Psalms 88 - Iñupiatun Mumiksat Uqalugiksuat

Qiavluni Ikayuqtisiuġman

Atuun. Psalm aglaaŋat iḷaŋisa Korah-m. Atuqtit aullarriŋannun. Mahalath leannoth-kuaqługu. Poem aglaaŋa Heman-gum Ezrahite-guruam.

¹ Ataniiq God, annaurrimaaŋ, qirruktuŋa iliŋnun uvluqtutilaaŋatun unnuaqtutilaaŋatunlu sivuġaġni.

² Tusaallagniaġuŋ aŋaiyyutiga; naalaġniuŋ qirratiga ikayuquvluŋa!

³ Iḷitqusiġa silvinŋaruq iḷuiłłiuġutinik suli iñuggutiga isukłiññiuraaliqsuq.

⁴ Irrusiqaqtuŋa tuquyasiuraqtuatitun; suaŋŋataiġutipiallaktuŋa.

⁵ Unirruiñaġaanŋa akunġanni tuquruat; Tuqutauŋaruatun iḷuvvivigñi ittuŋa, tamatkunatitun piigupiallaŋaraqtun, ikayuġumiñaiŋaraqtun.

⁶ Iginŋagiŋma atchigñiqsraŋanun iḷuqsram, taaġniqsrauruamun suli itiniqsraŋanun iḷuqsram.

⁷ Qinnautikpiñ uqumaiḷḷiraqtitapiaġataġaaŋa, naniġvaktitauruatun qaiḷḷiġnun.

⁸ Avilaitqatimnun suksraaqtinŋagigma; naġġugiliqsipiaŋagiŋma iliŋiññun. Umŋurrauvluŋa qanuġluŋa annakkumiñaiŋaruŋa;

⁹ irraka sayaiḷḷaktuk nagliksaaqpaił̣ł̣uŋa. Ataniiq, uvlutuaġaġimman ququullavigiugaġikpiñ isaaqsimavluŋa aŋaiyyuraqtuŋa.

¹⁰ Savallavich aliuġnaqtuanik tuquaniŋaruanun? Makitchuuvat aasii nanġaaqsivḷutin?

¹¹ Nuŋulaitchuaq nakuaqqutin uqausiġisuuvarruŋ iḷuvvivigmi, naakkaunnii piŋitqataaŋiññiġiñ inaani suksraunġiġvium?

¹² Aliuġnaqtuat savaatin qiñiġnaġumiñaqpat taaqtuami naakkaunnii nakuuniġiñ nunaŋanni piiguqtauŋaruat?

¹³ Ataniiq, ququulaŋagikpiñ ikayuquvluŋa; uvlaatuaġaġimman tavra aŋaiyyuuqtuŋa iliŋnun.

¹⁴ Summan ayyaktuiññaqpiŋa, Ataniiq? Tunuttaqpiŋa imña summan?

¹⁵ Nutaġauraunimniñ qaŋa tavra, nagliksaaġaqtuŋa suli tuquqqayaġataqłuŋa; Piḷaipiallaktuŋa akigaaġivlugich tatavsautitin.

¹⁶ Qinnautiqpakpich siquptaġigaanŋa; tatamaanaqtuat piyuaġutikpich suksraunġiġaanŋa.

¹⁷ Uvluqtutilaaŋatun avattaġigaanŋa ulittuatun; tikirruiññaġaġigaanŋa sugnamiḷḷiqaa.

¹⁸ Piqpagiratka avilaitqatiitkalu aullaqtitaŋagitin, suli tamarra taaqtuaq kisian nayuqtigiraġigiga.