Psalms 84 - Iñupiatun Mumiksat Uqalugiksuat

Inuġruvigivlugu God-im Iglua

Atuqtit aullarriŋannun. Gittith-kuaqługu. Iḷaŋisa Korah-m. Psalm.

¹ Qanutun piññaġnaqtigiva Aŋaiyyuvikpagiran, Atanġuruatiin Sapiġñaqtuaguvlutin!

² Qanutun tavraniitchummiiġaluaqtuŋa! Atanġum Aŋaiyyuvikpaŋanun inuqsralipiallaktuŋa. Iluġaaqługu irrusiġa atuqtuŋa quviasuunmi iñuuruaguruamun God-mun.

³ Tamatkua unnii tiŋmiaġruich ugluliuġaqtut, suli tiŋmiaġruurat ugluqaġuummiut; ivvaviksramignik qanillutiŋ ikipkaivigiraġni, Ataniiq Sapiġñaqtuaguruatiin, umialigiraqpiñ suli God-igivlutin.

⁴ Qanutun quviasuktigivat tamatkua iñuuruat aŋaiyyuvikpagni, atułhaiññaġuurut nanġautinik iliŋnun.

⁵ Quviasuglich iliŋich suaŋŋatiqaqtuat iliŋniñ, sivunniŋaruat uummatimigni iglausukłutiŋ Mount Zion-mun.

⁶ Paliumaruatigun natiġnaŋisiguaqamiŋ Baca-m, suvlikłutiŋ maqsraluktuat iḷiŋarut tavrani; ukiaksraam sialuŋisa immiŋagaich imaqsuurat.

⁷ Suaŋŋaksaiññaŋarut iglaullaġmiŋ; tautugniaġaat God-iŋat god-auruat Zion-mi.

⁸ Tusaagguuŋ aŋaiyyutiga, Ataniiq God-auruatiin Sapiġñaqtuaguvlutin. Naalaġniiñ, God-auruatiin Jacob-mun!

⁹ Tautuguŋ sapunniaġutikput, ilvit, God-auruatiin, umialik ilvich naliġaaġiŋaran.

¹⁰ Atausimi uvliḷḷaktuni Aŋaiyyuvikpagiraġni nakuułhaaqtuaguruq 1,000-tun iñugiaktigiruani allaniinniġmiñ; Qaunaksrauguma paaŋanik God-igma igluata iviġaumaġiłhaaġayaġiga iñuuniġmiñ igluŋiñi pigiiḷḷiqirauruat.

¹¹ Ataniq munaqsrigigikput aullarrigivlugulu. Quviasaaġuugaatigut nakuuniġmiñik qutchiksiḷiġunmiglu. Nakuuruamik aitchuŋiññiaŋitkaich nalaunŋarualiqirauruat.

¹² Ataniiq Sapiġñaqtuaguruatiin, qanutun quviasuktigivat ukpiqsraqtuat iliŋnik!