik.

⁷ Uqaġaqtut, “Atanġum tautulaitkaatigut; God-iŋata Israel-gum qaunagiŋitkaatigut.”

⁸ Iñugiramaaŋ, qanuqłusiimña isumalluaġiisigivisi? Qakuguimña isumatusiñiaqpisi?

⁹ God-im siutiliuŋaraatigut—tusaayumiñaitpa? Irivut ilaata savaaġiŋammigaich—tautukkumiñaitpa?

¹⁰ Natqiksruiḷḷaruaq nunaqpagnik—tatavsautiqaġumiñaitpa? Iḷisaurriuruaq iñupayaanun—iḷisimmataitpa?

¹¹ Atanġum iḷisimagaich isumagiravut; iḷisimaruq asiḷiqqutautilaaŋat isumalaaġutigirapta.

¹² Ataniiq, qanutun quviasuktigiva iñuk natqiksruqtan, suli iḷisautiran pitquraġnik!

¹³ Unaŋuiqsiaġviqaqtittaġigitin isumaaluutiŋiññiñ nivaanigataqtillugich iḷuqsramik pisaġisaġlugich pigiiḷḷiqirauruat.

¹⁴ Atanġum ayyaktuġniaŋitkai iñuni; ilaata suksraaġniaŋitkaich ilaan iñuni.

¹⁵ Pitqiksiġautairrun iḷitqigñiaqtuq isivġiġvigñi, suli nalaunŋarualiqiraupayaaqtuat tunulliḷiqsuġniaġaat.

¹⁶ Kia makilluni ikayuġniaqpaŋa akiḷḷiqsruġupkich pigiiḷḷiqirauruat? Kia piqasiqsuġniaqpaŋa akiḷḷiġigupkich piḷuktuat iñuich?

¹⁷ Atanġum ikayuŋaisuaqpaŋa, akkupaiññaq nipaiŋagayaqtuŋa tuqqunmi.

¹⁸ Uqallakkama, “Kataaqsiruŋa”; nakuaqqutikpich ittuam ataramik makitapkaġaġigaaŋa, Ataniiq.

¹⁹ Uŋiarikama suli isumaalukłuŋa, araguugigma aasii quviatchaktiłłuŋa.

²⁰ Iḷḷatisuitchutin isivġiqsirinun maqutchiruanun, iluaqtuaguŋitchuat pitquraġuqługich,

²¹ atautchimunmukłutiŋ akiḷḷiġiraġigaich iluaqtualiqiruat aasiiñ tatavsaqtaksriuqługich tuqqunmun patchisaitchuat.

²² Aglaan Ataniq qaunaksriga; suli God uyaġauruaq annaksaġvigisuugiga.

²³ Tatavsaġniaġaich pisigilugu piḷuktualiqiniŋat; suksraunġiġḷugich piḷuutiŋich pisigilugich; Atanġum God-ipta suksraunġiġñiaġaich.