Psalms 90 - Iñupiatun Mumiksat Uqalugiksuat

Sisamaŋat Makpiġaat Psalms-mi ( Psalms 90—106 ) God-ikun Iñuktigullu

Aŋaiyyutaa Moses, iñuŋata God-im.

¹ Ataniiq, qaŋapak tavra irvigisuugiptigiñ kiŋuniġiipayaaqtuani.

² Iġġich savaaguŋaiñŋaisa naakkaunnii nuna iluqaan savaŋaiñŋaan, isuaniñ qaŋa God-aurutin isuanun aglaan.

³ Iñuich avyuġuqtitqiksittaġigitin, uqaqłutin, “Utiġitchi avyuġutqiġḷusi iñuuruasii.”

⁴ 1,000 ukiut ittut atausitun uvlutun iligni; arriqaqtut unnugmatun, sivikitchuatun kiavallagniqtun.

⁵ Uaġaġigiptigut uliqpaktun; siññaktuqtiqsiññaqtuatun ittaqtugut. Ivigaatun ittugut nausaqtuatun uvlaami;

⁶ nauvluni ivigaaġuġaqtuq, aasii panaqłukługu tuqulimmivḷuni anaqammagu.

⁷ Qinnautikpich suksraunġiġaġigaatigut; tatamaalaraqtugut iqsigivlugu qinnautiqpaiñ.

⁸ Inillaŋagitin piḷuutivut sivuġaġnun, nalunaqtuami piḷuusiqiavut tautukkumiñaqsivḷugich ilignun.

⁹ Iñuggutiuraġniaqput qinnautikpich kipiraġigaa; iñuggutaiḷḷagaqtugut aniqsaapagniqtun.

¹⁰ Iñuuniksratualuvut tavra piŋasukipiaq qulit (70) ukiut; suaŋŋatiqaġupta sisamakipiaguyumiñaġmiut (80); aglaan tavra iñuulluataġniptigni qaġġirriraġigaatigut iḷuiḷḷiuġunmiglu isumaaġunmiglu; iñuggun nuŋunasuaġaqtuq, aasii piiqł̣uta.

¹¹ Kia iḷitchuġiŋavauŋ suaŋŋataa qinnautikpich? Kia iḷisimavauŋ sivuuqqan iḷisuuruaq qinnaliqavich?

¹² Iḷisauttutigut qanutun naisuurautilaaŋanik iñuggutikput, isumatusiyumaugut.

¹³ Qanutun suli sivisutigiruamik qinnautin inniaqpa? Naglikkutiqallagniaġiñ, Atanġuruatiin, kivgaġnun!

¹⁴ Immiqsimaaqtigut uvlaatuaġaġikpan nakuaqqutiġpagnik, atuutiqaġumaugut suli quviasuutiqaġluta iñuuniqtutilaaptiktun.

¹⁵ Quviasuutiksritchigut sivisutilaaŋatun ipiqtusuutiqaqtitkaptigut, iluqaiññi ukiuni iłuiḷḷiuġutiqaŋatilaaptiktun.

¹⁶ Uvagut, kivgauruagut iliŋnun, qiñiqtittigut kamanaqtuanik savaaġnik; kiŋuvaaġirapta qiñiġumagaat qaumanġa suaŋŋatikpich.

¹⁷ Ataniiq God-tiiŋ, quviasaaġutitin uvaptinniillich. Piḷḷuatautiqaqtittigut suraġaġnipayaaptinni! Piḷḷuatautiqaqtittigut suraġaġnipayaaptinni!