Psalms 91 - Iñupiatun Mumiksat Uqalugiksuat

God Munaġirikput

¹ Kiñaliqaa uqqisimaaqtuaq Ataniġmi Qutchigñiqtauruami, minġuiqsiġñiaqtuq taġġaŋani Sapiġñaqtuam,

² ilaan uqallautiginiaġaa Ataniq, “Annaksaqtuġvigigiga suli munaqsrigivlugu God ukpiqsimaaġviga.”

³ Iḷumutun annautiniaġaatin nalunaqtuaniñ nigatchianiñ suli iluqaiññiñ naŋirrutiqpagniñ tuqunaqtuaniñ.

⁴ Ataaniitinniaġaatin isaqqugmi; anayanniuġniaŋitchutin munaqqutaani; Iḷumun ittuaguniŋa akkiaġautiginiaġiñ suli annaksimaaġvigilugu.

⁵ Iqsisiqaġniaŋitchutin tatamaanaqtuaniñ unnuami, naakkaunnii pisiksautigiraŋiññiñ uvlumi;

⁶ naakkaunnii naŋirrutiqpagniñ tuqunaqtuaniñ aquliraqtuaq taaqsimman naakkaunnii piaġiitchuaniñ tuquttaisuuruaniñ qitiqqaġman uvluq.

⁷ 1,000-guruat ulġuġaalaniaqtut saniġaġni, 10,000-gich avatigni, aglaan qalliñiaŋitkaatin unnii.

⁸ Tauktuksiññaġniaġitin pigiiḷḷiqirauruat tatavsaqtaukpata.

⁹ Atanġuruaq annaksaġviḷiutiŋagiñ, Qutchigñiqsrauruaq nayuqtualiŋagiñ,

¹⁰ pigiitchuapayaam piñiaŋitkaasi, naakkaunnii iluirrutiqpaich qalliñiaŋitkaat aimaaġvigiran.

¹¹ God-im piraksriġñiaġaich isaġuliñi munaġitqulusi sumupayaaġaluaġuvsi.

¹² Isaġulġich tiġummiñiaġaasi argagmigñik isikkaaquŋiḷḷusi uyaġagnun.

¹³ Tunmalugniaġitin lion-gich nimiġiallu, iqsiñaqtuat lion-paich nimiġiallu tuqunaqtuat.

¹⁴ God uqaqtuq, “Annautiniaġitka piqpaksriruat uvamnik suli munaġiniaġitka iḷisimaruat Atanġutilaamnik.

¹⁵ Ququullavigikpanŋa, kiuniaġitka; isumaaluunmun tikitpata, itqatiginiaġitka. Annautiniaġitka qutchiksiḷiġlugiḷḷu.

¹⁶ Akiḷiusiaqaqtinniaġitka sivisuruamik iñuggunmik; Annautiniaġitka.”