Psalms 85 - Iñupiatun Mumiksat Uqalugiksuat

Aŋaiyyun Nunaqpauruam Iłuaġniaġniŋagun

Atuqtit aullarriŋannun. Iḷaŋisa Korah-m. Psalm.

¹ Ataniiq, naglikkutiqaqtuagurutin nunagiraġnun; Israel piḷḷuataqtualitqiksinŋagiñ.

² Suliqutigiŋaiŋagitin piḷuutiŋich iñugiraqpich suli suliqutigiŋaiqł̣ugich piluusiqiaŋich.

³ Qinnautiŋaiŋagitin suli tunułługu qinnautiqpakkaluan.

⁴ God, Annaurigiraptigiñ, utqutisigut, iviġaumairrutiŋaiġḷuta!

⁵ Uumisuutiniaqpisigut imña isuitchuamun? Qinnautiŋaniaqpisigut taimuŋaaglaan?

⁶ Suaŋasitqiksitchumiñaitpisigut, aasii iñugiraqpich nanġaġumagaatin?

⁷ Maniraġiuŋ nuŋulaitchuaq nakuaqqutin, Atanġuruatiin, aasii annautiluta.

⁸ Naalaġniruŋa qanuq Ataniq God-auruaq uqaġniaqtilaaŋanik; unniqsuqłiiŋagaatigut tutqiunmik, ilaan nanmiñiq iñugivluta, utiġvigiŋitkuptigik isumalluaġiił̣ł̣uta piḷġusikkaluavut.

⁹ Iḷumutun annautaa qanipiallaktuq qiksiksraqtuanun ilaanik, aasii ilaata qaumanġata nayuġuuniaġaatigut nunaptigni.

¹⁰ Nakuaqqunlu iḷumun ittuaġlu kasuutiniaqtuk; nalaunŋarualiqiniġlu tutqiunlu iqimmalaaġniaqtuk.

¹¹ Iḷumun ittuaq puiñiaqtuq nunamiñ, aasii God-im nalaunŋaruaguniŋa anmun qiñiġluni qiḷaŋmiñ.

¹² Atanġum piḷḷuatautiqaqtinniaġaatigut, nunakput aasii nauriaqsiḷuni iḷaŋaniiqsuaġluni.

¹³ Nalaunŋarualiqiniġum sivulliuġniaġaa Ataniq suli itqanaiġḷugu avluġaaġviksraŋa.