Psalms 89 - Iñupiatun Mumiksat Uqalugiksuat

Atuun Nunaqpauruat Iłuiḷḷiuġutiqaqtillugich

Poem aglaaŋa Ethan-gum Ezrahite-guruam.

¹ Atanġuruatiin, atuutiginiaġiga taimuŋaaglaan nakuaqqutin; Quliaqtuaġiniaġiga iḷumun ittuaguniġiñ taimuŋa kiŋuniġiiksuaguruanun.

² Iḷisimaruŋa nakuaqqutin inniaqtilaaŋanik taimuŋaaglaan, iḷumun ittuaguniġiñ nutim ittuaq inniaqtuq qiḷaktuttauq.

³ Uqallaŋarutin, “Inillaiŋaruŋa sivunniuġunmik iñuksraqtaġiŋaramnun; Unniqsuqłiiŋaruŋa kivgaġiramnun David-mun,

⁴ ‘Kiŋuniitin ataramik umialgułhaiññaġuuniaqtut; suli aquppivigiran inillagniaġiga kiŋuniġiipayauraqtaġnun.’”

⁵ Qiḷaich atuutigigaich aliuġnaqtuat savaaġisuuratin; ilumutuuqtuaġuniġiḷḷu atuutigiraġigaat salumaruat ilaaguaqtauŋaruat katittaġigamiŋ.

⁶ Kiñami imña qiḷaŋmi iliktun inniaġniqpa, Ataniiq? Nalliat unnii qiḷaŋmiittuat nalliummatiŋitchuq iliŋnun.

⁷ God atqunaqługu qiksigiraksrauruq ilaaguaqtauruani salumaruani; iluqapayauraġmiŋ taluġiugaqtuksraġigaat qiksigilugulu.

⁸ Ataniq God Sapiġñaqtuaguruatiin, allamik piitchuq suaŋatigiruamik iliktun; supayauraġniġni ilumutuuqtuagurutin, Ataniiq.

⁹ Aŋalatkin suamaruaq taġiuq; qaiḷḷiqpakkaluaġman, quunniġuqtillagiñ.

¹⁰ Siquvyataġigiñ Rahab, niġrułłuk taġiumi, aasii tuqułługu; Suaŋŋatiqpagnik siaminŋagitin akiḷḷitin.

¹¹ Qiḷak pigigiñ, nunalu; savaŋagiñ nuna sunapayauraġlu nunamiittuaq.

¹² Savaaġiŋagikkiñ salliñaaġlu kiluliñaaġlu; Mount Tabor-lu Mount Hermon-lu attualaniaqtuk quviasuunmi atqiñ pisigilugu.

¹³ Qanutun talġiñ suaŋŋatiqapiallaktuq! Argaiñ suaŋammiuq! Suli taliqpiiñ argaiñ qutchiksuagupiallaktuq!

¹⁴ Umialgutin maŋŋuqaqtuq nalaunŋarualiqinikun suli pitqiksiġautaitchuakun; piqpakkullu iḷumutuuġniġiḷḷu nalunaitchuk suraġaġnipayauraġni.

¹⁵ Qanutun quviasuktigivat iñuich nanġairuat iliŋnik atuutitigun, iñuusiqaqtuat qaumanġani nayuqłiatiniqpich, Ataniiq!

¹⁶ Ilvich pisigivlutin quviasugaqtut uvluqtutilaaŋatun, nanġaqtuaqłutin pisigivlugu nalaunŋaruaguniġiñ.

¹⁷ Kamanaqtuanik akimmatiqaqtittaġigivsigut; iviġaglutin quviasualaraqtugut akimmanmi.

¹⁸ Ilvich, Atanġuruatiin, naliġaŋagiñ sapunniaqtikput; Salumaruaguruatiin God iñuŋiññun Israel, umialiksriñŋagiptigut.

God-im Unniqsuqłiisaa David-mun

¹⁹ Qiñiqtuuraatigun iŋiḷġaan uqautiŋagitin iḷumutuuqtuaġiraġnun, “Ikayuŋagiga aŋuyaktiqpauruaq; Qaiñŋagiga aquppiutaqpak naliġaamnun iñugiraġniñ.

²⁰ Kivgaġa David umialiguqtinŋagiga uqsruqtaaqługu salumaruamik uqsrumik.

²¹ Suaŋŋatiga ataramik ilaaniinniaqtuq, suaŋŋatigma saŋŋisipkaġniaġaa.

²² Akiḷḷiŋisa pisaasuġmiaġniaŋitkaat; pigiiḷḷiqirauruat akiisinniaŋitkaat.

²³ Suksraunġiġniaġitka akiḷḷiŋich suli tuqullugu kiñapayaaq uumiksriruaq ilaanik.

²⁴ Iḷumutuuġutikullu nakuaqqutikullu itqatiginiagiga; Akimmatiqałhaiññaqtinniaġiga.

²⁵ Argaŋich inillagniaġitka qulaanun taġium, Agliḷaaġniaġiga sivitchuqtaaġlugu umialguviŋa Mediterranean-miñ Euphrates kuuŋanunaglaan.

²⁶ David-gum uqallautiniaġaaŋa, ‘Aapagigikpiñ suli God-igivlutin; munaqsrigigikpiñ suli annaurrigigikpiñ.’

²⁷ David aŋayukłiuniaqtuq iġñimniñ, kamanaġniqtauluni umialipayaaniñ nunami.

²⁸ Taŋŋiġuuniaġiga unniqsuqłiisiga ilaanun, suli sivunniuġutiga ilaanun inniaqtuq isuitchuamun.

²⁹ David-gum kiŋuniiŋich inillaktauniaqtut taimuŋaaglaan; kiŋuniiġiraŋich umialiusuuniaqtut.

³⁰ “Kiŋuniiŋisa aglaan kamagiŋitpatigik pitquratka, suli maliġuaŋitpatigik piraksriutitka,

³¹ suunnaġiŋitpatigik pitqurriutitka, suli kamagiŋiḷḷugich piraksriutitka,

³² piḷuusiqiaŋich pisigilugich tatavsaġniaġitka anaullaunmik; pigiiḷḷiqiaŋich pisigilugich ipiġaqtuġniaġitka.

³³ Aglaan nakuaġiŋaiġñiaŋitkiga David unniqsuqłiisigianiŋaraġa ilaanun piŋiññiaŋitkiga.

³⁴ Naviŋniaŋitkiga sivunniuġutigiŋaraġa ilaanun naakkaunnii tasuġlugu unniqsuqłiutigiŋaraġa.

³⁵ “Tavra atausiaqługu unniqsuqłiiŋaruŋa salumaruakun atipkun: Sagluqiyumiñaitkiga David.

³⁶ David taimuŋaaglaan kiŋuvaaqaġuuniaqtuq, suli munaġiniaġiga ilaan umialgutaa siqiñiq siqiññaaġuraġniaqpan.

³⁷ Inillaktauniaqtuq taimuŋa tatqituntauq, ataramik iḷisimariqaqtuatun qiḷaŋmi.”

Qigḷukpagniq Akiisitaumman Umialik

³⁸ Aglaan uvva Ataniiq, uumitchautiŋagiñ umialiksraqtaaġiŋaran; suksraaŋagiñ nalunaiŋaran uqsruqtaaqługu.

³⁹ Maliġuaŋaitkiñ sivunniuġutin kivgaġiraġnun suli igił̣ł̣ugu niaquġutaa nunamun.

⁴⁰ Ulġuttaŋagitin iniqpaŋisa katchiŋich suli siqumiłługich sapukutauraġniaŋich.

⁴¹ Apqusaaqtuat tigligaigaat suġautaŋiñik; siḷalliipayaaŋisasuli kipagigaat.

⁴² Akimapkaŋagitin akiḷḷiiŋich; iluqaisa quyatchaivḷugich.

⁴³ Satkukkaluaŋich anniqsuutauŋaiqsinŋagitin aasii akiisiłługu aŋuyagiaġman.

⁴⁴ Kamanautaiqsinŋagiñ suli igił̣ł̣ugu aquppivia nunaġruiññamun.

⁴⁵ Utuqqaliñaġiaqtinŋagiñ nutaġauniŋaniñ suli matuvlugu kanŋunaqsiḷiġunmik.

Aŋaiyyun Annautitquvluni

⁴⁶ Ataniiq, iriqsimaniaqpich imña isuitchuamun? Qanutuaglaan imña qinnautin ikualaniaqpa igniqtun?

⁴⁷ Itqaumalugu qanutun naisilaaŋa iñuggutigma; itqaumalutin savaaġiŋagiptigut iluqata iñugruiññauvluta!

⁴⁸ Kiñaimña iñuk iñuuruaq tuquŋitchumiñaqpa? Qanuġluta iñugruiññauruagut tuqulaitchumiñaqpisa?

⁴⁹ Ataniiq, nauŋ ipkua nalupqinaiyautigiŋaratin nakuaqqutigni? Nauŋ iḷumutuuġutigiŋaratin David-mun?

⁵⁰ Puiguġnak qanutun uvaŋa, kivgaġiran, kipagitchiŋatilaamnik, igḷutuaġiŋakapkich kipakkutiŋich iñuich ukpiŋaitchuat.

⁵¹ Akiḷḷiqpich pisaaŋaŋagaat umialiksraqtaaġiŋaran, Ataniiq! Sumupayaaġman tamarra pisaaŋavlugu.

⁵² Nanġaqtauli Ataniq isuitchuamun! Aamian! Aamian!