Psalms 9 - Iñupiatun Mumiksat Uqalugiksuat

Quyanaaġun God-mun Saglutautaiññiŋagun

Atuqtit aullarriŋannun. Atuunmun “Tuqumman iġñiŋa.” Psalm aglaaŋa David-gum.

¹ Nanġaġniaġikpiñ, Ataniiq, iluqaaġluŋa uummatimniñ; Uqausiġiniaġitka iluqaisa aliuġnaqtuat savaatin.

² Atuutiqaġniaqtuŋa quviasugluŋa pisigilutin. Nanġaġniaġikpiñ, Qutchigñiqsrauruatiin God.

³ Akiḷḷiitka utiqsaqtut tautugnaqsikavich; ulġukamiŋ tuqurut.

⁴ Ilvich-kii ativlugich aŋalatchisuurutin pitqiksiġayuitchutillu isivġiutigni, aquppiutaqpagniiłłutin isivġiġaġigigma nalaunŋaruakun.

⁵ Suksraaŋagitin piḷuusiqirauruat suksraunġiqł̣ugich piḷuktuaguruat; itqaġnaġumiñaiŋagitin atiŋich taimuŋaaglaan.

⁶ Akiḷḷiivut isukłitchut taimuŋa isuksraiḷaamun; suksraunġiŋagitin iniqpaŋich, itqatqigñaġumiñaitchut.

⁷ Ataniq aglaan umialgusaġataqtuq taimuŋa isuitchuamun; aquppiutani inillaaniŋagaa isivġiiviksraunni.

⁸ Atanniqsuiruq nunamik iluaqtuakun; isivġiiruq nunauruanik nalaunŋaruakun.

⁹ Ataniq illuvigiraġigaa nagriaġirauruam, ini navianaitchuaq iluiḷḷiuġutiqaqtuni.

¹⁰ Ilignik iḷitchuġiŋaruat, Ataniiq, nalupqisuŋirviginiaġaatin; ipiġaiññayuitkiñ kiñapayaaq ilignugman.

¹¹ Atuġitchi nanġaġlugu Ataniq, atanniqsuiruaq Zion-mi! Nunauruat uqautisigich Ilaan savaaġiŋaraisigun!

¹² Akisaurrisuuruaq iñuaqtuqtuanik; puigulaitkaa qirrataat nagliksaaqtuat.

¹³ Nagligiŋŋa, Ataniiq! Nagliksaaqtirrutaich tautukkich akiḷḷiima uvamnun! Annauttuŋŋa tuqqunmiñ Ataniiq,

¹⁴ makitallayumauŋa sivuġaanni Jerusalem-miut. Quliaqtuaġutilugich aasii supayaatigun nanġaġumiñaaqtuutipkun ilignun. Quviasugniaqtuŋa qanuq annautiŋagigma.

¹⁵ Piḷuusiqirauruat nivaktuat qargisaunmik ilaisa katagvigigaat; inmignik qargisaqtut.

¹⁶ Ataniq nalunaiqsauvsaaġaqtuq nalaunŋaruatigun isivġiiraġikami, piḷuktualliasii inmignik naniqtauvlutiŋ ilaisa savaamigniñ.

¹⁷ Tuqqulli piḷuusiqiripayaam kaŋŋirviksrautigigaa, kiñapayaagugaluaġumi ayyaktuiŋaiŋitkumi suli God-mik.

¹⁸ Susuksiuyugaqtuaq suuŋiḷaġirausuŋaiññaġniaŋitchuq; niġiukkutaat iḷiappauruat siquvyataugaluamiiŋaiġisiruq.

¹⁹ Qaiñ, Ataniiq! Paaqłaktitaaŋaiġiñ imña! Sivuġaġnuutilugich pigiiḷḷiqirit iḷitchuġipkaġlugich iñugruiññautilaaŋannik.

²⁰ Iqsitchaikkich, Ataniiq; Iḷitchuġipkakkich iñugruiññautilaaŋiññik.