Psalms 83 - Iñupiatun Mumiksat Uqalugiksuat

Aŋaiyyun Akiisitquvlugich Israel-guruat Akiḷḷiiŋich

Psalm aglaaŋa Asaph-gum atuun.

¹ God-auruatiin, nipaisimaaġnak; ittuummiñak, nipaisaaġnak!

² Tautugiñ! Akiḷḷitin marra tuavaallaktut, suli uumikłiqsuat iliŋnik paaqłaktaliqsut.

³ Nalunaqtuakun sivunniuqtut akiḷḷiġivlugich iñugiratin; nalunaukkivḷutiŋ suyumaalliġaich piqpagiratin.

⁴ “Qaiḷusi,” uqaqtut, “suksraunġiġḷakput nunaqpaŋat, Israel piiguġumagaat taimuŋa isuitchuamun.”

⁵ Atautchimunmukłutiŋ sivunniirut aasii allallu iḷaaluġiiksinŋarut akiḷḷiġivlutin:

⁶ iñuŋiñik Edom suli Ishmaelite-guruanik; iñuŋiñik Moab suli Hagrite-guruanik;

⁷ iñuŋiñik Gebal, Ammon, suli Amalek, iñuŋiñiglu Philistia-m Tyre-vlu.

⁸ Assyria, suaŋŋatiqaqtuaq, iḷḷatiŋammiuq iliŋiñun Ammonites-lu Moabites-lu, kiŋuvaaŋich Lot-gum.

⁹ Aŋalatchigik piusivsisun Midianite-guruanun, Sisera-mullu Jabin-mullu Kishon River-mi.

¹⁰ Akiisiñŋarasi Endor-mi, timiuraġniaŋich aasii auvlutiŋ nunaġruiññami.

¹¹ Atanauraŋich aŋalatchigik Oreb-tullu Zeeb-tullu; akiisillugich aŋalatchiriŋich piusivsisun Zebah-munlu Zalmunna-munlu,

¹² uqallaŋaruat, “Piññaktaaġilakput nuna God-im pigiraŋa.”

¹³ Siammayaakkich avyutun, God-auruatiin, amiġaiġñikutun tiŋittaŋisun anuġim.

¹⁴ Ikuallagmatun napaaqtusalait, naakka iġġich ikuallaktuatun,

¹⁵ uŋutkich anuġiqługnik suli tatamaalatchiḷugich anuġiqpagnik.

¹⁶ Kanŋutchaglit Atanġuruatiin, iñuich nalunaiġumagaat suaŋŋatiqaqtilaan.

¹⁷ Akiisitaulittuq suli qanuqsausiiġḷutiŋ isuitchuamun; qanuqtuq tuquyumaut kanŋunaqsiḷiġunmi.

¹⁸ Iḷitchuġiyumaut kisivich Atanġutilaaġnik, qutchigñiqtauvlutin aŋalatchiruagurutin nunapayaurami.